ବେଙ୍ଗାଲୁରୁ,୨୪ା୮: କର୍ନାଟକରୁ ସାମ୍ନାକୁ ଆସିଛି ଏକ ଆଶ୍ଚର୍ଯ୍ୟଜନକ ଘଟଣା। ସାରା ଜୀବନ ଭିକ୍ଷା ମାଗି ଜୀବନ ବିତାଇଥିବା ଜଣେ ବୃଦ୍ଧାଙ୍କ ମୃତ୍ୟୁ ପରେ ତାଙ୍କ ଘରୁ ମିଳିଛି ନୋଟ୍ଭର୍ତ୍ତି ୩୦ରୁ ଅଧିକ ବସ୍ତା। ବସ୍ତାଗୁଡ଼ିକରେ ୧୦, ୨୦ ଓ ୫୦ ଟଙ୍କିଆ ହଜାର ହଜାର ନୋଟ୍ ଥିବା ଜଣାପଡ଼ିଛି । ଟଙ୍କା ଏତେ ଅଧିକ ଥିଲା ଯେ ଗଣିବା ପାଇଁ ମେସିନ୍ ମଗାଇବାକୁ ପଡ଼ିଥିଲା।
ଘଟଣାଟି କର୍ନାଟକ ମାଣ୍ଡ୍ୟା ଜିଲା ଗୁଥାଲୁ ଅଞ୍ଚଳର। ସେଠାରେ ହୁର ଉନ୍ନିସା ନାମକ ଜଣେ ବୃଦ୍ଧା ତାଙ୍କ ଭଉଣୀଙ୍କ ସହ ରହୁଥିଲେ। ଉଭୟ ଭଉଣୀ ବିବାହ କରିନଥିଲେ ଏବଂ ଭିକ୍ଷା ମାଗି ଜୀବନ ଚଳାଉଥିଲେ। ପ୍ରାୟ ଦୁଇ ବର୍ଷ ପୂର୍ବେ ଉନ୍ନିସାଙ୍କ ଭଉଣୀଙ୍କ ମୃତ୍ୟୁ ହୋଇଥିଲା। ଏହାପରେ ସେ ଏକାକୀ ରହୁଥିଲେ। ଦୀର୍ଘଦିନ ଧରି ଅସୁସ୍ଥ ଥିବା ଉନ୍ନିସାଙ୍କର ରବିବାର ମୃତ୍ୟୁ ହୋଇଥିଲା। ତାଙ୍କ ମୃତ୍ୟୁ ପରେ ସ୍ଥାନୀୟ ଲୋକେ ଘର ଯାଞ୍ଚ କରିଥିଲେ । ଏହି ସମୟରେ ଘରୁ ୩୦ରୁ ଅଧିକ ବସ୍ତା ମିଳିଥିଲା, ଯେଉଁଥିରେ ଭର୍ତ୍ତି ଥିଲା ନଗଦ ଟଙ୍କା।
ମିଳିଥିବା ଟଙ୍କା ମଧ୍ୟରୁ ଏପର୍ଯ୍ୟନ୍ତ ପ୍ରାୟ ୮ରୁ ୯ ଲକ୍ଷ ଟଙ୍କା ଗଣା ସରିଛି । ତେବେ ଆହୁରି ପ୍ରାୟ ୨୦ଟି ବସ୍ତାରେ ଥିବା ଟଙ୍କା ଗଣିବା ବାକି ରହିଛି। ଟଙ୍କା ଗଣିବା ପାଇଁ ମେସିନ୍ ମଧ୍ୟ ଅଣାଯାଇଛି।ଉନ୍ନିସାଙ୍କ ଘରୁ ମିଳିଥିବା ଟଙ୍କାକୁ ବର୍ତ୍ତମାନ ଗୁଥାଲୁ ଅଞ୍ଚଳର ଏକ ମସଜିଦ୍ର ହେପାଜତରେ ରଖାଯାଇଛି। ତାଙ୍କ ସମ୍ପର୍କୀୟମାନଙ୍କୁ ମଧ୍ୟ ଏହି ଟଙ୍କା ସମ୍ପର୍କରେ ଜଣାଇ ଦିଆଯାଇଛି। ଅବଶିଷ୍ଟ ବସ୍ତାଗୁଡ଼ିକର ଟଙ୍କା ସମ୍ପର୍କୀୟଙ୍କ ଉପସ୍ଥିତିରେ ଗଣାଯିବ। ଏହାପରେ ଉନ୍ନିସା ଜୀବନସାରା ଭିକ୍ଷା ମାଗି ଜମା କରିଥିବା ଟଙ୍କା କାହାକୁ ଦିଆଯିବ, ସେନେଇ ନିଷ୍ପତ୍ତି ନିଆଯିବ। ଏହି ଘଟଣାର ଭିଡିଓ ମଧ୍ୟ ସୋସିଆଲ ମିଡିଆରେ ଦ୍ରୁତଗତିରେ ଭାଇରାଲ ହେଉଛି ।