ଆନନ୍ଦପୁର,୧୫ା୪(ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ଆନନ୍ଦପୁର ପୌରାଞ୍ଚଳରେ ଏକ ଅଭାବନୀୟ ଘଟଣା ଘଟିଯାଇଛି। ଆନନ୍ଦପୁର ଥାନା ଅଧୀନ ଫକିରପୁର ଅଞ୍ଚଳର ଏକ ଘରୋଇ ମହିଳା ମେସ୍ରେ ଜଣେ ଛାତ୍ରୀ ହ୍ବାଟ୍ସଆପ୍ରେ ଷ୍ଟାଟ୍ସ ଦେଇ ଓଢ଼ଣି ସହାୟତାରେ ଝୁଲିପଡ଼ିଥିବା ଜଣାପଡ଼ିଛି। ମୃତ ଛାତ୍ରୀ ହେଲେ ଯାଜପୁର ଜିଲା ଟମକା ଥାନା ବାଦିବିଲ ଗାଁର ମାନସୀ ନାୟକ। ସେ ଏଠାରେ ରହି ଆନନ୍ଦପୁର ମହାବିଦ୍ୟାଳୟରେ +୩ ବିଜ୍ଞାନ ଶେଷ ବର୍ଷରେ ପଢୁଥିଲେ। ପରିବାର ଲୋକଙ୍କ ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ତଦନ୍ତ କରୁଛି।
ସୂଚନା ଅନୁଯାୟୀ, ମହାବିଷୁବ ସଂକ୍ରାନ୍ତି ଛୁଟି ଥିବା ବେଳେ ମାନସୀ ସାଙ୍ଗମାନଙ୍କ ସହ ମେସ୍ରେ ଥିଲେ। ସନ୍ଧ୍ୟା ସମୟରେ ନିଜ୍ ରୁମ୍କୁ ଯାଇ କବାଟ ବନ୍ଦ କରି ହ୍ବାଟ୍ସଆପ ଷ୍ଟାଟସ୍ରେ ‘ମୁଁ ଦୁଃଖିତ, ଆଜି ମୋର ଶେଷ ଦିନ। ଆଉ କାହା ପାଇଁ ଆଜି ମୁଁ ଫସିଗଲି, ମୋର ଭୁଲ ନ ଥାଇ ବି ମୁଁ ଦୋଷୀ ହୋଇଗଲି। ସେଥିପାଇଁ ସମସ୍ତଙ୍କଠାରୁ ଦୂରକୁ ଚାଲି ଯାଉଛି। ମତେ କ୍ଷମା କରିଦେବ’ ଏମିତି ଲେଖି ନିଜ ଓଢ଼ଣି ସହାୟତାରେ ଫ୍ୟାନରେ ଝୁଲି ଜୀବନ ହାରିଥିଲେ।
ଅନ୍ତେବାସୀମାନେ କବାଟ ବାଡ଼େଇଥିଲେ, ହେଲେ ନ ଖୋଲିବାରୁ ପୋଲିସକୁ ଖବର ଦେଇଥିଲେ। ଆନନ୍ଦପୁର ପୋଲିସ ପହଞ୍ଚି ପରିବାର ଲୋକଙ୍କ ଉପସ୍ଥିତିରେ ମୃତଦେହ ଜବତ କରିଛି। ମୃତ ଛାତ୍ରୀଙ୍କ ମୋବାଇଲ ଜବତ କରିବା ସହ ମେସ୍ରେ ଥିବା ଅନ୍ତେବାସୀଙ୍କୁ ପଚରାଉଚରା କରୁଛି।
ପୋଲିସ ଏକ ମାମଲା (ନଂ.୮/୨୫) ରୁଜୁ କରି ମୃତଦେହ ବ୍ୟବଚ୍ଛେଦ ନିମନ୍ତେ ଆନନ୍ଦପୁର ଉପଖଣ୍ଡ ଚିକିତ୍ସାଳୟକୁ ପଠାଇ ତଦନ୍ତ ଆରମ୍ଭ କରିଛି। ହ୍ବାଟ୍ସଆପ ଷ୍ଟାଟ୍ସରେ ଲେଖାକୁ ଦେଖିଲେ ଆତ୍ମହତ୍ୟା ପଛରେ କିଛି ଭିନ୍ନ କାରଣ ରହିଥିବା ସନ୍ଦେହ କରାଯାଉଛି।
