ନାଉଗାଁ,୧୩ା୧୦(ସୁଧା ବେହୁରା): ନାଉଗାଁ ବ୍ଲକରେ ୪୦ରୁ ଊର୍ଦ୍ଧ୍ୱ ବିଦ୍ୟାଳୟ ବନ୍ଦ ହୋଇରହିଛି। ବିଦ୍ୟାଳୟ ଓ ଗଣ ଶିକ୍ଷା ବିଭାଗର ନିୟମାନୁସାରେ ଯେଉଁ ବିଦ୍ୟାଳୟରେ ୨୦ରୁ କମ୍ ଉପସ୍ଥାନ ଓ ୧ କିଲୋମିଟର ବ୍ୟବଧାନ ମଧ୍ୟରେ ଗୋଟିଏ ଅଧିକ ବିଦ୍ୟାଳୟ ରହିଛି। ସେଗୁଡିକୁ ବନ୍ଦ କରାଯାଇ ନିକଟସ୍ଥ ସର୍ବାଧିକ ଉପସ୍ଥାନ ଥିବା ବିଦ୍ୟାଳୟସହ ମିଶ୍ରଣ କରାଯିବ। ଏହି ନିୟମ ଅନୁଯାୟୀ ଉପରୋକ୍ତ ବିଦ୍ୟାଳୟଗୁଡ଼ିକୁ ବନ୍ଦ କରାଯାଇଥିଲେ ମଧ୍ୟ ଗୃହରେ ତାଲା ପକାଯାଇନାହିଁ। ଏସବୁ ବିଦ୍ୟାଳୟ ଗୃହର ରକ୍ଷଣାବେକ୍ଷଣ ଦାୟିତ୍ୱ ବ୍ଲକ ପ୍ରଶାସନ ଉପରେ ନ୍ୟସ୍ତ କରାଯାଇଛି। କିନ୍ତୁ ପ୍ରଶାସନର ମନମୁଖି କାର୍ଯ୍ୟ ଯୋଗୁ ରକ୍ଷଣାବେକ୍ଷଣ ତ ଦୂରର କଥା ଅନେକ ବିଦ୍ୟାଳୟ ଠିକାଦାରଙ୍କ କବ୍ଜାରେ ରହିଛି। ଏପରିକି କେତେକ ବିଦ୍ୟାଳୟକୁ ଗ୍ରାମବାସୀ ବ୍ୟବହାର କରୁଥିବା ଜଣାଯାଇଛି। ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ବିଦ୍ୟାଳୟ ପ୍ରକୋଷ୍ଠ ନିର୍ମାଣ କରାଯାଇଥିବା ବେଳେ ଅନେକ ବିଦ୍ୟାଳୟରେ ଝରକା, କବାଟ ଭାଙ୍ଗିଯାଇଛି। ଅରିଓଦା ଉପ୍ରା ବିଦ୍ୟାଳୟ, ଚାନ୍ଦପୁରା ଉପ୍ରା ବିଦ୍ୟାଳୟରେ ଠିକାଦାରମାନେ ଶ୍ରମିକ ରଖି କାର୍ଯ୍ୟ କରୁଥିବାବେଳେ ଆଉ କିଛି ବିଦ୍ୟାଳୟ ଧାନ ବେପାରୀଙ୍କ କବଜାରେ ରହିଛି। ଏସବୁ ବିଦ୍ୟାଳୟରେ ଶ୍ରମିକମାନଙ୍କୁ ରଖିବା ପାଇଁ କିଏ ନିର୍ଦ୍ଦେଶ ଦେଇଛି ତାହା ତଦନ୍ତ ସାପେକ୍ଷ। ଏହାଛଡ଼ା ଅନେକ ବିଦ୍ୟାଳୟ ଏବେ ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିଯାଇଛି। ତେଣୁ ବନ୍ଦ ହୋଇ ରହିଥିବା ବିଦ୍ୟାଳୟଗୁଡ଼ିକରେ ତାଲା ପକାଯିବା ସହ ସେଗୁଡ଼ିକର ରକ୍ଷାଣ ବେକ୍ଷଣ ପ୍ରତି ଦୃଷ୍ଟି ଦେବାକୁ ଦାବି ହୋଇଛି। ଏବିଷୟରେ ଜିପିଓ ଦିନେଶ ରାୟଙ୍କୁ ପଚାରିବାରେ, ବନ୍ଦ ହୋଇଥିବା ବିଦ୍ୟାଳୟଗୁଡ଼ିକୁ ଉକ୍ତ ପଞ୍ଚାୟତର ସରପଞ୍ଚ ଓ ପଞ୍ଚାୟତ ଅଧିକାରୀଙ୍କୁ ତାଲା ପକାଇବା ପାଇଁ ନିର୍ଦ୍ଦେଶ ଦିଆଯିବ ବୋଲି କହିଥିଲେ।
