ଆନନ୍ଦପୁର,୧୫ା୪(ସ୍ବ.ପ୍ର.): ଆନନ୍ଦପୁର ଉପଖଣ୍ଡକୁ ସ୍ବତନ୍ତ୍ର ଜିଲା ମାନ୍ୟତା ଦାବିରେ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଚାଲିଥିବା ଧାରଣା ୨୦ ଦିନରେ ପହଞ୍ଚିଛି। ଆନନ୍ଦପୁର ବିକାଶ ପରିଷଦର ଆହ୍ବାନରେ ମାର୍ଚ୍ଚ ୨୭ରୁ ଜିଲା ଦାବି ପ୍ରସଙ୍ଗକୁ ନେଇ ଧାରଣା ଆରମ୍ଭ ହୋଇଥିଲା। ଏହି ଧାରଣାରେ ପର୍ଯ୍ୟାୟ କ୍ରମେ ବିଭିନ୍ନ ସଂଗଠନ ସାମିଲ ହୋଇ ଆନନ୍ଦପୁରକୁ ଜିଲା ଦାବି କରିଥିଲେ। ଶନିବାର ଅନୁଷ୍ଠିତ ଧାରଣାର ୨୦ ଦିନରେ ଆନନ୍ଦପୁର ମହୋରିର ସଂଘ ସାମିଲ ହୋଇ ଜିଲା ଦାବି କରିବା ସହିତ ଆନନ୍ଦପୁର ଉପଜିଲାପାଳଙ୍କ କାର୍ଯ୍ୟାଳୟରେ ମୁଖ୍ୟମନ୍ତ୍ରୀ ଓ ମୁଖ୍ୟ ଶାସନ ସଚିବଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି। ଆନନ୍ଦପୁରର ଭୌଗୋଳିକ ସ୍ଥିତି, ଜନସଂଖ୍ୟା, କେନ୍ଦୁଝର ଜିଲା ସହିତ ଭାଷାଗତ ବିଭେଦତା, ଜିଲା ପ୍ରଶାସନର ଦୃଷ୍ଟି ଆଢୁଆଳରେ ରହିଆସିଥିବା ଆନନ୍ଦପୁରର ବିକାଶ ଧାରାକୁ ଶିଖରରେ ପହଞ୍ଚାଇବା ଲକ୍ଷ ରଖାଯାଇ ସ୍ବତନ୍ତ୍ର ଜିଲା ଦାବି ପ୍ରସଙ୍ଗ ଉପସ୍ଥାପନ କରାଯାଇଛି। ଦୀର୍ଘବର୍ଷରୁ ଅଟକି ରହିଥିବା ଆନନ୍ଦପୁରକୁ ସ୍ବତନ୍ତ୍ର ଜିଲା ପ୍ରସଙ୍ଗକୁ କାର୍ଯ୍ୟକାରୀ କରିବା ଦିଗରେ ଉପଖଣ୍ଡବାସୀଙ୍କ ମଧ୍ୟରେ ଅନେକ ଉତ୍ସୁକତା ପରିଲକ୍ଷିତ ହୋଇଛି। ମହୋରିର ସଂଘ ପକ୍ଷରୁ ରାହାସ ବିହାରୀ ସାହୁ, ମଦନ ମୋହନ ମିଶ୍ର, ଶାନ୍ତନୁ କୁମାର ଜେନା, ଲକ୍ଷ୍ମୀଧର ଜେନା, ଶଙ୍କର୍ଷଣ ପତି, ଶେଷଦେବ ନାଥ, ସୁଦର୍ଶନ ସାହୁ, ଅକ୍ଷୟ କୁମାର ମିଶ୍ର, ପୀତାମ୍ବର ନାୟକ, ଭୀମସେନ ନାଥ, ସୁରେନ୍ଦ୍ର ଘଡ଼େଇ, ଅମର ରଣା, ଘନଶ୍ୟାମ ଜେନା, ନାରାୟଣ ନାଥ, ଦେବବ୍ରତ ବାରିକ, ସପନ କୁମାର ଶା, ବଳରାମ ବେହେରା, ଅଜୟ କୁମାର ସାହୁ, ଦିଲ୍ଲୀପ କୁମାର ଜେନା, କେଦାରନାଥ ରଥ ପ୍ରମୁଖଙ୍କ ସହିତ ବହୁ ମୋହରିର ଧାରଣାରେ ସାମିଲ ହୋଇଥିଲେ।
