ନୂଆଦିଲ୍ଲୀ,୧୯।୧୨: ଦେଶରେ ଚାଉଳ ମୂଲ୍ୟ ବୃଦ୍ଧି ଉପରେ କେନ୍ଦ୍ର ସରକାର କଡା ଆଭିମୁଖ୍ୟ ଗ୍ରହଣ କରିଛନ୍ତି। ଚାଉଳ ଶିଳ୍ପକୁ ମୂଲ୍ୟ ନିୟନ୍ତ୍ରଣ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି। ଏଥିସହ ଚେତାବନୀ ଦିଆଯାଇଛି କି ଯଦି ଏଥିରେ ଲାଭ କରାଯାଏ ତେବେ ସରକାରଙ୍କ ପକ୍ଷରୁ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। କିଛି ସମୟ ହେଲା ଦେଶରେ ଅଣ-ବାସୁମତି ଚାଉଳର ମୂଲ୍ୟ ଦ୍ରୁତ ଗତିରେ ବୃଦ୍ଧି ପାଉଛି, ଯାହାକୁ ନେଇ ସରକାର ଚିନ୍ତିତ ଥିଲେ।
ସୋମବାର ଖାଦ୍ୟ ସଚିବ ସଞ୍ଜୀବ ଚୋପ୍ରା ନୂଆଦିଲ୍ଲୀରେ ଚାଉଳ ପ୍ରକ୍ରିୟାକରଣ ଶିଳ୍ପର ପ୍ରମୁଖ ପ୍ରତିନିଧୀଙ୍କ ସହ ଏକ ବୈଠକ କରିଛନ୍ତି। ଏଥିରେ ସେ ଅଣ-ବାସୁମତି ଚାଉଳର ମୂଲ୍ୟକୁ ଏକ ଯୁକ୍ତିଯୁକ୍ତ ସ୍ତରକୁ ଆଣିବା ପାଇଁ ପଦକ୍ଷେପ ନେବାକୁ କହିଥିଲେ। ସରକାର ଏହାର ନିର୍ଦ୍ଦେଶରେ କହିଛନ୍ତି ଯେ ଦେଶରେ ଭଲ ଗୁଣବତ୍ତା ଚାଉଳର ଷ୍ଟକ ଅଛି । ଓପନ ମାର୍କେଟ ସେଲ୍ସ ସ୍କିମ୍ (ଓଏମ୍ଏସ୍ଏସ୍) ଅଧୀନରେ ବ୍ୟବସାୟୀ ଏବଂ ପ୍ରୋସେସର୍ମାନଙ୍କୁ କିଲୋଗ୍ରାମ ପିଛା ୨୯ ଟଙ୍କା ଦିଆଯାଉଛି, କିନ୍ତୁ ଏହା ଖୋଲା ବଜାରରେ କିଲୋଗ୍ରାମ ପିଛା ୪୩ ରୁ ୫୦ଟଙ୍କା ମୂଲ୍ୟରେ ବିକ୍ରି ହେଉଛି। ଏହି କାରଣରୁ ସରକାରଙ୍କୁ ଏହି ନିର୍ଦ୍ଦେଶନାମା ଜାରି କରିବାକୁ ପଡିଲା।
ଜୁଲାଇରେ ସରକାର ଅଣ-ବାସୁମତି ଚାଉଳ ରପ୍ତାନି ଉପରେ ପ୍ରତିବନ୍ଧକ ଲଗାଇଥିଲେ। ଏହା ବ୍ୟତୀତ ୨୦ ପ୍ରତିଶତ ରପ୍ତାନି ଶୁଳ୍କ ମଧ୍ୟ ବୃଦ୍ଧି କରାଯାଇଥିଲା। ଘରୋଇ ବଜାରରେ ଚାଉଳର ଅଭାବ ନ ହେବା ପାଇଁ ସରକାର ଚେଷ୍ଟା କରୁଥିଲେ। ଏହା ସତ୍ତ୍ୱେ ବଜାରରେ ଚାଉଳର ମୂଲ୍ୟ ବଢୁଥିଲା। ଏହା ପରେ, ଅକ୍ଟୋବରରେ ଚାଉଳର ସର୍ବନିମ୍ନ ରପ୍ତାନି ମୂଲ୍ୟ ଟନ ପିଛା ୯୫୦ ଡଲାରକୁ ବୃଦ୍ଧି କରାଯାଇଥିଲା ।
