ବେଙ୍ଗାଲୂରୁ,୨୫।୩ : କର୍ନାଟକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବେଙ୍ଗାଲୁରୁର ଦେବାଗେରେଠାରେ ଏକ ରୋଡ ଶୋ କରିଛନ୍ତି। ଏହି ସମୟରେ ପ୍ରଧାନମନ୍ତ୍ରୀ ବେଙ୍ଗାଲୁରୁରେ ଏକ ସାଧାରଣ ସଭାରେ ସମ୍ବୋଧିତ କରି କହିଛନ୍ତି, କଂଗ୍ରେସ ଦଳର ରାଷ୍ଟ୍ରୀୟ ଅଧ୍ୟକ୍ଷଙ୍କ କର୍ମକ୍ଷେତ୍ର ଥିବା କାଲବର୍ଗିରେ ବିଜୟ ସଙ୍କଳ୍ପ ଜାରି ରହିଛି। ମେୟର, ଡେପୁଟି ମେୟର ପଦ ଭାଜପା ହାତେଇଛି। କଂଗ୍ରେସ ଦଳର ଜାତୀୟ ଅଧ୍ୟକ୍ଷଙ୍କ ଘରେ ଭାଜପା ବିଜୟ ଶଙ୍ଖନାଦ କରିଛି। ଏହା ରାଜ୍ୟ ପାଇଁ ଏକ ପ୍ରକାର ଶୁଭ ସଙ୍କେତ। ଏହି ଫଳାଫଳ ସ୍ପଷ୍ଟ ଭାବେ ଦର୍ଶାଉଛି ଯେ କର୍ନାଟକରେ ଡବଲ ଇଞ୍ଜିନ ସରକାରଫେରିବାକୁ ଯାଇଛି।
ଗତକାଲି ମୁଁ ସୋସିଆଲ ମିଡିଆରେ କର୍ନାଟକର ଏକ ଭିଡିଓ ଦେଖିଛି। କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ଏକ ପାର୍ଟି ସଭାରେ ନିଜ ଦଳର ଜଣେ କର୍ମଚାରୀଙ୍କୁ ସର୍ବସାଧାରଣରେ ଚାପୁଡ଼ା ମାରିବାର ଆନନ୍ଦ ନେଉଥିଲେ। ଯେଉଁମାନେ ସେମାନଙ୍କର କର୍ମୀମାନଙ୍କୁ ସମ୍ମାନ ଦେଇ ପାରୁ ନାହାନ୍ତି, ସେମାନେ ଜନତା ଜନାର୍ଦ୍ଦନଙ୍କୁ କିପରି ସମ୍ମାନ କରିବେ? କର୍ନାଟକ ଭାଜପାର ପ୍ରତ୍ୟେକ କର୍ମୀ ମୋ ପାଇଁ ଜଣେ ଦୃଢ଼ ସହଯୋଗୀ ଅଟନ୍ତି। ଏଠାରେ ଥିବା ପ୍ରତ୍ୟେକ କର୍ମୀ ମୋର ସର୍ବୋତ୍ତମ ବନ୍ଧୁ, ମୋ ଭାଇ ।
କର୍ନାଟକରେ ଦୀର୍ଘ ଦିନ ଧରି ସୁବିଧାବାଦୀ ତଥା ସ୍ବାର୍ଥପର ଦଳଙ୍କର ମିଳିତ ସରକାର ଗଠନ ହୋଇଆସୁଛି। ରାଜ୍ୟର ଜନସାଧାରଣ ସର୍ବଦା ଏହିପରି ସରକାରଙ୍କ ଦ୍ୱାରା କ୍ଷତି ସହୁଛନ୍ତି। ତେଣୁ କର୍ନାଟକର ଦ୍ରୁତ ବିକାଶ ପାଇଁ ପୂର୍ଣ୍ଣ ସଂଖ୍ୟାଗରିଷ୍ଠତା ଥିବା ଏକ ସ୍ଥିର ଭାଜପା ସରକାର ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଭାଜପା ଚାହୁଁଛି ଯେ କର୍ନାଟକ ଭାରତର ବିକାଶର ଏକ ବଢୁଥିବା ଶକ୍ତି ପାଲଟିଥିବାବେଳେ କଂଗ୍ରେସ ଚାହୁଁଛି ଯେ ରାଜ୍ୟ ଏହାର ନେତାଙ୍କ ପାଇଁ ଏଟିଏମ ହେଉ।
