ମୁନିଗୁଡ଼ା(ଡି.ଏନ୍.ଏ.)/ରାୟଗଡ଼ା ଅଫିସ,୨ା୯:ରାୟଗଡ଼ା ଜିଲା ମୁନିଗୁଡ଼ା ସ୍ଥିତ ଏକ ବେସରକାରୀ ଶିକ୍ଷାନୁଷ୍ଠାନରେ ପାଠ ପଢ଼ି ସିବିଏସ୍ଇ ବୋର୍ଡ ପରୀକ୍ଷା ପାସ୍ କରିବା ପରେ ଏବେ ଛାତ୍ରୀଛାତ୍ର ଅସୁବିଧା ଭୋଗୁଛନ୍ତି। ସ୍ଥାନୀୟ ରୟାଲ ଏକାଡେମୀ ନାମକ ଅନୁଷ୍ଠାନରେ ୮ମ ଶ୍ରେଣୀ ପର୍ଯ୍ୟନ୍ତ ପିଲାଙ୍କୁ ପାଠ ପଢ଼ାଇବା ପାଇଁ ଅନୁମତି ମିଳିଛି। ହେଲେ ଏଠାରେ ୯ମ ଏବଂ ୧୦ମ ଶ୍ରେଣୀ ପିଲାଙ୍କର ବେଆଇନ ଭାବେ ନାମ ଲେଖାଇବା ସହ ପାଠ ପଢ଼ାଚାଲିଛି। ଛାତ୍ରୀଛାତ୍ରଙ୍କଠାରୁ ଲକ୍ଷାଧିକ ଟଙ୍କା ଫିସ୍ ଆକାରରେ ମଧ୍ୟ ନିଆଯାଇଥିଲେ ମଧ୍ୟ ଅନେକ ପିଲାଙ୍କୁ ହଇରାଣ କରିବା ପରେ ଏସ୍ଏଲ୍ସି ଦିଆଯାଇଥିଲା ବୋଲି ଛାତ୍ରୀଛାତ୍ର ଏବଂ ଅଭିଭାବକ ପ୍ରକାଶ କରିଛନ୍ତି। ପିଲାମାନଙ୍କୁ ଏସ୍ଏଲ୍ସି ପାଇଁ କଳାହାଣ୍ଡି ଜିଲା କେସିଙ୍ଗାକୁ ପଠାଯାଉଥିବା ସେମାନେ କହିଛନ୍ତି।
ସୂଚନାଯୋଗ୍ୟ, ରୟାଲ ଏକାଡେମୀରେ ନବମ ଏବଂ ଦଶମ ଶ୍ରେଣୀ ପିଲାଙ୍କୁ ପାଠ ପଢ଼ାଇବା ପାଇଁ ଅନୁମତି ମିଳିନାହିଁ। ଫଳରେ ସ୍କୁଲ କର୍ତ୍ତୃପକ୍ଷ କେସିଙ୍ଗାସ୍ଥିତ ନିଉ ଲାଇଫ୍ ଏକାଡେମୀରେ ଉକ୍ତ ୨ଶ୍ରେଣୀର ଛାତ୍ରୀଛାତ୍ରଙ୍କ ନାମ ଲେଖାଇଥାନ୍ତି। ପରୀକ୍ଷା ମଧ୍ୟ କେସିଙ୍ଗା ଯାଇ ଦେବାକୁ ହୁଏ। ହେଲେ ପାଠପଢ଼ା ମୁନିଗୁଡ଼ା ସ୍ଥିତ ରୟାଲ ଏକାଡେମୀରେ ହୋଇଥାଏ। ତେବେ ରୟାଲ ଏକାଡେମୀରେ ଭଲ ପାଠପଢ଼ା ହେଉ ନ ଥିବାରୁ ପିଲାମାନଙ୍କୁ ଟ୍ୟୁଶନ ପଠାଇବାକୁ ବାଧ୍ୟହେଉଛନ୍ତି ବୋଲି ଅଭିଭାବକମାନେ କହିଛନ୍ତି। ପୂର୍ବରୁ ଏଠାରେ ରୟାଲ ସାଇନ୍ସ କଲେଜ ନାମରେ ଯୁକ୍ତ ୨ ପର୍ଯ୍ୟନ୍ତ ପାଠପଢ଼ା ଚାଲିଥିଲା। ଆବଶ୍ୟକ ଅନୁମତି(ଆଫିଲିଏଶନ) ନ ମିଳିବାରୁ ତାହା ବନ୍ଦ ହୋଇଥିଲା। ସରକାରୀ ଅନୁମତି ଓ ଶିକ୍ଷା ଉପଯୋଗୀ ପରିବେଶ ନ ଥାଇ ମଧ୍ୟ ଏବେ ଏହି ଶିକ୍ଷା ଅନୁଷ୍ଠାନରେ ନବମ ଏବଂ ଦଶମ ଶ୍ରେଣୀ ପାଠପଢ଼ା ଚାଲିଥିବା ଜଣାପଡ଼ିଛି। ଏଭଳି ଅନୁଷ୍ଠାନ ବିରୋଧରେ ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ନେବା ନିମନ୍ତେ ଦାବି ହୋଇଛି।
ନବମ ଓ ଦଶମ ଶ୍ରେଣୀ ନାମଲେଖା ନିମନ୍ତେ ସରକାରୀ ଅନୁମତି ନେଇ ରୟାଲ ଏକାଡେମୀର ମୁଖ୍ୟ ପ୍ରବୀଣ ସିପକାଙ୍କୁ ପଚାରିବାରୁ ସେ କୌଣସି ସନ୍ତୋଷଜନକ ଉତ୍ତର ଦେଇନାହାନ୍ତି। ମୁନିଗୁଡ଼ା ବିଇଓ ଭାସ୍କରଙ୍କୁ ପଚାରିବାରୁ ସେ କହିଛନ୍ତି, ୯ମ ଓ ୧୦ମ ଶ୍ରେଣୀ ପିଲାଙ୍କ ନାମଲେଖା ଏବଂ ପାଠପଢ଼ା ପାଇଁ ରୟାଲ ଏକାଡେମୀକୁ ଅନୁମତି ମିଳିନାହିଁ। ତଥାପି ପିଲାଙ୍କ ନାମ ଲେଖାଯାଉଛି। ନୋ ଅବ୍ଜେକ୍ସନ ସାର୍ଟିଫିକେଟ(ଏନ୍ଓସି) ପାଇଁ ସ୍କୁଲ କର୍ତ୍ତୃପକ୍ଷଙ୍କୁ କୁହାଯାଇଥିଲା ବୋଲି ସେ କହିଛନ୍ତି। ଅନ୍ୟପକ୍ଷରେ ଏ ନେଇ ଡିଇଓ ପୂର୍ଣ୍ଣଚନ୍ଦ୍ର ବରିହାଙ୍କୁ ପଚାରିବାରୁ ସେ କହିଛନ୍ତି, ସ୍କୁଲ କର୍ତ୍ତୃପକ୍ଷଙ୍କୁ ୩ ମାସ ତଳେ ତାଗିଦ କରାଯାଇଛି। ଏବେ ବିଭାଗୀୟ ଅଧିକାରୀଙ୍କୁ ବୁଝି ପଦକ୍ଷେପ ନିଆଯିବ ବୋଲି ସେ କହିଛନ୍ତି। ତେବେ ବେଆଇନ ଭାବେ ଏକ ସ୍କୁଲ ଚାଲିଥିବା ଅଧିକାରୀମାନେ ଜାଣି ମଧ୍ୟ ଏ ପର୍ଯ୍ୟନ୍ତ କାର୍ଯ୍ୟାନୁଷ୍ଠାନ ନ ହେବାକୁ ନେଇ ପ୍ରଶ୍ନ ଉଠୁଛି। ରୟାଲ ଏକାଡେମୀ ଭଳି ଜିଲାରେ ଆଉ କେତେ ଅନୁଷ୍ଠାନ ଏଭଳି ଚାଲିଛି ସେ ନେଇ ଯାଞ୍ଚ କରାଯାଉ ବୋଲି ବୁଦ୍ଧିଜୀବୀଙ୍କ ମଧ୍ୟରେ ମତପ୍ରକାଶ ପାଇଛି।
