ଅମ୍ବାଲ, ୨୫।୮: ଏକ ହତ୍ୟାକାଣ୍ଡ ମାମଲାରେ ଗିରଫ ହୋଇଥିବା ଜଣେ ଅଭିଯୁକ୍ତ ପରେ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ। ଏହାପରେ ତାଙ୍କୁ ହସ୍ପିଟାଲକୁ ଚିକିତ୍ସା ପାଇଁ ନିଆଯାଇଥିଲା। କିନ୍ତୁ ଚିକିତ୍ସିତ ଅବସ୍ଥାରେ ଆଇସୋଲେସନ ଓ୍ବାର୍ଡର ଝରକା ଭାଙ୍ଗି ଅଭିଯୁକ୍ତଜଣଙ୍କ ଫେରାର୍ ହୋଇଯାଇଛନ୍ତି। ଏଭଳି ଏକ ଘଟଣା ହରିୟାଣା ଅମ୍ବାଲସ୍ଥିତ ଏକ ଡାକ୍ତରଖାନାରେ ଘଟିଛି। ଏହି ଘଟଣାରେ ପୋଲିସ ପକ୍ଷରୁ କୁହାଯାଇଛି, ରୋହତକ୍ର ଲକି କୁମାର ଏକ ହତ୍ୟାକାଣ୍ଡ ମାମଲାରେ ଅଗଷ୍ଟ ୭ରେ ଗିରଫ ହୋଇଥିଲେ। ଏହାପରେ କୋର୍ଟ ତାଙ୍କୁ ଅମ୍ବାଲ କେନ୍ଦ୍ରୀୟ କାରାଗାରକୁ ନ୍ୟାୟିକ ହେପାଜତରେ ପଠାଇ ଦେଇଥିଲେ। ଜେଲରେ ଥିବା ଅବସ୍ଥାରେ ଲକିଙ୍କ କରୋନା ଟେଷ୍ଟ କରାଯାଇଥିଲ। ଯାହାର ରିପୋର୍ଟ ପଜିଟିଭ ଆସିବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଅନ୍ୟ ସଂକ୍ରମିତ କଏଦୀଙ୍କ ସହ ଲକିଙ୍କୁ ସ୍ବତନ୍ତ୍ର ଆଇସୋଲେସନ ଓ୍ବାର୍ଡରେ ପୋଲିସ ହେପାଜତରେ ରଖାଯାଇଥିଲା। କିନ୍ତୁ ହସ୍ପିଟାଲ ପକ୍ଷରୁ ପୋଲିସକୁ ଖବର ଦିଆଯାଇଥିଲା କି ଲକି ତାଙ୍କ ବେଡ୍ରୁ ଗାୟବ ହୋଇଯାଇଛନ୍ତି। ଓ୍ବାର୍ଡର ଝରକା ଗ୍ରିଲ ଭାଙ୍ଗି ଲକି ଫେରାର୍ ହୋଇଯାଇଥିବା ପୋଲିସ ଜାଣିବାକୁ ପାଇଛି। ପୋଲିସକୁ କିନ୍ତୁ ଲକିର କୌଣସି ସନ୍ଧାନ ମିଳି ନ ଥିବା ଜଣାପଡ଼ିଛି।
