ଲଣ୍ଡନ,୬।୧: ସମୁଦ୍ରରେ ଅନେକ ପ୍ରଜାତିର ପ୍ରାଣୀ ବାସ କରନ୍ତି। କିଛି ପ୍ରାଣୀ ନିଜଠାରୁ କ୍ଷୁଦ୍ର ଜୀବଙ୍କୁ ଶିକାର କରନ୍ତି ତ ଆଉ କିଛି ସାମୁଦ୍ରିକ ପ୍ରବାଳ ଉପରେ ନିର୍ଭର କରନ୍ତି। ସମୁଦ୍ରରେ ରହୁଥିବା କ୍ଷୁଦ୍ରମାଛ ବଟର୍ଫ୍ଲାଏ ଫିସ୍ ବିଶେଷ ଭାବେ ଆକ୍ରୋପୋରା ପ୍ରବାଳକୁ ଖାଦ୍ୟ ଭାବେ ଗ୍ରହଣ କରନ୍ତି। ବିଭିନ୍ନ ରଙ୍ଗର ପ୍ରବାଳ ସମୁଦ୍ରରେ ଦେଖାଯାଉଥିବାବେଳେ ଜଳବାୟୁ ପରିବର୍ତ୍ତନ କାରଣରୁ ଏହା ବର୍ଣ୍ଣହୀନ ହେବାରେ ଲାଗିଛି। ଫଳରେ ବଟରଫ୍ଲାଏ ପ୍ରଜାତିର ମାଛଙ୍କ କ୍ଷେତ୍ରରେ ଖାଦ୍ୟାଭାବ ଦେଖାଯାଇଛି। ଅନ୍ୟପକ୍ଷେ ଏହି ବର୍ଣ୍ଣହୀନ ପ୍ରବାଳ ଯୋଗୁ ସମୁଦ୍ରରେ ଫିସ୍ ଫାଇଟ ବା ମାଛମାନଙ୍କ ମଧ୍ୟରେ ସଂଘର୍ଷ ଦେଖିବାକୁ ମିଳୁଥିବା ବ୍ରିଟେନ୍ର ଲାନ୍କାଷ୍ଟର ୟୁନିଭର୍ସିଟିର ମେରାଇନ୍ ଇକୋଲୋଜିଷ୍ଟ ସାଲି କେଥ୍ କହିଛନ୍ତି।
ଜଳବାୟୁ ପରିବର୍ତ୍ତନ ଯୋଗୁ ସାମୁଦ୍ରିକ ତାପମାତ୍ରା ବୃଦ୍ଧି ପାଇବାରେ ଲାଗିଛି। ଏହି କାରଣରୁ ସମୁଦ୍ରର ଗଭୀର ଜଳର ପଥର ଚଟାଣରେ ସୃଷ୍ଟ ପ୍ରବାଳ ବର୍ଣ୍ଣହୀନ ହେବାରେ ଲାଗିଥିବା ବିଶେଷଜ୍ଞମାନଙ୍କ ଅଧ୍ୟୟନରୁ ଜଣାପଡ଼ିଛି। ଅଧିକାଂଶ ପ୍ରବାଳ ରଙ୍ଗହୀନ ହେବା ଦ୍ୱାରା ପାଖାପାଖି ୩୮ ପ୍ରଜାତିର ବଟରଫ୍ଲାଏ ଫିସ୍ଙ୍କ ମଧ୍ୟରେ ସଂଘର୍ଷ ଦେଖାଯାଇଛି। ମେରାଇନ୍ ଇକୋଲୋଜିଷ୍ଟଙ୍କ ଏକ ଦଳ ସମୁଦ୍ର ମଧ୍ୟକୁ ଯାଇ ଅତି ନିକଟରୁ ମାଛମାନଙ୍କ ଗତିବିଧିକୁ ଲକ୍ଷ୍ୟ କରିଛନ୍ତି। ଏ ନେଇ ପ୍ରକାଶିତ ଅଧ୍ୟୟନ ରିପୋର୍ଟ ମୁତାବକ କିଛି ମାଛ ପ୍ରବାଳ ଖାଉଥିବାବେଳେ ତାଙ୍କୁ ଅନେକ ମାଛ ଘେରିଯାଉଛନ୍ତି। ଖାଲି ସେତିକି ନୁହେଁ ପ୍ରବାଳ ଖାଉଥିବା ମାଛକୁ ସେଠାରୁ ହଟାଇବା ଲାଗି ଅନ୍ୟମାଛ ନିଜ ନାକ ଏବଂ ଡେଣାର ବ୍ୟବହାର କରୁଥିବା ଦେଖାଯାଇଛି।
୨୦୧୬ରେ ପ୍ରଥମ କରି ଗବେଷଜ୍ଞଙ୍କ ଦ୍ୱାରା ଫିଲିପାଇନ୍ସ, ଇଣ୍ଡୋନେସିଆ ଏବଂ ଖ୍ରୀଷ୍ଟମାସ ଦ୍ୱୀପର ରଙ୍ଗହୀନ ସାମୁଦ୍ରିକ ପ୍ରବାଳଙ୍କୁ ନେଇ ଅଧ୍ୟୟନ କରାଯାଇଥିଲା। କିନ୍ତୁ ସେ ସମୟରେ ଏହା ପଛର କାରଣ ସେମାନେ ଖୋଜି ବାହାର କରିବାରେ ଅସଫଳ ହୋଇଥିଲେ। ତେବେ ଏ ପ୍ରକାର ସଙ୍କଟର ମୁକାବିଲା ପାଇଁ ବଟରଫ୍ଲାଏ ଫିସ୍ ପାଖରେ କୌଣସି ବିକଳ୍ପ ଅଛି କି ନାହିଁ ତାକୁ ନେଇ ଗବେଷଣା ଚାଲିଛି। ଜଳବାୟୁ ପରିବର୍ତ୍ତନ ରୋକିବା ଦିଗରେ ପଦକ୍ଷେପ ନ ନିଆଗଲେ ବର୍ଣ୍ଣହୀନ ପ୍ରବାଳ ପୁଣିଥରେ ପୂର୍ବାବସ୍ଥାକୁ ଫେରିପାରିବେ ନାହିଁ। ଏହାଦ୍ୱାରା ଭବିଷ୍ୟତରେ ସମୁଦ୍ରରେ ଖାଦ୍ୟଚକ୍ରକୁ ନେଇ ବଡ଼ ସମସ୍ୟା ଦେଖାଯିବ ବୋଲି କେଥ୍ ସତର୍କ କରାଇଛନ୍ତି।
