ଆବୁଧାବି,୭।୧୧: ଆଇସିସି ଟେଷ୍ଟ ଚାମ୍ପିୟନଶିପ୍ ଫାଇନାଲ ଭଳି ଚଳିତ ଟି୨୦ ବିଶ୍ୱକପ୍ରେ ମଧ୍ୟ ୧୩୦ କୋଟି ଭାରତୀୟ ନିରାଶ କରିଛି ନ୍ୟୁଜିଲାଣ୍ଡ। ରବିବାର ଅପରାହ୍ନରେ ଖେଳାଯାଇଥିବା ମ୍ୟାଚ୍ରେ ନ୍ୟୁଜିଲାଣ୍ଡ ୮ ଉଇକେଟରେ ଆଫଗାନିସ୍ତାନକୁ ହରାଇ ଦେଇଛି। ଏହି ବିଜୟ ସହ ନ୍ୟୁଜିଲାଣ୍ଡ ସେମିଫାଇନାଲରେ ପ୍ରବେଶ କରିଥିବା ବେଳେ ବିଧିବଦ୍ଧ ଭାବେ ବାଦ୍ ପଡ଼ିଛି ଟିମ୍ ଇଣ୍ଡିଆ।
ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଆଫଗାନିସ୍ତାନର ବ୍ୟାଟରଙ୍କୁ ବିଲକୁଲ ସୁଯୋଗ ଦେଇ ନ ଥିଲେ ନ୍ୟୁଜିଲାଣ୍ଡର ତାରକା ଖଚ୍ଚିତ ପେସର। କେବଳ ବାଜିବୁଲା ଜାଦ୍ରାନ (୭୩ ରନ୍, ୬ ଚୌକା ଓ ୩ ଛକା)ଙ୍କୁ ଛାଡ଼ି ଦେଲେ ଅନ୍ୟ କୌଣସି ବ୍ୟାଟର ଆଖିଦୃଶିଆ ସ୍କୋର କରିପାରି ନ ଥିଲେ। ଫଳରେ ଆଫଗାନିସ୍ତାନ ୮ ଉଇକେଟ ହରାଇ ୧୨୪ ରନ୍ କରିବାକୁ ସକ୍ଷମ ହୋଇଥିଲା। ନ୍ୟୁଜିଲାଣ୍ଡ ପାଇଁ ଟ୍ରେଣ୍ଟ ବୋଲ୍ଟ ୩ ଓ ଟିମ୍ ସୌଦି ୨ ଉଇକେଟ ନେଇଥିଲେ। ଜବାବରେ ୧୮.୧ ଓଭରରେ ମାତ୍ର ୨ ଉଇକେଟ ହରାଇ ନ୍ୟୁଜିଲାଣ୍ଡ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଅଧିନାୟକ କେନ ଓ୍ବିଲିୟମସନ ୪୦ (୩ ଚୌକା) ଓ ଡେଭନ କନଓ୍ବେ ୩୬ (୪ ଚୌକା) ରନ୍ କରି ଅପରାଜିତ ରହିଥିଲେ।
