ନୂଆଦିଲ୍ଲୀ,୨୪।୫: ଆସନ୍ତା ୨୦୨୪ ଲୋକ ସଭା ନିର୍ବାଚନ ପାଇଁ କଂଗ୍ରେସ ଏବେଠାରୁ ନିଜର ରଣନୀତି ପ୍ରସ୍ତୁତ କରିବାକୁ ଲାଗିପଡ଼ିଲାଣି। ମଙ୍ଗଳବାର ଦଳର ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀ କଂଗ୍ରେସରେ ଆଠ ଜଣିଆ ସଦସ୍ୟ ବିଶିଷ୍ଟ ରାଜନୈତିକ ବ୍ୟାପାର କମିଟି ଏବଂ ୨୦୨୪ ଲୋକ ସଭା ନିର୍ବାଚନ ପାଇଁ ଏକ ଟାସ୍କ ଫୋର୍ସ ଗଠନ କରିଛନ୍ତି। ତେବେ କଂଗ୍ରେସର ରାଜନୈତିକ ବ୍ୟାପାର କମିଟିରେ ରାହୁଲ ଗାନ୍ଧୀ, ମଲ୍ଲିକାର୍ଜୁନ ଖର୍ଗେ, ଗୁଲାମ ନବୀ ଆଜାଦ, ଅମ୍ବିକା ସୋନି, ଦିଗ୍ବିଜୟ ସିଂ, ଆନନ୍ଦ ଶର୍ମା, କେସି ବେଣୁଗୋପାଲ, ଜିତେନ୍ଦ୍ର ସିଂ ରହିବେ। ସେହିପରି ପି.ଚିଦାମ୍ବରମ, ମୁକୁଲ ୱାସନିକ, ଜୟରାମ ରମେଶ, କେସି ବେଣୁଗୋପାଲ, ଅଜୟ ମାକେନ, ପ୍ରିୟଙ୍କା ଗାନ୍ଧୀ, ରଣଦୀପ ସୁର୍ଜେୱାଲା, ସୁନୀଲ କାନୁଗୋଲୁଙ୍କ ନାମ ୨୦୨୪ ନିର୍ବାଚନ ପାଇଁ ଗଠନ ହୋଇଥିବା ଟାସ୍କ ଫୋର୍ସରେ ସାମିଲ ରହିଛି। କଂଗ୍ରେସ ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀ ରାଜନୈତିକ ବ୍ୟାପାର କମିଟିର ଅଧ୍ୟକ୍ଷତା କରିବେ। ଅନ୍ୟପଟେ ଲୋକ ସଭା ନିର୍ବାଚନ ପାଇଁ ଗଠିତ ଟାସ୍କ ଫୋର୍ସରେ ଜଡ଼ିତ ନେତାମାନଙ୍କୁ ବିଭିନ୍ନ ସଂଗଠନ, ଗଣମାଧ୍ୟମ, ଅର୍ଥ, ନିର୍ବାଚନ ପରିଚାଳନାର ଦାୟିତ୍ୱ ଦିଆଯିବ। ସୂଚନାଯୋଗ୍ୟ, ଉଭୟ ଗୁରୁତ୍ୱପୂର୍ଣ୍ଣ କମିଟିରେ ଗୁଲାମ ନବୀ ଆଜାଦ, ଆନନ୍ଦ ଶର୍ମା, ମୁକୁଲ ୱାସନିକଙ୍କ ଭଳି ଅସନ୍ତୁଷ୍ଟ ନେତାଙ୍କୁ ସ୍ଥାନ ଦିଆଯାଇଥିବା ବେଳେ ଅନ୍ୟପଟେ ପ୍ରଶାନ୍ତ କିଶୋରଙ୍କ ସ୍ଥାନରେ ନିର୍ବାଚନ ରଣନୀତିଜ୍ଞ ସୁନୀଲ କାନୁଗୋଲୁଙ୍କୁ ସାମିଲ କରାଯାଇଛି। ଯଏ କନର୍ର୍ାଟକ ଏବଂ ତେଲେଙ୍ଗାନାରେ କଂଗ୍ରେସ ପାଇଁ କାର୍ଯ୍ୟ କରୁଛନ୍ତି। ଅକ୍ଟୋବର ୨ରୁ ଆରମ୍ଭ ହେବାକୁ ଯାଉଥିବା ‘ଭାରତ ଯୋଡୋ’ ଯାତ୍ରାର ପ୍ରସ୍ତୁତି ପାଇଁ ଏକ କମିଟି ଗଠନ କରାଯାଇଛି। ଯେଉଁଥିରେ ଦିଗ୍ବିଜୟ ସିଂ, ସଚିନ ପାଇଲଟ, ଶଶି ଥରୁର, ରବନୀତ ବିଟ୍ଟୁ, କେ.ଜେ ଜର୍ଜ, ଯୋଥି ମଣିଙ୍କ ଭଳି ଅନେକ ନେତା ରହିଛନ୍ତି।
