ରାଉରକେଲା ଅଫିସ,୧୯।୫: ରାଜ୍ୟ ସରକାରଙ୍କ ସ୍ବାସ୍ଥ୍ୟ ବିଭାଗର ୪ ଜଣିଆ ଟିମ୍ ଗୁରୁବାର ରାଉରକେଲା ସରକାରୀ ହସ୍ପିଟାଲ (ଆରଜିଏଚ୍)କୁ ଗସ୍ତ କରି ବିଭିନ୍ନ କାର୍ଯ୍ୟର ସମୀକ୍ଷା କରିଛନ୍ତି। ଉକ୍ତ ଟିମ୍ ପୂର୍ବାହ୍ନ ୧୦ଟାରେ ଡାକ୍ତରଖାନାରେ ପହଞ୍ଚତ୍ବା ପରେ ଡାକ୍ତରଖାନା କର୍ତ୍ତୃପକ୍ଷଙ୍କ ସେମାନଙ୍କୁ ପୁଷ୍ପଗୁଚ୍ଛ ଦେଇ ସ୍ବାଗତ କରିଥିଲେ। ପରେ ଆରଜିଏଚ୍ ନିର୍ଦ୍ଦେଶକ ଡ. ସନ୍ତୋଷ କୁମାର ସ୍ବାଇଁ ଓ ଅନ୍ୟ କର୍ମକର୍ତ୍ତାଙ୍କ ଉପସ୍ଥିତିରେ ଡାକ୍ତରଖାନା ଅଧିବେଶନ କକ୍ଷରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ବୈଠକରେ ସ୍ବାସ୍ଥ୍ୟ ବିଭାଗର ନିର୍ଦ୍ଦେଶକ ଡ. ବି. କେ. ମହାପାତ୍ର, ଅତିରିକ୍ତ ଡିଏମ୍ଟି ଡ. ବ୍ରଜକିଶୋର ଦାସ, ଓଏସ୍ଏମ୍ସିଏଲର ଜେନେରାଲ ମ୍ୟାନେଜର ଡ. ରଣଜିତ ସିଂ, ଏନ୍ଏଚ୍ଏମ୍ର ପ୍ରୋଗାମ ମ୍ୟାନେଜର ଆଦିତ୍ୟ ପ୍ରଧାନ ଓ ରାଉରକେଲା ବିଧାୟକ ସାରଦା ପ୍ରସାଦ ନାୟକ ପ୍ରମୁଖ ଉପସ୍ଥିତ ଥିଲେ।
ସୁନ୍ଦରଗଡ଼ ଜିଲାର ୪ଟି ନିର୍ବାଚନ ମଣ୍ଡଳୀ ସହ ପଡୋଶୀ ଝାଡ଼ଖଣ୍ଡର ରୋଗୀମାନେ ରାଉରକେଲା ସରକାରୀ ହସ୍ପିଟାଲ ଉପରେ ନିର୍ଭର କରିଥାନ୍ତି। ତେଣୁ ଏହି ଡାକ୍ତରଖାନାରେ ଥିବା ନାନା ସମସ୍ୟାର ସମାଧାନ ନେଇ ବିଧାୟକ ନାୟକ ସ୍ବାସ୍ଥ୍ୟ ବିଭାଗର ଟିମ୍କୁ ଅବଗତ କରିଥିଲେ। ପରେ ଏହି ଟିମ୍ ଆରଜିଏଚର ବିଭିନ୍ନ ୟୁନିଟ୍ ଗୁଡିକୁ ବୁଲି ଦେଖିଥିଲେ। ଏହାସହ ଡାକ୍ତରଖାନାରେ ପରିମଳ ବ୍ୟବସ୍ଥା, ପାର୍କିଂ ସ୍ଥଳ, ପାନୀୟ ଜଳ, ବିଦ୍ୟୁତ ସେବା ଓ ରାଜ୍ୟ ବିଭିନ୍ନ ସ୍ବାସ୍ଥ୍ୟ ଯୋଜନାର ଉପଯୁକ୍ତ କାର୍ଯ୍ୟକାରିତାକୁ ନେଇ ଡାକ୍ତରଖାନା କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ। ଡାକ୍ତରଖାନାରେ ମାତୃଶିଶୁ ବିଭାଗ ସମ୍ମୁଖ ଖାଲିସ୍ଥାନରେ ଆଇସିୟୁ ବ୍ୟବସ୍ଥା, କର୍ମଚାରୀମାନଙ୍କ ପାଇଁ ନୂତନ ଷ୍ଟାଫ୍ କ୍ୱାଟର୍ସ ନିର୍ମାଣ ପାଇଁ ପ୍ରସ୍ତାବ ସେମାନେ ପ୍ରସ୍ତାବ ଦେଇଥିଲେ। ଡାକ୍ତରଖାନାରେ ୨୦ ଜଣ ନୂତନ ଡାକ୍ତରଙ୍କୁ ତୁରନ୍ତ ଦେବା ପାଇଁ ଏହି ଟିମ ପ୍ରତିଶ୍ରୁତି ଦେଇଥିଲା। ଡାକ୍ତରଖାନା ସୁପରିଣ୍ଟେଣ୍ଡେଣ୍ଟ ଡ. ଜଗଦୀଶ ଚନ୍ଦ୍ର ବାରିକ, ଡେପୁଟି ସୁପରିଣ୍ଟେଣ୍ଡେଣ୍ଟ ଡ. ପଣ୍ଡିତ କୁମାର ସାହୁ, ପିଡବ୍ଲ୍ୟୁଡି ଅଧିକାରୀ ମନୋଜ କୁମାର ମହାନନ୍ଦ, ଆର୍ଜିଏଚ୍ ମ୍ୟାନେଜର ମୋହିତ ଶ୍ରୀବାସ୍ତବ, ଚକ୍ଷୁ ବିଶେଷଜ୍ଞ ଡ. ସମୀର ପାତ୍ରଙ୍କ ସମେତ ବହୁ ବରିଷ୍ଠ ଅଧିକାରୀ ଉପସ୍ଥିତ ଥିଲେ।
