ଭୁବନେଶ୍ୱର,୨୮।୮: ଓଡ଼ିଶାର ରାସନ କାର୍ଡ ଧାରୀଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଖବର। ଯଦି ଆପଣ ମାଗଣା ଚାଉଳ ଓ ଗହମ ପାଇବାକୁ ଚାହୁଁଛନ୍ତି, ତେବେ ଅଗଷ୍ଟ ୩୧ ପୂର୍ବରୁ ଇ-କେୱାଇସି (e-KYC) ପ୍ରକ୍ରିୟା ସମାପ୍ତ କରିବା ଜରୁରୀ। ସରକାରଙ୍କ ନିର୍ଦ୍ଦେଶ ଅନୁଯାୟୀ, ଯେଉଁମାନେ ଏହି ପ୍ରକ୍ରିୟା ସମ୍ପୂର୍ଣ୍ଣ କରିବେ ନାହିଁ, ସେମାନଙ୍କ ରାସନ କାର୍ଡ ମାଧ୍ୟମରେ ଆଗାମୀ ତିନି ମାସ ପାଇଁ ମାଗଣା ରାସନ ମିଳିବ ନାହିଁ।
ସରକାରଙ୍କ ସୂଚନା ଅନୁଯାୟୀ, ୦ ରୁ ୫ ବର୍ଷ ବୟସର ପିଲାମାନଙ୍କୁ ଛାଡ଼ି ଅନ୍ୟ ସମସ୍ତ ରାସନ କାର୍ଡ ୟୁନିଟ ପାଇଁ ଇ-କେୱାଇସି କରିବା ବାଧ୍ୟତାମୂଳକ। ଯଦି ର୍ନିଦ୍ଧାରିତ ସମୟ ମଧ୍ୟରେ ଏହି ପ୍ରକ୍ରିୟା ସମାପ୍ତ ନ ହୁଏ, ତେବେ ସମ୍ପୃକ୍ତ ୟୁନିଟ ରାସନ କାର୍ଡରୁ ବାଦ ଦିଆଯାଇପାରେ। ତେବେ, ଯେଉଁମାନେ ସମୟ ମଧ୍ୟରେ ଇ-କେୱାଇସି ସମ୍ପୂର୍ଣ୍ଣ କରିବେ, ସେମାନେ ପରବର୍ତ୍ତୀ ମାସରୁ ଖାଦ୍ୟ ଶସ୍ୟ ପାଇବା ପାଇଁ ଯୋଗ୍ୟ ହେବେ।
ଅନ୍ତ୍ୟୋଦୟ ରାସନ କାର୍ଡ ଧାରୀଙ୍କ ପାଇଁ ସ୍ପଷ୍ଟ କରାଯାଇଛି ଯେ, ଯଦି କାର୍ଡର ଗୋଟିଏ ୟୁନିଟ୍ର ଇ-କେୱାଇସି ହୋଇଛି, ତେବେ ସେମାନେ ପୂର୍ଣ୍ଣ ୩୫ କିଲୋଗ୍ରାମ ଖାଦ୍ୟ ଶସ୍ୟ ପାଇବେ। ଯେଉଁମାନଙ୍କର ଇ-କେୱାଇସି ବିଚାରାଧୀନ ଅଛି, ସେମାନଙ୍କୁ ଆଗାମୀ ତିନି ମାସ ମଧ୍ୟରେ ଏହି ପ୍ରକ୍ରିୟା ସମାପ୍ତ କରିବାକୁ ପଡ଼ିବ।
ଓଡ଼ିଶାର ରାସନ କାର୍ଡ ଧାରୀଙ୍କୁ ଜାନୁଆରୀ ୨୦୨୫ ପ୍ରଥମ ସପ୍ତାହରୁ ଚାଉଳ ସହିତ ଗହମ ମଧ୍ୟ ଯୋଗାଇ ଦିଆଯିବ। ଖାଦ୍ୟ ଯୋଗାଣ ଓ ଉପଭୋକ୍ତା କଲ୍ୟାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର କହିଛନ୍ତି ଯେ, ଗହମ ଯୋଗାଣ ଆସିଛି, କିନ୍ତୁ ସରକାରୀ ପ୍ରକ୍ରିୟା ଯୋଗୁଁ ବଣ୍ଟନରେ ଦୁଇ ମାସର ବିଳମ୍ବ ହେବ। ଏହା ସହିତ, ବିଭିନ୍ନ ଜିଲ୍ଲାରୁ ହିତାଧିକାରୀଙ୍କ ଗହମ ଆବଶ୍ୟକତା ସମ୍ପର୍କିତ ତଥ୍ୟ ସଂଗ୍ରହ କରାଯାଉଛି।
ମନ୍ତ୍ରୀଙ୍କ ଅନୁଯାୟୀ, ଇ-କେୱାଇସି ପ୍ରକ୍ରିୟା ଜୁଲାଇ ମାସରୁ ଆରମ୍ଭ ହୋଇଛି ଏବଂ ଏହା ନଭେମ୍ବର ମାସରେ ସମାପ୍ତ ହେବ। ଏପର୍ଯ୍ୟନ୍ତ ୮୫ ପ୍ରତିଶତ ଇ-କେୱାଇସି ସମ୍ପୂର୍ଣ୍ଣ ହୋଇଛି ଏବଂ ୧୬ ଲକ୍ଷରୁ ଅଧିକ ଅଯୋଗ୍ୟ ହିତାଧିକାରୀ ଚିହ୍ନଟ ହୋଇଛନ୍ତି। ଏହି ପ୍ରକ୍ରିୟା ସମ୍ପୂର୍ଣ୍ଣ ହେବା ପରେ ଜାନୁଆରୀ ୨୦୨୫ରୁ ନୂତନ ରାସନ କାର୍ଡ ବଣ୍ଟନ ଆରମ୍ଭ ହେବ।
