ଗୁଆହାଟୀ,୨୯।୯: ସ୍ବତନ୍ତ୍ର ସଘନ ସଂଶୋଧନ (ଏସ୍ଆଇଆର୍) ନାମରେ ଭୋଟର ତାଲିକାରୁ ୧୩ କୋଟି ଲୋକଙ୍କ ନାମକୁ ବାଦ୍ ଦିଆଯାଇଥିବା ଅଭିଯୋଗକୁ ନେଇ ସିଇସି ଜ୍ଞାନେଶ କୁମାରଙ୍କ ଇସ୍ତଫା ଦାବିରୁ କକ୍ରୋଚ ଜନତା ପାର୍ଟି (ସିଜେପି) ଓହରିବ ନାହିଁ ବୋଲି ଏହାର ମୁଖପାତ୍ର ଆଶୁତୋଷ ରାଙ୍କା ସୋମବାର କହିଛନ୍ତି । ଜ୍ଞାନେଶ କୁମାରଙ୍କ ବିରୋଧରେ ଆସିଥିବା ଅଭିଯୋଗ ଉପରେ ସେ ଗଣମାଧ୍ୟମ ଆଗରେ ଓ ସର୍ବସାଧାରଣରେ ସ୍ପଷ୍ଟୀକରଣ ରଖିବାକୁ ରାଙ୍କା ଆହ୍ବାନ ଦେଇଛନ୍ତି । ଉକ୍ତ ଅଭିଯୋଗ ଉପରେ ଜ୍ଞାନେଶଙ୍କୁ ଭାଜପା କାହିଁକି ସୁରକ୍ଷା ଦେଉଛି ବୋଲି ସେ ପ୍ରଶ୍ନ କରିଛନ୍ତି।
ଇସ୍ତଫା ସମ୍ପର୍କରେ ଜ୍ଞାନେଶ ୪୮ ଘଣ୍ଟା ମଧ୍ୟରେ ନିଷ୍ପତ୍ତି ନେବାକୁ ସିଜେପି ଗତ ୨୪ ତାରିଖରେ ଆହ୍ବାନ ଦେଇଥିଲା। ଏହି ସମୟ ଅତିକ୍ରାନ୍ତ ହୋଇଯାଇଥିବାରୁ ଏବେ ନିଷ୍ପତ୍ତି ସିଜେପି ହାତରେ। ଅକ୍ଟୋବର ୨ରୁ ସିଜେପି ଦେଶବ୍ୟାପୀ ଆନ୍ଦୋଳନ ଆରମ୍ଭ କରିବ ଏବଂ ସିଇସି ଇସ୍ତଫା ନ ଦେବା ପର୍ଯ୍ୟନ୍ତ ଓହରିବ ନାହିଁ। ସିଜେପି ଏଭଳି ଏକ ମଞ୍ଚ, ଯାହା ଯେଉଁ ପ୍ରସଙ୍ଗରେ ସମ୍ପୃକ୍ତ ହୁଏ, ନ ଜିତିବା ପର୍ଯ୍ୟନ୍ତ ସେଥିରୁ ଓହରେ ନାହିଁ ବୋଲି ରାଙ୍କା ଗୁଆହାଟୀଠାରେ ଖବରଦାତାମାନଙ୍କୁ କହିଛନ୍ତି।
ରବିବାର ରାଙ୍କା ଓ ସିଜେପିର ସମର୍ଥକମାନଙ୍କୁ ଗୁଆହାଟୀରେ ପୋଲିସ ଅଟକ ରଖିଥିଲା। ଆସାମ ସ୍କୁଲଗୁଡ଼ିକର ବାସ୍ତବତାକୁ ପଦାରେ ପକାଇବାକୁ ଚାହୁଁଥିବାରୁ ସେମାନଙ୍କୁ ଅଟକ ରଖାଯାଇଥିବା ଅଭିଯୋଗ ହୋଇଥିଲା।