ଜେନେଭା, ୧୯।୧୦: କରୋନା ଲଢ଼େଇରେ ଭାରତ ପକ୍ଷରୁ ବିଶ୍ୱସ୍ବାସ୍ଥ୍ୟ ସଂଗଠନକୁ ଦିଆଯାଇଥିବା ପ୍ରସ୍ତାବକୁ ନେପାଳ ଏବଂ ପାକିସ୍ତାନ ସମର୍ଥନ କରିଛନ୍ତି। ଅପରପକ୍ଷରେ ଆମେରିକା ପ୍ରସ୍ତାବରେ ଅମଙ୍ଗ ରହିଛି। ଭାରତ ପକ୍ଷରୁ ପ୍ରସ୍ତାବ ଦିଆଯାଇଥିଲା ଯେ, ପୃଥିବୀର ସମସ୍ତ ଦେଶକୁ କରୋନା ଟିକା ଉପଲବ୍ଧ କରାଇବା ନେଇ ବିଶ୍ୱ ବ୍ୟାପାର ସଂଗଠନ ସୁନିଶ୍ଚିତ କରାଇବା ଆବଶ୍ୟକ। ଭାରତ ଏବଂ ଦକ୍ଷିଣ ଆଫ୍ରିକା ପକ୍ଷରୁ ଏହି ପ୍ରସ୍ତାବ ଅଣାଯାଇଥିଲା। ଏହାକୁ ବିଶ୍ୱସ୍ବାସ୍ଥ୍ୟ ସଂଗଠନ ପକ୍ଷରୁ ସ୍ବାଗତ କରାଯାଇଥିଲେ। ପୃଥିବୀରୁ କରୋନା ମହାମାରୀ ହଟାଇବା ଲାଗି ସମସ୍ତ ଦେଶ ମିଳିତ ଭାବେ ଲଢ଼େଇ କରିବା ଅପରିହାର୍ଯ୍ୟ ବୋଲି ବିଶ୍ୱସାସ୍ଥ୍ୟ ସଂଗଠନ ମୁଖ୍ୟ ଟେଡ୍ରୋସ୍ ଆଧାନୋମ୍ ଗେବ୍ରିୟେସସ୍ ଟୁଇଟ୍ କରି କହିଥିଲେ। କରୋନା ଟିକା ଲାଗି ଅନ୍ତର୍ଜାତୀୟସ୍ତରରେ ବ୍ୟବସାୟିକ ନିୟମ କୋହଳ କରାଯିବା ଉପରେ ସେ ଗୁରୁତ୍ୱାରୋପ କରିଥିଲେ। ସେହିପରି ନମୁନା ପରୀକ୍ଷା ଉପକରଣ ଏବଂ ଚିକିତ୍ସା ସମ୍ପର୍କିତ ସହାୟତା ଶସ୍ତା ଦାମରେ ଯୋଗାଇ ଦେବା ଲାଗି ଭାରତ ଏବଂ ଦକ୍ଷିଣ ଆଫ୍ରିକା ପକ୍ଷରୁ ଆଗତ ହୋଇଥିବା ପ୍ରସ୍ତାବକୁ ସେ ପ୍ରଶଂସା କରିଥିଲେ। ଆମେରିକା ସହିତ ୟୁରୋପୀୟ ସଂଘ, କାନାଡ଼ା, ଜାପାନ, ବ୍ରିଟେନ, ଅଷ୍ଟ୍ରେଲିଆ ଏବଂ ସୁଇଜରଲାଣ୍ଡ୍ ଏହି ପ୍ରସ୍ତାବକୁ ଖାରଜ କରିଦେଇଥିଲେ। ଅପରପକ୍ଷରେ ଆଫ୍ରିକୀୟ ଦେଶ ସମୂହ, ବାଂଲାଦେଶ, ଶ୍ରୀଲଙ୍କା, ପାକିସ୍ତାନ, ନେପାଳ ପ୍ରମୁଖ ଏହାକୁ ସମର୍ଥନ କରିଥିଲେ। ସେହିପରି ଚାଇନା, ତୁର୍କୀ, ଫିଲିପାଇନ୍ସ୍, କଳମ୍ବିଆ ପ୍ରମୁଖ ଦେଶ ଭାରତ ଏବଂ ଦକ୍ଷିଣ ଆଫ୍ରିକା ପକ୍ଷରୁ ଅଗାତ ହୋଇଥିବା ପ୍ରସ୍ତାବ ଊପରେ ପୁନର୍ବିଚାର କରିବାକୁ ମତପୋଷଣ କରିଥିଲେ।
