ଭୁବନେଶ୍ବର, ୩ା୮(ବ୍ୟୁରୋ): ଦିନକୁ ଦିନ ପେଟ୍ରୋଲ, ଡିଜେଲ, ରନ୍ଧନ ଗ୍ୟାସ୍ ଏବଂ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ଅହେତୁକ ମୂଲ୍ୟବୃଦ୍ଧି ହେବାରେ ଲାଗିଛି। ବେକାରି ସମସ୍ୟା, ଅଗ୍ନିପଥ ଯୋଜନା ଏବଂ ମୁଢ଼ି, ଗୁଡ଼, ଖଇ ପ୍ରଭୃତି ଉପରେ ଜିଏସ୍ଟି ଲାଗୁ ଆଦି ବିରୋଧରେ କେନ୍ଦ୍ର ଓ ରାଜ୍ୟ ସରକାରଙ୍କ ବିଫଳତା କଥା ଲୋକଙ୍କ ପାଖରେ ପହଞ୍ଚାଯିବ। ଏହାକୁ ନେଇ ଆସନ୍ତା ୫ ତାରିଖରେ ‘ରାଜଭବନ ଘେରାଉ’ କରାଯିବ ବୋଲି ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ଶରତ ପଟ୍ଟନାୟକ କହିଛନ୍ତି।
କଂଗ୍ରେସ ଭବନଠାରେ ବୁଧବାର ଆୟୋଜିତ ଖବରଦାତା ସମ୍ମିଳନୀରେ ପିସିସି ସଭାପତି କହିଛନ୍ତି, ୨୦୧୪ ମସିହାରେ ନରେନ୍ଦ୍ର ମୋଦି ସରକାର ଭାରତବର୍ଷର ଜନସାଧାରଣଙ୍କୁ ‘ଅଚ୍ଛେଦିନ୍’ର ସ୍ବପ୍ନ ଦେଖାଇଥିଲେ। କିନ୍ତୁ ଗତ ୮ ବର୍ଷ ଭିତରେ ‘ଅଚ୍ଛେଦିନ୍’ ପରିବର୍ତ୍ତେ ଭାରତର ଜନସାଧାରଣ ଦୁର୍ବିସହ ଜୀବନ ବିତାଉଛନ୍ତି। ତରବରିଆ ଭାବେ ଜିଏସ୍ଟି ଲାଗୁକରି ଏହାଦ୍ୱାରା ଜିନିଷପତ୍ରର ଦରଦାମ ବହୁ ମାତ୍ରାରେ କମିଯିବ ବୋଲି କେନ୍ଦ୍ର ସରକାର ସ୍ବପ୍ନ ଦେଖାଇଥିଲେ। ଖାଉଟିମାନଙ୍କୁ ଏହାଦ୍ୱାରା ଲାଭ ମିଳିବ ବୋଲି କହିଥିଲେ। କିନ୍ତୁ ଶେଷରେ ଲୋକଙ୍କ ସର୍ବନିମ୍ନ ଆବଶ୍ୟକତା ଚୁଡ଼ା, ମୁଢ଼ି, ଗୁଡ଼, ଚାଉଳ, ଚୂନା, ପନିର, ଅଟା, ପେନ୍ସିଲ, କଟର, ଖାତା ଇତ୍ୟାଦି ଉପରେ ମଧ୍ୟ ୫% ଜିଏସ୍ଟି ଲଗାଇବାକୁ ଭୁଲିଲେ ନାହିଁ। ଏହିସବୁ ପ୍ରସଙ୍ଗରେ କଂଗ୍ରେସ ରାଜଭବନ ଘେରାଉ କରିବ। ସେହିଭଳି ଜିଲାସ୍ତରରେ ଜିଲାପାଳଙ୍କ ଅଫିସ ବା ଅତିରିକ୍ତ ଜିଲାପାଳଙ୍କ ଅଫିସକୁ ଘେରାଉ କରାଯିବ ବୋଲି ପିସିସି ସଭାପତି କହିଛନ୍ତି।
