ଭଞ୍ଜନଗର,୯।୨(ବାବୁଲା ପ୍ରଧାନ )-ରାଜ୍ୟର କେତେକ ବନଖଣ୍ଡରେ ବର୍ତ୍ତମାନ ଜଙ୍ଗଲ ନିଆଁ ଲାଗିଲାଣି। ଆଗକୁ ଅନ୍ୟ ବନଖଣ୍ଡ ଗୁଡ଼ିକରେ ମଧ୍ୟ ନିଆଁ ଲାଗିବା ସମ୍ଭାବନା ରହିଛି। ଏହାପୂର୍ବରୁ ରାଜ୍ୟ ସରକାରଙ୍କ ଜଙ୍ଗଲ ବିଭାଗ ପକ୍ଷରୁ ବର୍ତ୍ତମାନଧ୍ଠାରୁ ବିଭିନ୍ନ ପ୍ରକାର ଆଗୁଆ ପଦକ୍ଷେପ ନିଆଯାଇଛି। ଏହିଭଳି ଗଞ୍ଜାମ ଜିଲା ଘୁମୁସର ଉତ୍ତର ବନଖଣ୍ଡରେ ମଧ୍ୟ ଜଙ୍ଗଲ ନିଆଁ ଯେଭଳି ନ ଲାଗିବ ସେଥିପାଇଁ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି । ମଙ୍ଗଳବାର ଏନେଇ ଏକ ପ୍ରସ୍ତୁତି ବୈଠକ ଲାଲସିଂ ନର୍ସରୀ ପରିସରରେ ଅନୁଷ୍ଠିତ ହେବ। ବୈଠକରେ ସାମାଜିକ କର୍ମୀ, ବନ ବିଭାଗ କର୍ମଚାରୀ, ବନ ସୁରକ୍ଷା ସମିତି କର୍ମକର୍ତ୍ତା, ସ୍ବେଚ୍ଛାସେବୀ ସଂଗଠନ ପ୍ରମୁଖ ଯୋଗଦେଇ ନିଜ ନିଜର ମତ ରଖିବେ। ଡିଏଫଓ ହିମାଂଶୁ ଶେଖର ମହାନ୍ତି ବୈଠକରେ ଅଧ୍ୟକ୍ଷତା କରିବା କାର୍ଯ୍ୟକ୍ରମ ରହିଛି।
ଜଙ୍ଗଲ ନିଆଁ ସାଧାରଣତଃ ଜାନୁଆରୀ ମାସରୁ ଜୁନ ମାସ ମଧ୍ୟରେ ଲାଗେ। ଜୁନ ଜୁଲାଇ ମାସରେ ବର୍ଷା ଆସିବା ପରେ ନିଆଁ ପ୍ରାୟ ନିୟନ୍ତ୍ରଣକୁ ଆସିଥାଏ। ଗତ ବର୍ଷ ଏହି ସମୟ ମଧ୍ୟରେ ଘୁମୁସର ଉତ୍ତର ବନଖଣ୍ଡରେ ପ୍ରାୟ ୩୦୦ ସ୍ଥାନରେ ନିଆଁ ଲାଗିଥିଲା। ଏହିଭଳି ରାଜ୍ୟର ବିଭିନ୍ନ ବନଖଣ୍ଡରେ ଗତ ବର୍ଷ ଜାନୁଆରୀରୁ ଜୁନ ମଧ୍ୟରେ ଜଙ୍ଗଲ ଅଗ୍ନିକାଣ୍ଡ ଋତୁରେ ପ୍ରାୟ ୪,୬୦୦ ହେକ୍ଟର ଅଞ୍ଚଳ ପୋଡ଼ି ଯାଇଥିଲା । ଏହାଦ୍ବାରା ବହୁ ବନ୍ୟପ୍ରାଣୀ ବାସସ୍ଥାନ ଏବଂ ପାର୍ଶ୍ୱବର୍ତ୍ତୀ ଅଞ୍ଚଳଗୁଡ଼ିକୁ ପ୍ରଭାବିତ କରିଥିଲା। ଗତ ଜଙ୍ଗଲ ନିଆଁ ଋତୁରେ ମୋଟ ୨୯,୭୦୯ ଜଙ୍ଗଲ ଅଗ୍ନି ବିନ୍ଦୁ ସାଟେଲାଇଟ ତଥ୍ୟରୁ ଆସିଥିଲା। ସେଥିମଧ୍ୟରୁ ୨୦,୮୩୯ ଜଙ୍ଗଲ ସୀମା ଭିତରେ ଏବଂ ୮,୮୭୦ ଜଙ୍ଗଲ ସୀମା ବାହାରେ ଚିହ୍ନଟ ହୋଇଥିଲା।
କିନ୍ତୁ ୨୦୨୪ ଜଙ୍ଗଲ ଅଗ୍ନି ଋତୁରେ ଜଙ୍ଗଲ ସୀମା ଭିତରେ ୧୭,୦୧୪ ଏବଂ ବାହାରେ ୫,୮୫୪ ଜଙ୍ଗଲ ଅଗ୍ନିକାଣ୍ଡ ସମେତ ୨୨,୮୬୮ ଜଙ୍ଗଲ ଅଗ୍ନିକାଣ୍ଡ ହୋଇଥିଲା । ୨୦୨୪ ତୁଳନାରେ ୨୦୨୫ ରେ ଅଧିକ ନିଆ ଁ ଲାଗିଥିଲା। ୨୧ ଟି ବନଖଣ୍ଡରେ ଅଧିକ ନିଆଁ ଲାଗିଥିଲା। ସେଥିମଧ୍ୟରୁ କନ୍ଧମାଳ ଜିଲା ଅନ୍ୟତମ। ଗତବର୍ଷ ବନ ବିଭାଗ ପ୍ରାୟ ୯୯.୯୫ ପ୍ରତିଶତ ଜଙ୍ଗଲ ନିଆଁର ମୁକାବିଲା କରିଥିଲା । ଯାହାକି ଗତ ଚାରି ବର୍ଷ ମଧ୍ୟରେ ଏହା ସର୍ବାଧିକ ମୁକାବିଲା ।
ଚଳିତ ବର୍ଷ ରାଜ୍ୟରେ ଥଣ୍ଡା ଯେମିତି ହୋଇଛି ଗରମ ମଧ୍ୟ ଆଗାମୀ ଦିନରେ ହେବାର ସମ୍ଭାବନା ରହିଛି। ତାପମାତ୍ରା ବଢ଼ିଲେ ଜଙ୍ଗଲ ପୋଡ଼ି ମଧ୍ୟ ବଢିବା ସମ୍ଭାବନା ରହିଛି। ଏଥିସହ ଲୋକଙ୍କ ମଧ୍ୟରେ ସଚେତନତା ଅଭାବ ଯୋଗୁ ମଧ୍ୟ ଜଙ୍ଗଲ ପୋଡି ବଢୁଛି। ତେଣୁ ଏହାକୁ ଚଳିତ ବର୍ଷ ସଫଳତାର ସହ ମୁକାବିଲା କରିବା ପାଇଁ ଘୁମୁସର ଉତ୍ତର ବନଖଣ୍ଡ କର୍ମଚାରୀ ମାନେ ମିଳିତ ଭାବେ ପ୍ରସ୍ତୁତ ହେଉଛନ୍ତି। ସଚେତନତା କାର୍ଯ୍ୟକ୍ରମ ପୂର୍ବ ବର୍ଷ ଅପେକ୍ଷା ଅଧିକ କରିବା ଲକ୍ଷ୍ୟ ରଖାଯାଇଛି। ଏଥିସହ ବୈଷୟିକ ଜ୍ଞାନ କୌଶଳ ମଧ୍ୟ ପ୍ରୟୋଗ ହେବ।
Dharitri – Odisha’s No.1 Odia Daily
