ଛତ୍ରପୁର,୨୧ା୧୨(ଡି.ଏନ.ଏ): ଗଞ୍ଜାମ ଜିଲା ଛତ୍ରପୁରସ୍ଥିତ ଉଦ୍ୟାନ ବିଭାଗ ସହକାରୀ ନିର୍ଦ୍ଦେଶକଙ୍କ କାର୍ଯ୍ୟାଳୟକୁ ବିନା ଟେଣ୍ଡରରେ ଆନ୍ଧ୍ରପ୍ରଦେଶରୁ ଟ୍ରକ ମାଧ୍ୟମରେ ନଡିଆ ଚାରା ଅଣାଯାଉଥିବା ଅଭିଯୋଗ ହୋଇଛି, ଯାହାକି ଅଧିକାରୀଙ୍କ ଆନ୍ଧ୍ର ପ୍ରୀତି ପଦାରେ ପଡ଼ିଛି। ଆନ୍ଧ୍ରରୁ ନଡ଼ିଆ ଚାରାଗୁଡ଼ିକ ଟ୍ରକ୍ ଯୋଗେ ଅଣାଯାଇ ସହକାରୀ ନିର୍ଦ୍ଦେଶକ କାର୍ଯ୍ୟାଳୟ ପରିସରରେ ନାମକୁ ମାତ୍ର ଲଗାଇବା ପରେ ଲୋକଙ୍କୁ ବିକ୍ରି କରାଯାଉଥିବା ସ୍ଥାନୀୟ ଅଞ୍ଚଳର ଚାଷୀମାନେ ଅଭିଯୋଗ କରିଛନ୍ତି । ଏଥିରେ ଲକ୍ଷାଧିକ ଟଙ୍କାର ଦୁର୍ନୀତି ହେଉଥିବା ଅଭିଯୋଗ ହେଉଛି। ଦୀର୍ଘ ଦିନ ହେଲା ଏପରି କାର୍ଯ୍ୟ ଚାଲୁଛି ବୋଲି ପୂର୍ବତନ ସରପଞ୍ଚ ତଥା ବର୍ତ୍ତମାନର ଶ୍ରୀରାମଚନ୍ଦ୍ରପୁର ସମିତି ସଭ୍ୟ ଏସ.ଚକ୍ରପାଣି ରେଡ୍ଡି ଅଭିଯୋଗ କରିଛନ୍ତି। ଏ ନେଇ ବିଧିବଦ୍ଧ ଭାବେ ତଦନ୍ତ କଲେ ସବୁ ଜଣାପଡ଼ିବ ବୋଲି ସେ କହିଛନ୍ତି । ଏଠାରେ ନଡ଼ିଆ ଚାରା ହେଉଛି ବୋଲି କହି ଚାଷୀମାନଙ୍କୁ ଦିଆଯାଉଛି। ମାତ୍ର ଏହିସବୁ ନଡ଼ିଆ ଚାରା ଅନ୍ୟ ରାଜ୍ୟରୁ ଅଣାଯାଉଛି। ପୂର୍ବରୁ ଏଠାରେ ନଡ଼ିଆ ଗଛ ଯାହାଥିଲା ସ୍ଥାନୀୟ ଲୋକେ ଲିଜ ସୂତ୍ରରେ ନେଇ ଅର୍ଥ ଉପାର୍ଜନ କରୁଥିଲେ । କିନ୍ତୁ ଏବେ ଲୋକମାନଙ୍କୁ ଲିଜ୍ ଦିଆ ନ ଯାଇ ଅଫିସ୍ ସବୁ ବୁଝାଶୁଝା କରୁଛି। କେବଳ ନଡ଼ିଆ ଚାରା ଦୁର୍ନୀତିରେ ସୀମିତ ନୁହେଁ, ଅନ୍ୟାନ୍ୟ କାର୍ଯ୍ୟରେ ମଧ୍ୟ ଦୁର୍ନୀତି ହେଉଥିବା ଭିକାରୀପଲ୍ଲୀ ପୂର୍ବତନ ସମିତିସଭ୍ୟ ମଥୁରା ସୁବୁଦ୍ଧି ଅଭିଯୋଗ କରିଛନ୍ତି। ରାତିରେ ଆନ୍ଧ୍ରରୁ ଚାରା ଆଣି ଏଠାରେ ରୋପଣ କରାଯାଉଛି। ପରବର୍ତ୍ତୀ ସମୟରେ ଅଧିକ ଦରରେ ଚାଷୀ ଓ ମହିଳା ସ୍ବୟଂ ସହାୟକ ଗୋଷ୍ଠୀ ସହାୟତାରେ ବିକ୍ରି କରାଯାଉଛି। ଅନ୍ୟପକ୍ଷରେ ବୁଧବାର ଟ୍ରକ ଦ୍ୱାରା ଆସିଥିବା ହଜାର ହଜାର ନଡ଼ିଆ ଚାରାକୁ ଓହ୍ଲାଯାଇ ତରବରିଆ ଭାବେ ପୋତାଯାଉଥିଲା । ଏପରିକି ଅଫିସ୍ର ମୁଖ୍ୟ ଫାଟକରେ ତାଲା ପକାଇ ଏହିସବୁ କାର୍ଯ୍ୟ କରାଯାଉଥିଲା। ଉକ୍ତ ଟ୍ରକର ଚାଳକ ମଧ୍ୟ ଗଣମାଧ୍ୟମ ଆଗରେ ଏହାସବୁ ଆନ୍ଧ୍ରରୁ ଆସିଥିବା ସ୍ବୀକାର କରିଥିଲେ। ସ୍ଥାନୀୟ ଚାଷୀମାନଙ୍କ ଠାରୁ ଖବର ପାଇ ଗଣମାଧ୍ୟମ ପ୍ରତିନିଧିମାନେ ପହଞ୍ଚତ୍ବା ପରେ ଅଫିସ ମୁଖ୍ୟ ଫାଟକରେ ତାଲା ପକାଇ ଦିଆଯାଇଥିଲା । କିଛି କର୍ମଚାରୀ ତାଲା ଖୋଲିବାକୁ ଅମଙ୍ଗ ହୋଇଥିଲେ । ବହୁ ସମୟ ପରେ ତାଲା ଖୋଲାଯାଇଥିଲା। ଏ ନେଇ ସହକାରୀ ନିର୍ଦ୍ଦେଶକ ପ୍ରତାପ ପଣ୍ଡାଙ୍କୁ କେଉଁଠୁ ଚାରା ଆସୁଛି, ଏହାର ଟେଣ୍ଡର ହୋଇଛି କି ନାହିଁ ପଚାରିବାରୁ ସେ କୌଣସି ଉତ୍ତର ନ ଦେଇ ଫାଟକ ବନ୍ଦ କରିଦେଇଥିଲେ। ଜିଲା ଉଦ୍ୟାନ ଉପନିର୍ଦ୍ଦେଶକ ସୁବାସ ପଣ୍ଡାକୁ ପଚାରିବାରେ ଅଫିସ ମୁଖ୍ୟ ଫାଟକ ତାଲା ପକାଇ ରଖିବା ନିୟମ ନାହିଁ ବୋଲି କହିଛନ୍ତି । ଚାରା ସବର୍ଦା ପୁରୀ ଜିଲା କିମ୍ବା ଗଜପତିରୁ ହିଁ ଆସିଥାଏ ଏବଂ ଆନ୍ଧ୍ରରୁ ଆସୁଥିବା ସମ୍ପର୍କରେ ସେ ଜାଣନ୍ତି ନାହିଁ ବୋଲି କହିଥିଲେ।
