ନୂଆଦିଲ୍ଲୀ, ୭।୯: ଉତ୍ତରପ୍ରଦେଶରେ ୨୦୨୨ରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଏହାକୁ ଦୃଷ୍ଟିରେ ରଖି କଂଗ୍ରେସ ହାଇକମାଣ୍ଡ ଦଳକୁ ସାଂଗଠନିକସ୍ତରରେ ସୁଦୃଢ଼ କରିବା ଲାଗି ୭ଟି କମିଟି ଗଠନ କରିଛନ୍ତି। କମିଟିରେ ଦଳର ଯୁବ ଏବଂ ବରିଷ୍ଠ ସଦସ୍ୟଙ୍କୁ ସ୍ଥାନ ଦିଆଯାଇଛି। କମିଟିରେ ଉତ୍ତରପ୍ରଦେଶର ବ୍ରାହ୍ମଣ ନେତା ଜିତିନ ପ୍ରସାଦ, ପୂର୍ବତନ ପ୍ରଦେଶ ଅଧ୍ୟକ୍ଷ ରାଜ ବବରଙ୍କୁ ଅଣଦେଖା କରାଯାଇଛି। ସେହିପରି ପୂର୍ବ କେନ୍ଦ୍ର ମନ୍ତ୍ରୀ ଆର୍.ପି. ସିଂଙ୍କୁ ମଧ୍ୟ ଏସବୁ କମିଟିରେ ସ୍ଥାନ ମିଳିନାହିଁ। ବରିଷ୍ଠ ନେତା ପ୍ରମୋଦ ତିଓ୍ବାରୀ, ସଲମାନ ଖୁର୍ସୀଦ୍ ଏବଂ ପି.ଏଲ୍. ପୁନିଆଙ୍କୁ ମଧ୍ୟ ସ୍ଥାନ ମିଳିନାହିଁ। କଂଗ୍ରେସ ସାଂଗଠନିକ ମହାସଚିବ କେ.ସି.ବେଣୁଗୋପାଳଙ୍କ ପକ୍ଷରୁ ଏନେଇ ଘୋଷଣା କରାଯାଇଛି। ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଅନୁମତି କ୍ରମେ ରାଜ୍ୟରେ ଘୋଷଣାପତ୍ର କମିଟି, ସଦସ୍ୟତା କମିଟି, କାର୍ଯ୍ୟକ୍ରମ କ୍ରିୟାନ୍ବୟ କମିଟି, ପ୍ରଶିକ୍ଷଣ ଏବଂ କ୍ୟାଡ଼ର ବିକାଶ କମିଟି, ପଞ୍ଚାୟତି ରାଜ ନିର୍ବାଚନ କମିଟି ଏବଂ ମେଡ଼ିଆ ତଥା ସଞ୍ଚାର ପରାମର୍ଶ କମିଟି ଗଠନ କରାଯାଇଥିବା ସେ ସୂଚନା ଦେଇଛନ୍ତି। କମିଟିରେ ପୁରୁଣା ନେତାଙ୍କୁ ସନ୍ତୁଷ୍ଟ କରିବାର ପ୍ରୟାସ କରାଯାଇଥିବା ଅଭିଯୋଗ ହୋଇଛି। ସୋନିଆଙ୍କ ପାଖକୁ ଚିଠି ଲେଖିଥିବା ୨୩ ଜଣ ସଦସ୍ୟଙ୍କ ମଧ୍ୟରେ ଜିତିନ ପ୍ରସାଦ ଏବଂ ରାଜ ବବରଙ୍କ ନାମ ରହିଥିଲା। ଗୁଲାମ ନବୀ ଆଜାଦ୍ଙ୍କର ଏଭଳି କାର୍ଯ୍ୟ ପାଇଁ ତାଙ୍କ ଉପରେ କାର୍ଯ୍ୟାନୁଷ୍ଠାନ ଦାବି କରିଥିବା ନେତାଙ୍କୁ କମିଟିରେ ସ୍ଥାନ ମିଳିଥିବା କୁହାଯାଉଛି। କମିଟି ଗଠନରେ କଂଗ୍ରେସ ପୁଣି ଚାଟୁକାର ଗୋଷ୍ଠୀଙ୍କୁ ସ୍ଥାନ ଦେଇଥିବା ନେଇ ଚର୍ଚ୍ଚା ହେଉଛି।
