ପୁରୀ ଅଫିସ,୮।୧: ଶ୍ରୀଶ୍ରୀଠାକୁର ଅନୁକୂଳଚନ୍ଦ୍ରଙ୍କର ୧୦୧ତମ ଉତ୍କଳ ଆଗମନୀର ସ୍ମୃତି ମହୋତ୍ସବ ପୁରୀଠାରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ଆଚାର୍ଯ୍ୟଦେବଙ୍କ ଇଚ୍ଛାନୁକ୍ରମେ ଏକ ମାଗଣା ସ୍ବାସ୍ଥ୍ୟ ଶିବିର ଆୟୋଜନ କରାଯାଇଥିଲା। ଏହି ଶିବିରରେ ବିଭିନ୍ନ ବିଭାଗର ପ୍ରାୟ ୫୦ରୁ ଊର୍ଦ୍ଧ୍ୱ ଡାକ୍ତର ଏବଂ ୧୦୦ ଫାର୍ମାସିଷ୍ଟ ମିଶି ରୋଗୀଙ୍କ ଚିକିତ୍ସା କରିଥିଲେ। ପ୍ରାୟ ୨୩୦୦ରୁ ଅଧିକ ରୋଗୀ ଚିକିତ୍ସା ପାଇଁ ଏଠାକୁ ଆସିଥିଲେ। କେବଳ ଏତିକି ନୁହେଁ, ସିପିଆର ଏବଂ ଅନ୍ୟ ରୋଗୀଙ୍କ ପାଇଁ ଏକ ଅଡିଓ ଭିଜୁଆଲ ପ୍ରୋଗାମ ମଧ୍ୟ ଆୟୋଜନ କରାଯାଇଥିଲା। ମାଗଣାରେ ଏକ୍ସ-ରେ, ଇସିଜି, ରକ୍ତ ପରୀକ୍ଷା ଏବଂ ବୋନ ସ୍କାନ ମଧ୍ୟ କରାଯାଇଥିଲା।
ନ୍ୟୁରୋଲୋଜି ଡା.ଲୋଲୁପ କୁମାର ସାହୁ, ନ୍ୟୁରୋ ସର୍ଜନ ଡା. ସୁଶାନ୍ତ ଦାସ, ଅର୍ଥପେଡିକର ଡା ଜଗତଜିତ୍, ନ୍ୟୁରୋ ସର୍ଜନ ବିଶ୍ୱରଞ୍ଜନ ନାୟକ, ପୁଲମୋନାରୀ ମେଡିଶିନ ଡା. ଗୁରୁଦତ୍ତ ଦାଶ, ଶିଶୁ ରୋଗ ବିଶେଷଜ୍ଞ ଡା ହେମନ୍ତ ନାୟକ, ମେଡିସିନ୍ ଡା. ବେଣୁଧର ମୁଦୁଲି, ପ୍ଲାଷ୍ଟିକ ସର୍ଜରୀ ଡା.ଶ୍ୟାମସୁନ୍ଦର ବେହେରା, ସର୍ଜରୀ ଡା. ତୀର୍ଥସାରଥୀ ମହାନ୍ତି, ସ୍ତ୍ରୀ ରୋଗ ବିଶେଷଜ୍ଞ ପ୍ରଭାତ ଦାସ ପ୍ରମୁଖ ରୋଗୀ ମାନଙ୍କର ଚିକିତ୍ସା କରିଥିଲେ।
ରବିବାର ପୁରୀର ତାଳବଣିଆ ସ୍ପୋଟର୍ସ କମ୍ପ୍ଲେକ୍ସରେ ଅନୁଷ୍ଠିତ ଉତ୍କଳ ଆଗମନର ସ୍ମୃତି ମହୋତ୍ସବ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇ ସୁନ୍ଦର ଓଡ଼ିଶା ଓ ଭାରତ ଗଠନ ଲାଗି ଏକାଠି ହୋଇ କାମ କରିବାକୁ ଆହ୍ବାନ କରିଥିଲେ।
