ଭୁବନେଶ୍ୱର,୫।୨(ସୁନିତ୍ ମିଶ୍ର): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ସମ୍ବଲପୁର ଆଇଆଇଏମ୍ର ନୂତନ ବିଲ୍ଡିଂର ଲୋକାର୍ପଣ ଉତ୍ସବରେ ଯୋଗଦେବା ସହ ରେମେଡ ପଡ଼ିଆଠାରେ ଆୟୋଜିତ ଏକ ସାଧାରଣ ସଭାରେ ଉଦ୍ବୋଧନ ଦେଇଥିଲେ। ହେଲେ ତାଙ୍କ ଓଡ଼ିଶା ଗସ୍ତ ସମୟରେ ସେ କେନ୍ଦ୍ରରେ ଉପା ସରକାର ଶାସନ କ୍ଷମତାରେ ଥିବା ସମୟରେ କ’ଣ କରିଛି ଏବଂ ଗତ ସାଢେ ୯ ବର୍ଷ ମଧ୍ୟରେ କେନ୍ଦ୍ର ଏନ୍ଡିଏ ନେତୃତ୍ୱାଧୀନ ଭାଜପା ସରକାର ଓଡ଼ିଶାକୁ କ’ଣ ଦେଇଛି ତା’ର ତୁଳନାତ୍ମକ ଚିତ୍ର ଭାଷଣ ମାଧ୍ୟମରେ ରଖିଥିଲେ। ହେଲେ ରାଜ୍ୟରେ ଶାସନ କ୍ଷମତାରେ ଥିବା ବିଜେଡି ବିରୋଧରେ ମୋଦି ତାଙ୍କ ଭାଷଣରେ ସେଭଳି କିଛି କଡ଼ା ଆଭିମୁଖ୍ୟ ନ ରଖିବା ନେଇ ବର୍ଷିଛି କଂଗ୍ରେସ। ଉଭୟ ବିଜେଡି ଏବଂ ଭାଜପା ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ ବୋଲି ପ୍ରଧାନମନ୍ତ୍ରୀ ତାଙ୍କ ଗସ୍ତ ସମୟରେ ପ୍ରମାଣ କରିଦେଇ ଗଲେ ବୋଲି କଂଗ୍ରେସ ଅଭିଯୋଗ କରିଛି। ହେଲେ ବିଜେଡି ଏବଂ ଭାଜପା ନେତା ପାଲଟା କଂଗ୍ରେସକୁ ଟାର୍ଗେଟ କରିଛନ୍ତି।
ବିଧାୟକ ସନ୍ତୋଷ ସିଂ ସାଲୁଜା କହିଛନ୍ତି ଯେ, ବିଜେଡି ଓ ଭାଜପା ଉଭୟ ଦଳ ଏକାଠି ଅଛନ୍ତି। କେବଳ ଲୋକଦେଖାଣିଆ ଭାବେ ପରସ୍ପର ବିରୋଧରେ ଦୋଷ ଲଦାଲଦି ହେଉଛନ୍ତି। ସମ୍ବଲପୁର କାର୍ଯ୍ୟକ୍ରମ ପରେ ଗୋଟିଏ କଥା ସ୍ପଷ୍ଟ ହୋଇଯାଇଛି ଯେ ଏମାନେ ଆଗକୁ ରାଜ୍ୟରେ ଆବଶ୍ୟକ ପଡ଼ିଲେ ଏକାଠି ସରକାର କରିବେ। ଜଣେ ନେତାଙ୍କୁ ଜିତାଇବା ଲାଗି ଏହି ସଭାର ଆୟୋଜନ ହେବା ଭଳି ମନେ ହେଲା ବୋଲି ସାଲୁଜା କହିଛନ୍ତି।
ୱିରୋଧୀ ଦଳ ମୁଖ୍ୟ ସଚେତକ ତଥା ଭାଜପା ନେତା ମୋହନ ମାଝୀ କହିଛନ୍ତି ଯେ, ପ୍ରଧାନମନ୍ତ୍ରୀ ଓଡ଼ିଶାକୁ ଆସି ତାଙ୍କ ସରକାର ଗତ ସାଢେ ୯ ବର୍ଷରେ କ’ଣ ବିକାଶମୂଳକ କାର୍ଯ୍ୟ କରିଛି ତା’ର ହିସାବ ଦେଇକି ଗଲେ। ଆଗକୁ ଯେଉଁ ବିକାଶମୂଳକ କାର୍ଯ୍ୟ ହେବ ସେଥିରେ ସାମିଲ ହେବାକୁ ରାଜ୍ୟବାସୀଙ୍କୁ ଆମନ୍ତ୍ରଣ କରିବା ସଙ୍ଗେ ସଙ୍ଗେ ଓଡ଼ିଶାର ସବୁ ଗରିବ ଭଉଣୀ, ଭାଇମାନଙ୍କ ନେତୃତ୍ୱ ନେବା କଥା କହିଗଲେ। ସେ ଯେତେବେଳେ ବିକାଶର କଥା କହୁଛନ୍ତି ସେ ସେହି କଥାରୁ କେହି ରାଜନୀତି କରିବା ଯଥାଚିତ୍ ନୁହେଁ। କଂଗ୍ରେସ ପ୍ରଥମେ ନିଜ ଆଭ୍ୟନ୍ତରୀଣ କଥା ବୁଝୁ ତା’ପରେ ରାଜନୀତି କରିବ ବୋଲି ମୋହନ କହିଛନ୍ତି।
ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି ଯେ, ବିଜେଡି ତା’ର ନିଜ ଏଜେଣ୍ଡାରେ ଚାଲିଛି। ଭାଜପା ନିଜ ହିସାବରେ ଚାଲିଛି। ଓଡ଼ିଶାର ବିକାଶ ବିଜେଡିର ମୁଖ୍ୟ ଲକ୍ଷ୍ୟ। ସେଇ ଲକ୍ଷ୍ୟ ନେଇ ବିଜେଡି ଚାଲିଛି। କଂଗ୍ରେସର ଏଭଳି ଅହେତୁକ ମନ୍ତବ୍ୟ ବିଜେଡି ଗତିପଥକୁ ରୋକିପାରିବ ନାହିଁ। ରାଜ୍ୟରେ ପୁଣିଥରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ସରକାର ଗଢ଼ିବ ବୋଲି ପ୍ରସନ୍ନ କହିଛନ୍ତି।
