ବେଜିଂ,୧।୧ : ଚାଇନାରେ କରୋନା ମହାମାରୀ ସ୍ଥିତି ଅଣାୟତ୍ତ ହେବାରେ ଲାଗିଛି। ଡାକ୍ତରଖାନାଗୁଡ଼ିକରେ ସ୍ଥାନ ନାହିଁ ଏବଂ ଶ୍ମଶାନରେ ଅନ୍ତିମ ସଂସ୍କାର ପାଇଁ ଧାଡି ଲାଗି ରହିଛି। କରୋନା ମହାମାରୀର ଆତଙ୍କ ମଧ୍ୟରେ, ବିଶ୍ୱର ଅନେକ ଦେଶର ଲୋକମାନେ ଉତ୍ସାହର ସହିତ ନୂତନ ବର୍ଷ ପାଳନ କରୁଛନ୍ତି। ଚାଇନାରେ ଲୋକେ ମହାମାରୀର ବିପଦକୁ ଖାତିର ନକରି ଭିଡ଼ ମଧ୍ୟରେ ଉତ୍ସବ ପାଳନ କରୁଛନ୍ତି। ଏହା କରୋନା ସଂକ୍ରମଣ ଆଶଙ୍କାକୁ ବଢ଼ାଇ ଦେଇଛି।
ଦେଶରେ କରୋନା ବିସ୍ଫୋରଣ ଯୋଗୁ ହୋଇଥିବା ବିନାଶ ସତ୍ତ୍ୱେ ରାସ୍ତାରେ ଲକ୍ଷ ଲକ୍ଷ ଲୋକଙ୍କୁ ଦେଖିବାକୁ ମିଳିଥିଲା। ବହୁ ସଂଖ୍ୟକ ଲୋକ ଆତସବାଜି ସହିତ ବେଲୁନ ଛାଡିଥିବାର ଦେଖାଯାଇଥିଲା। ଅନେକ ଲୋକ ପରସ୍ପରକୁ ଆଲିଙ୍ଗନ କରୁଥିବା ମଧ୍ୟ ଦେଖିବାକୁ ମିଳିଥିଲା। ତେବେ ଏହି ସମୟ ମଧ୍ୟରେ ସମସ୍ତେ ମାସ୍କ ପିନ୍ଧିଥିବାର ନଜର ଆସିଥିଲେ। ମାତ୍ର ସାମାଜିକ ଦୂରତା ବଜାୟ ରଖିବା ସମ୍ଭବ ହୋଇ ପାରି ନଥିଲା।
ଦେଶରେ ସ୍ଥିତି ଅଣାୟତ୍ତ ହେବାରେ ଲାଗିଛି। ପ୍ରତିଦିନ ମୃତ୍ୟୁ ସଂଖ୍ୟା ୯,୦୦୦ ଛୁଇଁଛି। ସେହିପରି ଦୈନିକ ସଂକ୍ରମଣ ୩୭ ଲକ୍ଷ ପାର୍ ହୋଇଛି। ଏଭଳି ଜାରି ରହିଲେ ଜାନୁୟାରୀ ୨୩ ସୁଦ୍ଧା ଦେଶରେ ୫ ଲକ୍ଷ ୮୪ ହଜାର ଲୋକଙ୍କ ମୃତ୍ୟୁ ଘଟିବାର ଆଶଙ୍କା ରହିଛି। ଡାକ୍ତରଖାନାଗୁଡ଼ିକରେ ସ୍ଥାନ ନାହିଁ ଏବଂ ଶ୍ମଶାନରେ ଅନ୍ତିମ ସଂସ୍କାର ପାଇଁ ଧାଡି ଲାଗି ରହିଛି। ଇତିମଧ୍ୟରେ ନୂଆ ବର୍ଷରୁ ଚାଇନା କରୋନା ସହ ଜଡିତ ତଥ୍ୟକୁ ମାସକୁ ଥରେ ପ୍ରକାଶ କରିବ ବୋଲି ଚର୍ଚ୍ଚା ହେଉଥିଲା। ଚାଇନା ପକ୍ଷରୁ ସବୁବେଳେ କରୋନାଙ୍କ ଆକଳନ ଲୁଚାଇ ରଖାଯାଇଥିବା ଅଭିଯୋଗ ହୋଇଛି। ଏଥି ସହିତ, ଅନୁଷ୍ଠିତ ଏକ ବୈଠକରେ ବିଶ୍ୱସ୍ବାସ୍ଥ୍ୟ ସଂଗଠନ ରିଅଲ ଟାଇମ କୋଭିଡ ତଥ୍ୟ ବାଣ୍ଟିବାକୁ ଚାଇନା ଉପରେ ଚାପ ପକାଇଛି। ବିଶ୍ୱସ୍ବାସ୍ଥ୍ୟ ସଂଗଠନ ଅଧିକ ବିପଦ ଥିବା ଲୋକଙ୍କୁ ସଂକ୍ରମଣ ଏବଂ ମୃତ୍ୟୁରୁ ସୁରକ୍ଷା ଦେବା ପାଇଁ ଟିକାକରଣ ବୃଦ୍ଧି ଗୁରୁତ୍ୱକୁ ଦୋହରାଇଛି। ବିବୃତ୍ତି ଅନୁଯାୟୀ, ବିଶ୍ୱସ୍ବାସ୍ଥ୍ୟ ସଂଗଠନ ଚାଇନାକୁ ଭାଇରାଲ ସିକ୍ୱେନ୍ସିଂ, କ୍ଲିନିକାଲ ମ୍ୟାନେଜମେଣ୍ଟ ଏବଂ ପ୍ରଭାବ ମୂଲ୍ୟାଙ୍କନକୁ ମଜବୁତ କରିବାକୁ ଆହ୍ବାନ କରିଛି ଏବଂ ଏହି କ୍ଷେତ୍ରରେ ସହାୟତା ଯୋଗାଇବାକୁ ଇଚ୍ଛା ପ୍ରକାଶ କରିଛି। ବିଶ୍ୱସ୍ବାସ୍ଥ୍ୟ ସଂଗଠନ ମହାନିର୍ଦ୍ଦେଶକ ଟେଡ୍ରୋସ ଆଧାନୋମ ଘେବ୍ରେୟସସ ଚାଇନାରେ ବଢ଼ୁଥିବା କରୋନା ଆକାନ୍ତଙ୍କ ସଂଖ୍ୟା ଏବଂ ପରିସ୍ଥିତିକୁ ନେଇ ଉଦବେଗ ପ୍ରକାଶ କରିବାବେଳେ ବ୍ୟାପକ ସୂଚନାର ଅଭାବକୁ ସ୍ବୀକାର କରିଛନ୍ତି। ସେ କହିଥିଲେ ଯେ ଚାଇନାରେ କରୋନା କଟକଣାକୁ କୋହଳ କରିବା ପରେ ଏକ ଚିନ୍ତାଜନକ ପରିସ୍ଥିତି ଉପୁଜିଛି।
