ନୂଆଦିଲ୍ଲୀ, ୧୨।୪ : ଭାରତୀୟ ବାୟୁସେନା ମୁଖ୍ୟ ବିବେକ ରାମ ଚୌଧରୀ ମଙ୍ଗଳବାର କହିଛନ୍ତି ଯେ ଭବିଷ୍ୟତରେ ଯୁଦ୍ଧର ପ୍ରକୃତି ହାଇବ୍ରିଡ ହେବାର ସମ୍ଭାବନା ରହିଛି। ଏଥିରେ ଅର୍ଥନୈତିକ ପ୍ରତିବନ୍ଧକ, ସୂଚନା ପ୍ରତିବନ୍ଧକ, କମ୍ପ୍ୟୁଟର ଭାଇରସ ଏବଂ ହାଇପରସୋନିକ କ୍ଷେପଣାସ୍ତ୍ର ଆଦିର ବ୍ୟବହାର କରାଯିବ।
ଅଲ ଇଣ୍ଡିଆ ମ୍ୟାନେଜମେଣ୍ଟ ଆସୋସିଏସନ ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ତାଙ୍କ ଅଭିଭାଷଣରେ ଏୟାର ଚିଫ ମାର୍ଶଲ କହିଛନ୍ତି ଯେ ’ସାଇବର ଏବଂ ସୂଚନା’ ଯୁଦ୍ଧକ୍ଷେତ୍ର ଗଠନ ପାଇଁ ଆଧୁନିକ ଉପକରଣ ହୋଇପାରିଛି। ସେ କହିଛନ୍ତି ଯେ ସୂଚନା କ୍ଷେତ୍ରରେ ଏକ ସୁସଜ୍ଜିତ ପ୍ରଣାଳୀ ଶତ୍ରୁକୁ ପ୍ରଭାବିତ କରିବ ଏବଂ ଏହା ଉପରେ ବିପର୍ଯ୍ୟୟ ପ୍ରଭାବ ପକାଇପାରିବ।
ବାୟୁସେନା ମୁଖ୍ୟ କହିଛନ୍ତି ଯେ ଲୋକମାନେ ପରସ୍ପର ସହ ନିବିଡ଼ ଭାବେ ଜଡିତ ଥିବାରୁ ଆମର ନେଟୱାର୍କ ଉପରେ ସାଇବର ଆକ୍ରମଣ ଯୋଗୁ କମାଣ୍ଡ ଏବଂ କଣ୍ଟ୍ରୋଲ ଷ୍ଟ୍ରକଚର ଦୁର୍ବଳ ହେବାର ଆଶଙ୍କା ରହିଛି। ସେ କହିଛନ୍ତି ଯେ ପରବର୍ତ୍ତୀ ଯୁଦ୍ଧରେ ଶତ୍ରୁ କୌଣସି ଦେଶ କିମ୍ବା ସଂଗଠନ ହୋଇ ନ ପାରେ। ଏୟାର ଚିଫ କହିଛନ୍ତି ଯେ ଏହାର କମ୍ପ୍ୟୁଟର ଉପରେ ଆକ୍ରମଣ କରୁଥିବା ଲୋକ କିଏ ଏବଂ ଏହି ଆକ୍ରମଣ କେବେ ଏବଂ କେଉଁଠୁ ଘଟିବ ତାହା ଭାରତ ହୁଏତ ଜାଣି ମଧ୍ୟ ନପାରେ।
ଭବିଷ୍ୟତରେ ଅର୍ଥନୈତିକ ପ୍ରତିବନ୍ଧକଠାରୁ ଆରମ୍ଭ କରି କୂଟନୈତିକ ଏବଂ ସାମରିକ ସ୍ଥିତି ପର୍ଯ୍ୟନ୍ତ କମ୍ପ୍ୟୁଟର ଉପରେ ଆକ୍ରମଣ କରି ସୂଚନା ହସ୍ତାନ୍ତର ପର୍ଯ୍ୟନ୍ତ ଭାରତକୁ ସବୁ ଦିଗରେ ଆକ୍ରମଣ କରାଯାଇପାରେ ବୋଲି ସେ କହିଛନ୍ତି।
ତାଙ୍କ କହିବାନୁସାରେ, ପ୍ରଥମ ଗୁଳି ଏବଂ ପ୍ରଥମ ବିମାନ ସୀମା ପାର ହେବା ପୂର୍ବରୁ ଏହି ସବୁ ଘଟିବ। ସେ ଏହା ମଧ୍ୟ କହିଛନ୍ତି ଯେ ଆମେ ଯେଉଁ ଅସ୍ତ୍ରଶସ୍ତ୍ର ଦେଖୁଛୁ ତାହା ଏକ ଛୋଟ କମ୍ପ୍ୟୁଟର ଭାଇରସ୍ ଠାରୁ ଆରମ୍ଭ କରି ହାଇପରସୋନିକ କ୍ଷେପଣାସ୍ତ୍ର ପର୍ଯ୍ୟନ୍ତ ରହିବ।
ସୂଚନାଯୋଗ୍ୟ ଯେ ଦେଶର ପ୍ରଥମ ସିଡିଏସ୍ ଜେନେରାଲ ବିପିନ ରାୱତ ମଧ୍ୟ ହାଇବ୍ରିଡ ଯୁଦ୍ଧ ବିଷୟରେ ଅନେକ ଥର ଉଲ୍ଲେଖ କରିଥିଲେ। କେବଳ ଏତିକି ନୁହେଁ, ସେ ଅନେକ ସମୟରେ ନୂତନ ଶବ୍ଦ ବ୍ୟବହାର କରି ଅଢ଼େଇ ମୋର୍ଚ୍ଚା ଯୁଦ୍ଧ ବିଷୟରେ ମଧ୍ୟ ସୂଚିତ କରିଥିଲେ। ଅଢ଼େଇ ମୋର୍ଚ୍ଚା ଯୁଦ୍ଧ ଭାବେ ସେ ଚାଇନା, ପାକିସ୍ଥାନ ଏବଂ ଦେଶ ଭିତରେ ଜାରି ରହିଥିବା ଅପରେଶନ୍କୁ ଦୃଷ୍ଟିରେ ରଖି କହିଥିଲେ।
