ଯାଜପୁର ଅଫିସ, ୨୨ା୧୦: ଜଙ୍ଗଲ ଜମିକୁ ଅଣଜଙ୍ଗଲ ଜମିରେ ପରିବର୍ତ୍ତନ, ଗଛ ସଂଖ୍ୟା ନିରୂପଣ, ଗଛକଟା ବାବଦ କ୍ଷତିପୂରଣ, ଏଫ୍ଆର୍ଏ (ଫରେଷ୍ଟ ରାଇଟ୍ ଆକ୍ଟ) ସାର୍ଟିଫିକେଟ, ବନ୍ୟଜନ୍ତୁ ଇତ୍ୟାଦି ଷ୍ଟେଜ-୧ ଜଙ୍ଗଲ ବିବାଦ ଯୋଗୁ ଓଡ଼ିଶାର ଏକାଧିକ ରେଳ ପ୍ରକଳ୍ପର ଅଗ୍ରଗତି ନୈରାଶ୍ୟଜନକ ରହିଛି। ସେଥିମଧ୍ୟରୁ ୧୮୦ କିମି ଲମ୍ବ ବିଶିଷ୍ଟ ଯାଜପୁର ଜିଲାର ଯଖପୁରା-ଜରୋଲି ଦୋହରୀକରଣ ପ୍ରକଳ୍ପ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଥିବା ରେଳ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ରେଳ ମନ୍ତ୍ରଣାଳୟ ପକ୍ଷରୁ ଗତ ୧୯ ତାରିଖରେ ଟୁଇଟ୍ ଯୋଗେ ଦର୍ଶାଯାଇଛି ଯେ, ମୋଟ ଲମ୍ବ ମଧ୍ୟରୁ ୧୩୯ କିମି କାର୍ଯ୍ୟ ଶେଷ ହୋଇଛି। ସମୁଦାୟ ପ୍ରାୟ ୯୩% ଅଗ୍ରଗତି ହୋଇଛି। ଏହି ପ୍ରକଳ୍ପ କାର୍ଯ୍ୟକାରୀ ହେଲେ ପାରାଦୀପ ବନ୍ଦରକୁ ପରିବହନ ସହଜ ହୋଇପାରିବ। କେନ୍ଦୁଝର ଜିଲା ଯୋଡ଼ା ମାଇନିଂ ଅଞ୍ଚଳରୁ ପାରାଦୀପ ବନ୍ଦରକୁ ଲୁହାପଥର ପରିବହନ କ୍ଷୀପ୍ର ହେବାରେ ସକ୍ଷମ ହେବ। କିନ୍ତୁ କେବେ ସୁଦ୍ଧା ଏହି ପ୍ରକଳ୍ପ ସମ୍ପୂର୍ଣ୍ଣ ହେବ ସେ ନେଇ କୌଣସି ସୂଚନା ମିଳିପାରିନାହିଁ। ଏବେ ବି ଏହି ପ୍ରକଳ୍ପରେ ଜମି ଅଧିଗ୍ରହଣ ଏବଂ ଜଙ୍ଗଲ ଜମିକୁ ଅଣଜଙ୍ଗଲ ଜମିରେ ପରିବର୍ତ୍ତନ ସମସ୍ୟା ରହିଛି। ଯାଜପୁର ଜିଲା ଦେଇ ଯାଇଥିବା ଏହି ଦୋହରୀକରଣ ରେଳଲାଇନ ପ୍ରକଳ୍ପ ପାଇଁ ୧୪୮.୩୮ ହେକ୍ଟର ବେସରକାରୀ, ସରକାରୀ ଓ ଜଙ୍ଗଲ ଜମି ଅଧିଗ୍ରହଣ କରିବାକୁ ଚିହ୍ନଟ ହୋଇଥିଲା। ଜଙ୍ଗଲ ଜମିକୁ ଅଣଜଙ୍ଗଲ ଜମିରେ ପରିବର୍ତ୍ତନ ପ୍ରସ୍ତାବ ୧୯ା୧୧ା୨୦୧୯ରେ ଅନଲାଇନ ଦାଖଲ ହୋଇଥିଲା। ହେଲେ କେତେକ ତ୍ରୁଟି ଯୋଗୁ ତାହା ୧୫ା୭ା୨୦୨୦ରେ ଫେରି ଆସିଥିଲା। ପୁଣି ଏହି ପ୍ରସ୍ତାବକୁ ସଂଶୋଧନ କରି ଦାଖଲ କରାଯାଇଛି। ହେଲେ ଏଯାଏ ସମ୍ପୂର୍ଣ୍ଣ ଜମି ଅଧିଗ୍ରହଣ ପ୍ରକ୍ରିୟା ଶେଷ ହୋଇ ନ ଥିବାରୁ ବାକି ରେଳଲାଇନ ନିର୍ମାଣରେ ବିଳମ୍ବ ହେଉଥିବା କୁହାଯାଉଛି। ତେଣୁ ମନ୍ତ୍ରଣାଳୟର ଏହି ସୂଚନା କେବଳ ଲୋକଦେଖାଣିଆ ବୋଲି ସାଧାରଣରେ ଚର୍ଚ୍ଚା ହେଉଛି।
