ବାରିପଦା ଅଫିସ,୨୮।୫(ବ୍ୟୁରୋ): ଏନ୍ଡିଏ ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ନେଇ ଫିଲ୍ମ ନିର୍ଦ୍ଦେଶକ ରାମ ଗୋପାଳ ବର୍ମା ଏକ ବିବାଦୀୟ ଟୁଇଟ୍ କରିଥିଲେ। ଏହାକୁ ନେଇ ରାଇରଙ୍ଗପୁର ଟାଉନ ଥାନାରେ ଭାଜପା ପକ୍ଷରୁ ଏକ ମାମଲା ରୁଜୁ କରାଯାଇଛି। ଜଣେ ଆଦିବାସୀ ମହିଳାଙ୍କ ପ୍ରତି ଏଭଳି ଅଶାଳୀନ ମନ୍ତବ୍ୟ ଦେଇ ସାରା ଦେଶରେ ଅପମାନିତ କରିବା ଏକ ଘୃଣ୍ୟ କାମ। ଏପରି ମନ୍ତବ୍ୟ ସମଗ୍ର ଆଦିବାସୀ ସମାଜ ଓ ନାରୀ ଜାତି ପ୍ରତି ଅସୂୟା ମନୋଭାବର ପରିଚୟ ପ୍ରଦାନ କରୁଛି। ଏହାକୁ ବରଦାସ୍ତ କରାଯିବ ନାହିଁ। ରାମ ଗୋପାଳ ବର୍ମାଙ୍କୁ ଗିରଫ କରା ନ ଗଲେ ଆଗାମୀ ଦିନରେ ଦଳ ରାଜରାସ୍ତାକୁ ଓହ୍ଲାଇବା ନେଇ ରାଇରଙ୍ଗପୁର ଭାଜପା ପକ୍ଷରୁ ଚେତାବନୀ ଦିଆଯାଇଛି।
ପ୍ରକାଶ ଥାଉକି, ଦ୍ରୌପଦୀ ମୁର୍ମୁଙ୍କୁ ଏନଡିଏ ରାଷ୍ଟ୍ରପତି ପ୍ରାର୍ଥୀ ଘୋଷଣା କରିବା ପରେ ରାମ ଗୋପାଳ ବର୍ମା ଏକ ବିବାଦୀୟ ଟୁଇଟ୍ କରିଥିଲେ। ସେ ତାଙ୍କର ଟୁଇଟ୍ରେ କହିଥିଲେ ଯେ, ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି ପ୍ରାର୍ଥୀ କରାଯିବା ପରେ ଉଭୟ ପାଣ୍ଡବ ଏବଂ କୌରବ ସେମାନଙ୍କର ଯୁଦ୍ଧ ଭୁଲିଯିବେ ଏବଂ ତାପରେ ନୂଆ ଇଣ୍ଡିଆରେ ମହାଭାରତ ପୁନଃଲିଖିତ ହେବ।
