ନୂଆଗାଁ,୨୫।୩(ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ବ୍ଲକରେ କେନ୍ଦ୍ର ସରକାରଙ୍କ ସ୍ବଚ୍ଛ ପରିମଳ ଯୋଜନା ମାଧ୍ୟମରେ ପାଇଖାନା ନିର୍ମାଣ ନାମରେ ଚାଲିଛି ହରିଲୁଟ। ପାଇଖାନା ନ ଥାଇ ବାହ୍ୟ ମଳମୁକ୍ତ ଅଞ୍ଚଳ ବୋଲି ଏକାଧିକ ଗ୍ରାମକୁ ଘୋଷଣା କରାଯାଇଛି । କେତେକ ସ୍ଥାନରେ ଫଳକ ଲଗାଯାଇଛି। ଏହି ସୁଯୋଗରେ ଅତି ନିମ୍ନମାନର ପାଇଖାନା ନିର୍ମାଣ କରାଯାଉଛି । ଇଟା ବଦଳରେ ବାଲି, ବଜୁରି ପିସ୍ ବ୍ୟବହାର କରାଯାଉଥିବା ଅଭିଯୋଗ ହେଉଛି ।
ମହାତ୍ମା ଗାନ୍ଧୀଙ୍କ ସ୍ବପ୍ନକୁ ସାକାର କରିବାକୁ କେନ୍ଦ୍ର ସରକାର ସ୍ବଚ୍ଛ ପରିମଳ ଯୋଜନା ଅନୁଯାୟୀ, ସମସ୍ତ ପରିବାରରେ ପାଇଖାନା ନିର୍ମାଣ କରିବାକୁ ଘୋଷଣା କରିଥିଲେ । ଏଥିପାଇଁ ହିତାଧିକାରୀଙ୍କୁ ୧୨ ହଜାର ଟଙ୍କା ଲେଖାଏ ଦେବାକୁ ପ୍ରସ୍ତାବ ଦିଆଯାଇଥିଲା। ସେହି ଅନୁଯାୟୀ ୨୦୧୩ରୁ ନୟାଗଡ଼ ଜିଲା ନୂଆଗାଁ ବ୍ଲକ୍ ୨୨ ପଞ୍ଚାୟତର ୨୭୭ ଗାଁରେ ପାଇଖାନା ନିର୍ମାଣ କରିବାକୁ ଲକ୍ଷ୍ୟ ରଖାଯାଇଥିଲା । ଏଥିପାଇଁ ଜଳ ଓ ପରିମଳ ବିଭାଗର ଯନ୍ତ୍ରୀ ଏବଂ କର୍ମଚାରୀମାନେ ଦାୟିତ୍ୱ ନେଇ ଗାଁ ଗାଁ ବୁଲି ପାଇଖାନା କାର୍ଯ୍ୟର ତଦାରଖ କଲେ । କିନ୍ତୁ ଇତିମଧ୍ୟରେ ୮ ବର୍ଷ ବିତି ଯାଇଥିଲେ ମଧ୍ୟ ପାଇଖାନା ନିର୍ମାଣ କାର୍ଯ୍ୟ ଶେଷ ନ ହୋଇ ଅଧାପନ୍ତରିଆ ଭାବେ ପଡ଼ିରହିଛି । ପ୍ରଥମେ ହିତାଧିକାରୀ ନିଜେ ପାଇଖାନା ନିର୍ମାଣ କରୁଥିବା ବେଳେ ଏବେ ପାଇଖାନା ନିର୍ମାଣ ଦାୟିତ୍ୱ ବ୍ଲକ ବାହାର ଠିକାଦାରଙ୍କ ହାତରେ ଟେକି ଦେଇଛି ବ୍ଲକ ପ୍ରଶାସନ ।
ଆଦିବାସୀ ଅଧ୍ୟୁଷିତ ଜାକେଡ଼ା ପଞ୍ଚାୟତର ଜାକେଡା, ସାନଜିରି, ତୁକୁଡ଼ା, ବଡ଼ଜିରି, ଲୁଣି, ବାଗିଆମ୍ବା, ଦୁରୁଙ୍ଗି, ବାଡ଼ିବାରି, କରଚୁଲି ଆଦି ଗାଁରେ ହାତଗଣତି କେତୋଟି ପାଇଖାନା ନିର୍ମାଣ କରାଯାଇ ବାହ୍ୟ ମଳମୁକ୍ତ ଗାଁ ଘୋଷଣା କରାଯିବା ସହିତ ଫଳକ ଲଗାଇ ଦିଆଯାଇଥିଲା। ନିର୍ମାଣ ହୋଇଥିବା ପାଇଖାନା ମଧ୍ୟରୁ ଅଧିକାଂଶ ସ୍ଥାନରେ ଯନ୍ତ୍ରୀଙ୍କ ନିର୍ଦ୍ଦେଶ ଓ ଠିକାଦାରଙ୍କ ମାଧ୍ୟମରେ ନିମ୍ନମାନର କାମ ହୋଇଥିଲା । ଫଳରେ ତାହା ବ୍ୟବହାର ଅନୁପଯୋଗୀ ହୋଇ ମାଟିରେ ମିଶିଛି। ଏ ନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ଜିଲା ପ୍ରଶାସନ କିମ୍ବା ବ୍ଲକ ଅଧିକାରୀମାନେ କର୍ଣ୍ଣପାତ କରୁ ନ ଥିବା ଅଭିଯୋଗ ହେଉଛି। ଠିକାଦାର ନିମ୍ନମାନର କାର୍ଯ୍ୟ କରୁଥିଲେ ମଧ୍ୟ ମୋଟା ଅଙ୍କର ପିସି ନେଇ ବିଭାଗୀୟ ଅଧିକାରୀମାନେ ସେମାନଙ୍କ ବିଲ୍ ପାସ୍ କରି ଦେଉଛନ୍ତି। ଫଳରେ ଦିନକୁ ଦିନ ଦୁର୍ନୀତି ବଢ଼ିଚାଲିଛି। ଜାକେଡା ପଞ୍ଚାୟତରେ ଠିକାଦାର ପାଇଖାନା ନିର୍ମାଣ କରିଥିଲେ ମଧ୍ୟ ତାହା ଅତି ନିମ୍ନମାନର ହେଉଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ଏପରି କି ନିର୍ମାଣ କାର୍ଯ୍ୟରେ ଇଟା ବ୍ୟବହାର ନ କରି ବାଲି ଏବଂ ବଜୁରିରେ ନିର୍ମିତ ପିସ୍ରେ ପାଇଖାନା ଘରର କାନ୍ଥ ନିର୍ମାଣ କରାଯାଇଛି । ସେଥିରେ ସିମେଣ୍ଟ ବଦଳରେ ଡଷ୍ଟ ପାଉଡର ବ୍ୟବହାର କରାଯାଉଥିବା ନେଇ ମଧ୍ୟ ଅଭିଯୋଗ ହେଉଛି। ପାଇଖାନା ଟାଙ୍କିରେ କମ ବଜୁରି ଦେଇ ନିର୍ମାଣ କରାଯାଉଛି। ଏଥିପାଇଁ ପାଇଖାନାର ସ୍ଥାୟିତ୍ୱ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହେଉଛି। ସିମେଣ୍ଟ ବଦଳରେ ଡଷ୍ଟ ପାଉଡର ବ୍ୟବହାର କରୁଥିବା ବିଷୟରେ ଜଳ ଯୋଗାଣ ଓ ପରିମଳ ବିଭାଗର ଜଣେ କର୍ମଚାରୀଙ୍କୁ ପଚାରିବାରେ ଠିକାଦାର ଭୁଲରେ ଡଷ୍ଟପାଉଡର ଆଣିଥିଲେ, କିନ୍ତୁ ବ୍ୟବହାର କରାଯାଇ ନ ଥିବା ସେ କହିଛନ୍ତି। ଅନ୍ୟପକ୍ଷେ ତଦନ୍ତ ପରେ ଅନିୟମିତତା ଜଣାପଡିଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନୂଆଗାଁ ବିଡିଓ ପ୍ରମୋଦ କୁମାର ନାୟକ କହିଛନ୍ତି ।
