ବେଙ୍ଗାଲୁରୁ,୨୮।୩ : ଚଳିତ ବର୍ଷ କର୍ନାଟକରେ ବିଧାନସଭା ନିର୍ବାଚନ ହେବ। ଏହାପୂର୍ବରୁ ସମସ୍ତ ରାଜନୈତିକ ଦଳ ରାଜ୍ୟର ଭୋଟରଙ୍କୁ ହାତେଇବା ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ଅପରପକ୍ଷରେ ରାଜ୍ୟ ମୁଖ୍ୟମନ୍ତ୍ରୀ ବାସଭାରାଜ ବୋମ୍ମାଇ ମଙ୍ଗଳବାର କଂଗ୍ରେସ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସେ କର୍ନାଟକ କଂଗ୍ରେସ ମୁଖ୍ୟ ଡି.କେ ଶିବକୁମାରଙ୍କ ବିରୋଧରେ ସେ ଗୁରୁତର ଅଭିଯୋଗ ଆଣିଛନ୍ତି। ଭାଜପା ବିଧାୟକମାନଙ୍କୁ ଶିବକୁମାର ଟିକଟର ପ୍ରଲୋଭନ ଦେଖାଉଥିବା ଅଭିଯୋଗ ସେ କରିଛନ୍ତି। ଯେଉଁଠାରେ କଂଗ୍ରେସ ଦଳ ପକ୍ଷରୁ ବିଧାନସଭା ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରାଯାଇ ନାହିଁ ସେହି ନିର୍ବାଚନମଣ୍ଡଳୀରେ ଭାଜପା ବିଧାୟକଙ୍କୁ ଟିକଟ ଦେବାକୁ ଶିବକୁମାର ଉଦ୍ୟମ କରୁଥିବା ସେ ଅଭିଯୋଗ କରିଛନ୍ତି।
ଭାଜପା ପ୍ରାର୍ଥୀଙ୍କ ତାଲିକା ସମ୍ପର୍କରେ ଏକ ବଡ଼ ଘୋଷଣା ମଧ୍ୟ ସେ କରିଛନ୍ତି। ରାଜ୍ୟ ବିଧାନସଭା ନିର୍ବାଚନ ପ୍ରସଙ୍ଗରେ ଏପ୍ରିଲ ପ୍ରଥମ ସପ୍ତାହରେ ଭାଜପା ପ୍ରଥମ ପ୍ରାର୍ଥୀ ତାଲିକା ଘୋଷଣା କରିବ।
ଖବରଦାତାଙ୍କ ସହ କଥାବାର୍ତ୍ତା କରି ବୋମ୍ମାଇ କହିଛନ୍ତି, ଶିବକୁମାର ଗତ ଦୁଇ ତିନି ଦିନ ଧରି ଆମ ବିଧାୟକମାନଙ୍କୁ ପ୍ରଲୋଭନ ଦେଖାଉଛନ୍ତି। ୧୦୦ ଟି ନିର୍ବାଚନମଣ୍ଡଳୀରେ ଟିକଟ ଦେବାକୁ କଂଗ୍ରେସ ପଦାଧିକାରୀମାନେ ଆମ ବିଧାୟକମାନଙ୍କୁ ଡାକୁଛନ୍ତି। ଯଦି ଭାଜପା ବିଧାୟକମାନେ କଂଗ୍ରେସରେ ଯୋଗ ଦିଅନ୍ତି ତେବେ ସେମାନଙ୍କୁ କଂଗ୍ରେସ ପକ୍ଷରୁ ପ୍ରାର୍ଥୀ ଦିଆଯାଇ ନ ଥିବା ନିର୍ବାଚନମଣ୍ଡଳୀରୁ ଟିକଟ ଦିଆଯିବ।
ଉଲ୍ଲେଖନୀୟ କଥା ହେଉଛି, କର୍ନାଟକରେ ସମୁଦାୟ ୨୨୪ ବିଧାନସଭା ନିର୍ବାଚନମଣ୍ଡଳୀ ଅଛି । ମାର୍ଚ୍ଚ ୨୫ ରେ କଂଗ୍ରେସ ବିଧାନସଭା ନିର୍ବାଚନ ପାଇଁ ୧୨୪ ଜଣ ପ୍ରାର୍ଥୀଙ୍କ ପ୍ରଥମ ତାଲିକା ଘୋଷଣା କରିଥିଲା। ବାକି ୧୦୦ଟି ସିଟ ପାଇଁ ପ୍ରାର୍ଥୀ ତାଲିକା ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ। ଭାଜପା ଏପର୍ଯ୍ୟନ୍ତ ନିଜ ପ୍ରାର୍ଥୀଙ୍କ ତାଲିକା ପ୍ରକାଶ କରିନାହିଁ। ଉଭୟ କଂଗ୍ରେସ ଏବଂ ଭାଜପା ରାଜ୍ୟରେ ୧୫୦ ଆସନ ଜିତିବାର ଲକ୍ଷ୍ୟ ରଖିଛନ୍ତି।
