ଦାରିଙ୍ଗବାଡି, ୧।୧୦(ଅରୁଣ ସାହୁ):ଦିନ ଥିଲା ଦାରିଙ୍ଗବାଡିଠାରୁ ସିର୍କାବର୍ଗକୁ ସବୁଦିନିଆ ଭଲ ରାସ୍ତା ଟିଏ ନ ଥିଲା। ସିର୍କାବର୍ଗ ବାସିନ୍ଦା ଦାରିଙ୍ଗବାଡି ବ୍ଲକ ହେଡକ୍ୱାଟର ଆସିବାକୁ ହେଲେ ୩୦ କିଲୋମିଟର ରାସ୍ତା ପାଦରେ ଚାଲି ଚାଲି ଯାତାୟାତ କରୁଥିଲେ। ନିଜ ଜମିରୁ ଅମଳ ହଳଦୀ, କାନ୍ଦୁଲ, ସୋରିଷ, ତିଳା ଫସଲକୁ ବଳଦ ପିଠିରେ ଆଣି ଦାରିଙ୍ଗବାଡିରେ ବିକ୍ରି କରୁଥିଲେ। ଏହାର ସମାଧାନ କରିବା ପାଇଁ ସରକାର ଦାରିଙ୍ଗବାଡି ଠାରୁ ସିର୍କାବର୍ଗକୁ ସଂଯୋଗ କରିବା ପାଇଁ ପ୍ରଧାନମନ୍ତ୍ରୀ ସଡ଼କ ଯୋଜନାରେ ପକ୍କା ରାସ୍ତା ନିର୍ମାଣ କରିଥିଲେ। ହେଲେ ରାସ୍ତା କାର୍ଯ୍ୟ କରିଥିବା ଠିକା ସଂସ୍ଥା ଆଉ ଚୁକ୍ତି ଅନୁସାରେ ରକ୍ଷଣବେକ୍ଷଣ କରୁନାହାନ୍ତି। ଫଳରେ ରାସ୍ତାର ଅବସ୍ଥା ଶୋଚନୀୟ ହୋଇପଡିଛି। ଏବେ ବଡ଼ ବଡ଼ ଖାଲ ଖମା ସୃଷ୍ଟି ହୋଇଛି। ଫଳରେ ଉକ୍ତ ରାସ୍ତାରେ ଯାତାୟାତ ସମ୍ଭବ ହେଉନାହିଁ।
ସରକାରଙ୍କ ପକ୍ଷରୁ ଦାରିଙ୍ଗବାଡିରୁ ଦନେକବାଡି ଦେଇ ସିର୍କାବର୍ଗକୁ ଲଷ୍ମୀ ବସ ଯାଉଛି। କିନ୍ତୁ ଘାଟି ପାହାଡ଼ ରାସ୍ତାରେ ଯାତାୟାତ କରୁଥିବାବେଳେ ରାସ୍ତାର ଦୂରାବସ୍ଥା ଯୋଗୁ ବସ ଯାତାୟାତରେ ବିପଦ ସୃଷ୍ଟି ହୋଇଛି। ଅଞ୍ଚଳବାସୀ ଜିଲାପାଳଙ୍କ ସମେତ ଗ୍ରାମ୍ୟ ଉନ୍ନୟନ ବିଭାଗକୁ ବାରମ୍ବାର ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଅଭିଯୋଗ ହୋଇଛି। ଏନେଇ ବିଭାଗର କନିଷ୍ଠ ସଞ୍ଜୟ କୁମାର ବେହେରା କହିଛନ୍ତି ଯେ, ଠିକାଦାରଙ୍କ ଚୁକ୍ତିନାମା ଅନୁସାରେ ରାସ୍ତା ମରାମତି ସହ ରକ୍ଷଣବେକ୍ଷଣ କରିବା କଥା। କିନ୍ତୁ ସେ କରୁନାହିଁ ଏନେଇ ବାରମ୍ବାର ଠିକା ସଂସ୍ଥାକୁ ଅବଗତ କରାଯିବା ସହ କାର୍ଯ୍ୟାନୁଷ୍ଠାନ ପାଇଁ ଚିଠି କରାଯାଇଥିବା ସେ କହିଛନ୍ତି। ତାଙ୍କ ଚୁକ୍ତିନାମା ତାରିଖ ସରିବା ପରେ ଅଟକଳ କରାଯାଇ ବିଭାଗ ଉକ୍ତ ରାସ୍ତାକୁ ମରାମତି କରାଯିବ ବୋଲି ସେ କହିଛନ୍ତି।
