ନୂଆଦିଲ୍ଲୀ,୨୧।୧ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବିବିସିର ଏକ ଡକ୍ୟୁମେଣ୍ଟାରୀକୁ ସେନ୍ସର କରିଥିବାରୁ କଂଗ୍ରେସ ଶନିବାର କେନ୍ଦ୍ର ସରକାରଙ୍କୁ ସମାଲୋଚନା କରିଛି। ଦଳ ପ୍ରଶ୍ନ କରିଛି ଯେ ୨୦୦୨ ଗୁଜୁରାଟ ଦଙ୍ଗା ପରେ ତତ୍କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ମୋଦିଙ୍କୁ ରାଜଧର୍ମ ପାଳନ କରିବାକୁ କାହିଁକି ମନେ ପକାଇଥିଲେ?
ସୂଚନାନୁସାରେ, ସୂଚନା ଓ ପ୍ରସାରଣ ମନ୍ତ୍ରଣାଳୟ (ଏମଆଇବି) ଡକ୍ୟୁମେଣ୍ଟାରୀ ଇଣ୍ଡିଆ: ଦ ମୋଦି କୋଶ୍ଚିନ ସହିତ ଲିଙ୍କଶେୟାର କରୁଥିବା ଅନେକ ୟୁଟ୍ୟୁବ ଭିଡିଓ ଏବଂ ଟୁଇଟର ପୋଷ୍ଟକୁ ଅବରୋଧ କରିବାକୁ ନିର୍ଦ୍ଦେଶ ଜାରି କରିଛି। ଏହାପୂର୍ବରୁ ବହିର୍ବ୍ୟାପାର ମନ୍ତ୍ରଣାଳୟ ଡକ୍ୟୁମେଣ୍ଟାରୀକୁ ଏକ ପ୍ରଚାର ପ୍ରସାରର ଅଂଶ ବୋଲି କହିଥିଲା। ବହିର୍ବ୍ୟାପାର ମନ୍ତ୍ରଣାଳୟ କହିଛି ଯେ ଏଥିରେ ନିରପେକ୍ଷତା ଅଭାବ ରହିଛି ଏବଂ ଏକ ଔପନିବେଶିକ ମାନସିକତା ଏଥିରେ ପ୍ରତିଫଳିତ ହୋଇଛି।
ଏହା ଉପରେ ପ୍ରତିକ୍ରିୟା ପ୍ରକାଶ କରି କଂଗ୍ରେସର ମହାସଚିବ ତଥା ସଂଚାର ପ୍ରଭାରୀ ଜୟରାମ ରମେଶ ଟୁଇଟ କରିଛନ୍ତି। ସେ କହିଛନ୍ତି, ପ୍ରଧାନମନ୍ତ୍ରୀ ଏବଂ ତାଙ୍କ ସମର୍ଥକ କହିଛନ୍ତି ଯେ ବିବିସି ଡକ୍ୟୁମେଣ୍ଟାରୀ ମୋଦିଙ୍କୁ ବଦନାମ କରିବା ଲାଗି କରାଯାଇଛି। ତେଣୁ ସରକାରଙ୍କ ପକ୍ଷରୁ ସେନ୍ସରସିପ ଲାଗୁ କରାଯାଇଛି। ତେବେ କାହିଁକି ପ୍ରଧାନମନ୍ତ୍ରୀ ବାଜପେୟୀ ଚାହୁଁଛନ୍ତି ଯେ ମୋଦି ୨୦୦୨ରେ ଇସ୍ତଫା ଦିଅନ୍ତୁ। ଲାଲକୃଷ୍ଣ ଆଡଭାନୀଙ୍କ ଇସ୍ତଫା ଦେବାର ଧମକ ପରେ ଏହା ଉପରେ ବାଜପେୟୀ ଚାପ ପକାଇ ନ ଥିଲେ ବୋଲି ଜୟରାମ ରମେଶ କହିଛନ୍ତି।
କଂଗ୍ରେସର ମହାସଚିବ କେ.ସି ଭେନୁଗୋପାଲ ଶୁକ୍ରବାର ଅଭିଯୋଗ କରିଛନ୍ତି ଯେ ୨୧ ବର୍ଷ ପରେ ମଧ୍ୟ ମୋଦି ୨୦୦୨ର ସତ୍ୟତାକୁ ନେଇ ଡରି ଯାଇଛନ୍ତି।
