ରସୁଲପୁର,୨୭ା୪(ଡି.ଏନ.ଏ.): ରସୁଲପୁର ବ୍ଲକ ଅନ୍ତର୍ଗତ ନରସିଂହପୁର ପଞ୍ଚାୟତ ହରିପୁର ମୌଜାର ଜିତେନ୍ଦ୍ର କୁମାର ସାହୁଙ୍କ ନାମରେ ଥିବା ଏକ ଘରୋଇ ଜମିରେ ଶବଦାହ ଗୃହ ନିର୍ମାଣ କରାଯାଉଛି। ଏହାକୁ ଜିତେନ୍ଦ୍ର ବିରୋଧ କରୁଛନ୍ତି। ହେଲେ ତାଙ୍କ ବିରୋଧକୁ ପଞ୍ଚାୟତ ପକ୍ଷରୁ ଭୃକ୍ଷେପ କରାଯାଉ ନାହିଁ। ନିର୍ମାଣ କାର୍ଯ୍ୟରେ ବ୍ୟବହୃତ ଜମିକୁ ବିନା ମାପଚୁପ ଓ ସରକାର ପକ୍ଷରୁ ଆବଶ୍ୟକୀୟ କାଗଜାଦ୍ ହାସଲ ନ କରି ବେଆଇନ ଭାବେ ଗୃହ ନିର୍ମାଣ କରାଯାଉଛି। ତେଣୁ ସେ ବାଧ୍ୟହୋଇ ବିଡିଓ ଅବନିକାନ୍ତ ସାହୁଙ୍କ ନିକଟରେ ଅଭିଯୋଗ କରିଛନ୍ତି। ଏହାଛଡ଼ା ଉକ୍ତ ଜମି ଉପରେ ହେଉଥିବା ନିର୍ମାଣ କାର୍ଯ୍ୟକୁ ବନ୍ଦ କରିବା ପାଇଁ ଉପଜିଲାପାଳଙ୍କ କୋର୍ଟରୁ ୧୪୪ଧାରା ଲାଗୁ ପାଇଁ ନିର୍ଦ୍ଦେଶ ହାସଲ କରିଛନ୍ତି। ଉକ୍ତ ନିର୍ଦ୍ଦେଶ ସମ୍ପର୍କରେ କୁଆଖିଆ ଥାନାକୁ ଅବଗତ କରାଇଛନ୍ତି। ମାତ୍ର ଏସବୁ ସତ୍ତ୍ୱେ ନିର୍ମାଣ କାର୍ଯ୍ୟ ଜାରି ରହିଛି। ପୋଲିସ କିମ୍ବା ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ଅଭିଯୋଗକାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ସରକାରୀ ନିର୍ମାଣ କାର୍ଯ୍ୟ ପାଇଁ ଜମିଜମା ସମ୍ପର୍କିତ କାଗଜାଦ୍ କ୍ଷମତାପ୍ରାପ୍ତ ଅଧିକାରୀଙ୍କଠାରୁ ହାସଲ କରିବା କଥା। ଉକ୍ତ ଜମିକୁ ଚିହ୍ନଟ କରାଯିବା ପରେ ନିର୍ମାଣ କାର୍ଯ୍ୟ ଆରମ୍ଭ କରାଯିବାର ବିଧି ରହିଛି। ମାତ୍ର ଏଠାରେ ବିଧି ମୁତାବକ କାର୍ଯ୍ୟ ହେଉନାହିଁ। ହରିପୁର ମୌଜାର ଖାତା ନମ୍ବର-୭୭, ଖସଡ଼ା ନମ୍ବର-୨୦୧୪ରେ ଥିବା ୫୩ ଡିସିମିଲି ଜମି ଅଭିଯୋଗକାରୀଙ୍କ ନାମରେ ଅଛି ବୋଲି ସେ ଦାବି କରିଛନ୍ତି। ସେ କହିଛନ୍ତି, ଉକ୍ତ ନିର୍ମାଣ କାର୍ଯ୍ୟ ସମ୍ପର୍କରେ ପଚାରି ବୁଝିବାରୁ ପଞ୍ଚାୟତ ପକ୍ଷରୁ ଏକ ଶବଦାହ ଗୃହ ନିର୍ମାଣ କରାଯାଉଥିବା ଜାଣିବାକୁ ପାଇଥିଲେ। ତେଣୁ ଜମି ମାପଚୁପ୍ କରି କାର୍ଯ୍ୟ ତ୍ୱରାନ୍ବିତ କରିବାକୁ ନିର୍ମାଣ କାର୍ଯ୍ୟରେ ନିୟୋଜିତ ବ୍ୟକ୍ତିମାନଙ୍କୁ ସେ ଅନୁରୋଧ କରିଥିଲେ। ହେଲେ ସେମାନେ ତାଙ୍କ କଥା ଶୁନି ନ ଥିଲେ। ଏହାକୁ ବିରୋଧ କରିବାରୁ କାର୍ଯ୍ୟ ତଦାରଖ ଦାୟିତ୍ୱରେ ଥିବା ବ୍ୟକ୍ତିମାନଙ୍କର ଆକ୍ରୋଶର ଶିକାର ହେଉଛନ୍ତି। ଏ ସମ୍ପର୍କରେ ବିଡିଓ ସାହୁଙ୍କୁ ପଚାରିବାରେ ସେ କହିଛନ୍ତି, ଗତ ୨୧ ତାରିଖରେ ଅଭିଯୋଗ ହୋଇଥିଲା। ୨ଦିନ ଛୁଟି ଥିବାରୁ ତଦନ୍ତରେ ବିଳମ୍ବ ହୋଇଛି। ଅଭିଯୋଗ ଆଧାରରେ କ୍ଷମତାପ୍ରାପ୍ତ ଅଧିକାରୀଙ୍କ ଦ୍ୱାରା ତଦନ୍ତ କରାଯାଇ ଆବଶ୍ୟକ ପଦକ୍ଷେପ ନିଆଯିବ। ଅଭିଯୋଗରେ ସତ୍ୟାସତ୍ୟ ଥିଲେ ନିର୍ମାଣ କାର୍ଯ୍ୟ ପାଇଁ ସରକାରୀ ଅର୍ଥ ପ୍ରଦାନ କରାଯିବନାହିଁ।
