ଢେଙ୍କାନାଳ ଅଫିସ,୧୧।୧: ଢେଙ୍କାନାଳ ବିଧାନସଭା ନିର୍ବାଚନମଣ୍ଡଳୀ ପକ୍ଷରୁ ମିନି ଷ୍ଟାଡିୟମ୍ ପରିସରରେ ମଙ୍ଗଳବାର ବିଜେଡିର ୨୫ବର୍ଷ ପୂର୍ତ୍ତି ଅବସରରେ ୨୬ତମ ପ୍ରତିଷ୍ଠା ଦିବସ ପାଳିତ ହୋଇଯାଇଛି। ଏହି ଉପଲକ୍ଷେ ପୂର୍ବାହ୍ନ ୧୦ଟାରେ ବାଜିଚୌକଠାରୁ ଏକ ବିଶାଳ ଶୋଭାଯାତ୍ରାରେ ସହର ପରିକ୍ରମା କରି ମିନି ଷ୍ଟାଡିୟମ୍ରେ ପହଞ୍ଚତ୍ଥିଲା। କାର୍ଯ୍ୟକ୍ରମକୁ ଉଦଘାଟନ କରି ଜିଲା ପର୍ଯ୍ୟବେକ୍ଷକ ତଥା ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ କହିଲେ, ଡିସେମ୍ବର ୨୬ରେ ପୁରୀରେ ଅନୁଷ୍ଠିତ ବିଜେଡି ପ୍ରତିଷ୍ଠା ଦିବସରେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ପ୍ରତି ନିର୍ବାଚନମଣ୍ଡଳୀରେ ଏହାକୁ ପାଳନ କରିବା ପାଇଁ କହିଥିଲେ। ୨୦୦୦ରୁ ଓଡ଼ିଶାବାସୀଙ୍କ ପାଇଁ ସମସ୍ତ ପ୍ରକାର ଆବଶ୍ୟକ ସେବା ବିଜେଡି ଦେଇଆସୁଛି। ୫-ଟି ମାଧ୍ୟମରେ ବିଦ୍ୟାଳୟ ରୂପାନ୍ତରୀକରଣ, ଗ୍ରାମାଞ୍ଚଳର ଛାତ୍ରୀଛାତ୍ରଙ୍କୁ କମ୍ପ୍ୟୁଟର ଶିକ୍ଷା, ମହିଳାଙ୍କୁ ଶାସନରେ ୫୦% ଭାଗୀଦାର କରିବା ଏବଂ ମିଶନ ଶକ୍ତି ମାଧ୍ୟମରେ ମହିଳା ସଶକ୍ତ କରିବା ଭଳି ବହୁ କାର୍ଯ୍ୟକ୍ରମ ହାତକୁ ନିଆଯାଇଛି। ମା’ ମାନେ ସମ୍ମାନର ସହ ବଞ୍ଚତ୍ବା ମୁଖ୍ୟମନ୍ତ୍ରୀଙ୍କ ଏକମାତ୍ର ଲକ୍ଷ୍ୟ ବୋଲି ପ୍ରମିଳା କହିଛନ୍ତି। ଭାଜପାକୁ ଟାର୍ଗେଟ କରି ସେ କହିଲେ, ଢେଙ୍କାନାଳ ଜିଲାରେ କେତେଜଣ ନେତା ଅଛନ୍ତି ସବୁବେଳେ କୁହନ୍ତି ଅଛେଦିନ୍ ଆୟେଗା। ଗ୍ୟାସ୍, ଟେଲିଫୋନ୍ ବ୍ୟବସାୟୀ ଯେତେବେଳେ ଲାଭବାନ ହେଲେ ତାହା ଥିଲା ସେମାନଙ୍କ ଅଛେଦିନ୍। ଖଟିଖିଆ ଓ ଗରିବ ଲୋକଙ୍କ ପାଇଁ ଅଛେଦିନ୍ ଆସିଲାନାହିଁ। ପେଟ୍ରୋଲ, ଗ୍ୟାସ୍ ଦରବୃଦ୍ଧି ସାଧାରଣ ଜନତାଙ୍କୁ ହନ୍ତସନ୍ତ କରିଛି। ହେଲେ ସାଧାରଣ ଜନତାଙ୍କ ସେବା ପାଇଁ ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ବିଜେଡି ପ୍ରତିଶ୍ରୁତିବଦ୍ଧ ବୋଲି ମନ୍ତ୍ରୀ କହିଥିଲେ।
ଏମ୍ପି ମହେଶ ସାହୁ କହିଲେ, କିଛି ମୁଷ୍ଟିମେୟ ବିଧାୟକଙ୍କ ଦ୍ୱାରା ରାଜ୍ୟ ସଭାକୁ ନିର୍ବାଚିତ ହୋଇ ସେମାନେ ନିଜକୁ ରାଜତନ୍ତ୍ରରେ ରହିଥିବା ଭାବି ଅହଙ୍କାର ପ୍ରଦର୍ଶନ କରୁଛନ୍ତି। ପ୍ରଜାତନ୍ତ୍ରରେ ଅହଙ୍କାରର ସ୍ଥାନ ନାହିଁ। ୨୦୧୭ରେ ଆକାଂକ୍ଷା ଜିଲାରେ ମେଡିକାଲ କଲେଜ ହେବ ବୋଲି ପ୍ରଧାନମନ୍ତ୍ରୀ ଘୋଷଣା କରିଥିଲେ। ଆକାଂକ୍ଷା ଜିଲା ମାନ୍ୟତାକୁ ୬ବର୍ଷ ବିତିଥିଲେ ମଧ୍ୟ ଢେଙ୍କାନାଳରେ ମେଡିକାଲ କଲେଜ ପ୍ରତିଷ୍ଠା ହେଲାନାହିଁ। କେନ୍ଦ୍ର ସରକାର ଏମ୍ପିଙ୍କ ଆଞ୍ଚଳିକ ଉନ୍ନୟନ ପାଣ୍ଠି ବନ୍ଦ କରିଦେଲେ। ସିଏସ୍ଆର ଫଣ୍ଡକୁ ପିଏମ୍ କେୟାର ଫଣ୍ଡ୍ ଭାବେ ବ୍ୟବହାର କରାଯାଉଛି ବୋଲି ଏମ୍ପି ସାହୁ କହିଥିଲେ। କାର୍ଯ୍ୟକ୍ରମରେ ଅଧ୍ୟକ୍ଷତା କରି ବିଧାୟକ ସୁଧୀର କୁମାର ସାମଲ କହିଲେ, ରାଜ୍ୟ କେନ୍ଦ୍ରକୁ ବାର୍ଷିକ ୨ଲକ୍ଷ କୋଟି ଟଙ୍କା ଟିକସ ଦେଉଛି ା କିନ୍ତୁ କେନ୍ଦ୍ର ଆମର ୫ କେଜି ଲେଖାଏ ଚାଉଳ କାଟି ଦେଇଛି। ଏହି କଥାକୁ ଲୋକଙ୍କୁ ଜଣାଇବୁ ବୋଲି ବିଧାୟକ କହିଥିଲେ।
ଜିଲା ପରିଷଦ ସଭାନେତ୍ରୀ ଅର୍ଚ୍ଚନା ପୁହାଣ, ଜିଲା ମହିଳା ବିଜେଡି ସଭାନେତ୍ରୀ ସାଗରିକା ମିଶ୍ର, ବରିଷ୍ଠ ନେତା ଲକ୍ଷ୍ମୀଧର ସାହୁ, ଇନ୍ଦ୍ରମଣି ବେହେରା, ହର୍ଷବର୍ଦ୍ଧନ ସିଂଦେଓ, ଦେବୀ ପ୍ରସାଦ ଭୂତିଆ, ପ୍ରକାଶ ଚନ୍ଦ୍ର କୁଅଁର ପ୍ରମୁଖ ଉଦ୍ବୋଧନ ଦେଇଥିଲେ। ଦେବାଶିଷ ମିଶ୍ର, ନରୋତ୍ତମ ସାହୁ କାର୍ଯ୍ୟକ୍ରମ ପରିଚାଳନା କରିଥିଲେ।
