ସାରସକଣା,୯ା୨(ଡି.ଏନ.ଏ.): ମୟୂରଭଞ୍ଜ ଜିଲା ସାରସକଣା ବ୍ଲକ ଝାରପୋଖରିଆସ୍ଥିତ ସୀମାନ୍ତ ଇନଷ୍ଟିଚ୍ୟୁଟ ଅଫ୍ ଫାର୍ମାସିଟିକାଲ ସାଇନ୍ସ କଲେଜ ଏବେ ବନ୍ଦ ହେବାକୁ ବସିଛି। ଏକଦା ଏହି କଲେଜ ଶିକ୍ଷାଦାନ କ୍ଷେତ୍ରରେ ବେଶ ସୁନାମ ଅର୍ଜନ କରିଥିଲା। ଓଡ଼ିଶା ସମେତ ପଡ଼ୋଶୀ ପଶ୍ଚିମବଙ୍ଗ ଓ ଝାଡ଼ଖଣ୍ଡ ରାଜ୍ୟର ଅନେକ ଛାତ୍ରୀଛାତ୍ର ଏଠାରେ ପାଠ ପଢ଼ୁଥିଲେ। ଘରୋଇ ଭାବେ ଚାଲିଥିବା ଏହି କଲେଜକୁ ସରକାର ହାତକୁ ନ ନେବାରୁ ଏହା ଏବେ ବନ୍ଦ ହେବା ଅବସ୍ଥାରେ ପହଞ୍ଚତ୍ଛି। ଆଗଭଳି ଆଉ ଛାତ୍ରୀଛାତ୍ର ନାମ ଲେଖାଉ ନ ଥିବାରୁ ଏଠାରେ ନିଯୁକ୍ତ କେତେଜଣ ଅଧ୍ୟାପକ ଚାକିରି ଛାଡ଼ି ପଳାଇ ଯାଉଥିବା ଦେଖିବାକୁ ମିଳିଛି। ୧୯୮୧ରେ ସୀମାନ୍ତ ସମିତି ଦ୍ୱାରା ଏଠାରେ ଫାର୍ମାସୀ ଶିକ୍ଷା ବିଭାଗର ଡି-ଫାର୍ମ ଶିକ୍ଷା ଆରମ୍ଭ ହୋଇଥିଲା। ୧୯୯୫ରେ ବି ଫାର୍ମାସୀ ଓ ୨୦୦୨ରେ ଏମ୍ ଫାର୍ମ ଆରମ୍ଭ ହୋଇଥିଲା। ଶିରିଶ ହୋତା, ହରେକୃଷ୍ଣ ଦାସ, ସୁରେଶ ପଣ୍ଡା, ପରେଶ ବସା ପ୍ରମୁଖ ଏହି ଶିକ୍ଷାନୁଷ୍ଠାନ ଆରମ୍ଭ କରିଥିଲେ। ପରେଶ ବସାଙ୍କ ଅବଦାନ ଅଧିକ ରହିଥିଲା। ତେବେ ପରେଶ ବସାଙ୍କ ଦେହାନ୍ତ ପରେ ଶିକ୍ଷାନୁଷ୍ଠାନରେ ଅବ୍ୟବସ୍ଥା ଦେଖାଦେଲା। ନୂତନଶିକ୍ଷା ବର୍ଷରେ ଜମି ଅଧିଗ୍ରହଣ ନେଇ ସମସ୍ୟା ସୃଷ୍ଟି ହେବାରୁ ଏଠାରେ ପିଲା ନାମ ଲେଖାଇ ପାରିବେ ନାହିଁ ବୋଲି ଖବର ପ୍ରଚାରିତ ହେଲା। ଫଳରେ ନୂତନ ବର୍ଷରେ ଏଠାରେ ଛାତ୍ରୀଛାତ୍ର ନାମ ଲେଖାଇ ନାହାନ୍ତି। ଭିତ୍ତିିିଭୂମିର ଅଭାବ ରହିଥିବା ସମ୍ପର୍କରେ ମଧ୍ୟ ଫାର୍ମାସୀ କାଉନସିଲ ଅଫ୍ ଇଣ୍ଡିଆ (ପି.ସି.ଆଇ.)ରୁ ଚିଠି ଆସିଥିଲା। ଏହା ଜାଣି ଶିକ୍ଷାନୁଷ୍ଠାନର କେତେଜଣ ଅଧ୍ୟାପକ ଅନ୍ୟତ୍ର ଚାକିରି କରିବାକୁ ପଳାଇଯାଉଥିବା ଜାଣିବାକୁ ମିଳିଛି। ସରକାର ଏହି ପୁରାତନ କଲେଜକୁ ହାତକୁ ନେବାକୁ ଅନେକ ପୁରାତନ ଛାତ୍ର ଦାବି କରିଛନ୍ତି।
