ଭଦ୍ରକ ଅଫିସ,୩ା୪: ଜଣେ ଯୁବତୀଙ୍କୁ ପ୍ରେମ ଜାଲରେ ଫସାଇ ବିବାହ ପ୍ରଲୋଭନ ଦେଖାଇ ଦୁଇବର୍ଷ ଧରି ଶାରୀରିକ ସମ୍ପର୍କ ରଖିଥିବା ଅଭିଯୋଗରେ ଜଣେ ଏସ୍ଆଇଙ୍କୁ ଭଦ୍ରକ ଟାଉନ ପୋଲିସ ଗିରଫ ପରେ ରବିବାର କୋର୍ଟଚାଲାଣ କରିଛି। ଅଭିଯୁକ୍ତ ହେଲେ ଚୂଡ଼ାମଣି ମେରାଇନ ଥାନାର ଏସ୍ଆଇ ତପସ୍ବିନୀ ମହାପାତ୍ର। ତେବେ ଅଭିଯୁକ୍ତ ଏସ୍ଆଇ ଜଣେ ପୁରୁଷ ହୋଇ ମହିଳା ଭାବେ ସତ୍ୟପାଠ କରି ଚାକିରି କରିଥିବା ପୀଡ଼ିତା ଅଭିଯୋଗ କରିଛନ୍ତି। ଏପରିକି ଅଭିଯୁକ୍ତ ଏସ୍ଆଇ ପୂର୍ବରୁ ବିବାହ କରିଥିବା ଓ ତାଙ୍କ ସ୍ତ୍ରୀ ଯାଜପୁର ଜିଲାର ଏକ ଥାନାରେ ଏସ୍ଆଇ ଥିବା ଅଭିଯୋଗରେ ଦର୍ଶାଯାଇଛି। ଅନ୍ୟପକ୍ଷେ ଅଭିଯୁକ୍ତ ଏସ୍ଆଇ ଜଣେ ମହିଳା ହୋଇଥିବା ସିଟି ଡିଏସ୍ପି ଅଂଶୁମାନ ଦ୍ୱିବେଦୀ କହିଛନ୍ତି। ଏହାକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି।
ଭଦ୍ରକ ଅଞ୍ଚଳର ଉକ୍ତ ଯୁବତୀ ଟାଉନ ଥାନାରେ ଅଭିଯୋଗ କରିଛନ୍ତି ଯେ, ଏସ୍ଆଇ ମହାପାତ୍ର ପୂର୍ବରୁ ପୁରୁଣାବଜାର ଥାନାରେ ଥିବାବେଳେ ତାଙ୍କ ସହ ପ୍ରେମ ସମ୍ପର୍କ ଗଢ଼ିଉଠିଥିଲା। ତାଙ୍କୁ ବିବାହ କରିବା ପାଇଁ ସେ ପ୍ରଲୋଭନ ଦେଖାଇଥିଲେ। ଏପରିକି ୨୦୨୧ ନଭେମ୍ବର ୨୩ରେ ପୁରୀ ଜଗନ୍ନାଥ ମନ୍ଦିରରେ ତାଙ୍କୁ ସିନ୍ଦୂର ପିନ୍ଧାଇ ବିବାହ କରିଥିଲେ। ବାସୁଦେବପୁର ଓ ପୁରୁଣାବଜାର ଭଡ଼ାଘରେ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଏସ୍ଆଇ ମହାପାତ୍ର ପୂର୍ବରୁ ବିବାହ କରିଥିବା ଜାଣିବା ପରେ ଗତ ୩୧ ତାରିଖରେ ଭଦ୍ରକ ନୂଆବଜାରସ୍ଥିତ ଭଡ଼ାଘରକୁ ଯାଇ ଏ ବିଷୟରେ ପଚାରିବାରୁ ତାଙ୍କୁ ମାଡ଼ ମାରିବା ସହ ହତ୍ୟା ଧମକ ଦେଇଥିଲେ। ଏନେଇ ଟାଉନ ଥାନାରେ ଏକ ମାମଲା (ନଂ.୧୯୧/୨୩) ରୁଜୁ ହୋଇଛି। ତେବେ ଅଭିଯୋଗର ସତ୍ୟତା ନେଇ ତଦନ୍ତ ଚାଲିଥିବା ସିଟି ଡିଏସ୍ପି ଦ୍ୱିବେଦୀ କହିଛନ୍ତି।
