ବରଗଡ଼,୧୧।୮(ପ୍ରେମାନନ୍ଦ ଖମାରୀ): ବରଗଡ଼ ଜିଲା ପଦ୍ମପୁର ଉପଖଣ୍ଡ ଗାଇସିଲେଟ ବ୍ଳକ ଅନ୍ତର୍ଗତ ଫିରିଙ୍ଗିମାଳ ଗ୍ରାମରେ ସୋମବାର ନାବାଳିକାଙ୍କ ଆତ୍ମାହୁତି ଘଟଣାକୁ ନେଇ କଂଗ୍ରେସ ଆନ୍ଦୋଳନକୁ ଓହ୍ଲାଇଛି। ମୃତ ନାବାଳିକାଙ୍କ ପରିବାର ଲୋକଙ୍କୁ 20ଲକ୍ଷ ଟଙ୍କା କ୍ଷତିପୂରଣ, ଦାଦନ ଖଟିବାକୁ ଯାଇଥିବା ମୃତ ନାବାଳିକାଙ୍କ ବାପାଙ୍କୁ ଘରକୁ ଫେରାଇ ଆଣି କାମ ଯୋଗାଇ ଦେବା ଏବଂ ଘଟଣାର ଉଚ୍ଚସ୍ତରୀୟ ତଦନ୍ତ ପାଇଁ କଂଗ୍ରେସ ଦାବି କରିଛି। ବୁର୍ଲାରୁ ଗ୍ରାମକୁ ମୃତ ନାବାଳିକାଙ୍କ ଶବ ପହଞ୍ଚିବା ପରେ ଉପରୋକ୍ତ ଦାବି ନେଇ କଂଗ୍ରେସ କାଯର୍ୟକର୍ତ୍ତାମାନେ ଶବକୁ ଗାଡ଼ିରୁ ଓହ୍ଲାଇ ଦେଇ ନଥିଲେ। ଉପରୋକ୍ତ ଦାବି ପୂରଣ ନ ହେବା ପଯର୍ୟନ୍ତ ଶବକୁ ଗାଡ଼ିରୁ ନ ଓହ୍ଲାଇବା ପାଇଁ ଅଡ଼ି ବସିବା ସହିତ ପୋଲିସ, ପ୍ରଶାସନିକ ଅଧିକାରୀଙ୍କ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ତେବେ ରେଡ଼କ୍ରସ ଏବଂ ଅନ୍ୟ ପାଣ୍ଠିରୁ ତତ୍କାଳ ୫୦ହଜାର ଟଙ୍କା ସହାୟତା ପ୍ରଦାନ କରାଯାଇଥିଲା ଏବଂ ୨୦ ଲକ୍ଷ ଟଙ୍କା ସହାୟତା ଦାବି ନେଇ ରା୍ଯଯ ସରକାରଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ଉପସ୍ଥିତ ଅଧିକାରୀମାନେ କହିଥିଲେ। ଏହାପରେ ଗାଡ଼ିରୁ ଶବ ଓହ୍ଲାଇଥିଲେ। ପୂର୍ବତନ ବିଧାୟକ ସନ୍ତୋଷ ସିଂ ସାଲୁଜାଙ୍କ ସମେତ କଂଗ୍ରେସ ନେତା ପାଣ୍ଡବ କର୍ଣ୍ଣ, ଅଭିଷେକ ସେଠ, ଟଙ୍କଧର ସାହୁ, ଆନନ୍ଦ ପ୍ରଧାନଙ୍କ ସମେତ ଅନେକ ଦଳୀୟ କାଯର୍ୟକର୍ତ୍ତା, କର୍ମୀ ସାମିଲ ଥିଲେ। ଉପରୋକ୍ତ କଂଗ୍ରେସ ନେତୃବୃନ୍ଦ ଭୀମସାର୍, ବୁର୍ଲାକୁ ମଧ୍ୟ ଯାଇଥିଲେ ଏବଂ ସେଠାରୁ ଶବ ଗ୍ରାମକୁ ଅଣାଯିବାବେଳେ ସାଥିରେ ଫିରିଙ୍ଗିମାଳ ଗ୍ରାମକୁ ପହଞ୍ଚିଥିଲେ।
