ନୂଆଦିଲ୍ଲୀ,୨୬।୮:ଭାରତର ୪୮ତମ ପ୍ରଧାନ ବିଚାରପତି ଭାବେ ଜଷ୍ଟିସ ଏନ୍.ଭି. ରମନା ୨୦୨୧ ଏପ୍ରିଲରେ ଦାୟିତ୍ୱ ଗ୍ରହଣ କରିଥିଲେ। ୧୬ ମାସର କାର୍ଯ୍ୟକାଳ ପରେ ଶୁକ୍ରବାର ସେ ଅବସର ଗ୍ରହଣ କରିବାକୁ ଯାଉଛନ୍ତି। ତାଙ୍କ କାର୍ଯ୍ୟକାଳ ମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇ ଦେଶବାସୀଙ୍କ ମନରେ ନ୍ୟାୟ ବ୍ୟବସ୍ଥା ପ୍ରତି ଆସ୍ଥା ବଢ଼ାଇ ପାରିଛନ୍ତି।
କୋଭିଡ୍-୧୯ ଦ୍ୱିତୀୟ ଲହରର ଭୟାବହତା ଧୀରେ ଧୀରେ ହ୍ରାସ ପାଉଥିବାବେଳେ ଓଡ଼ିଶାର ବିଭିନ୍ନ ସ୍ଥାନରେ ରଥଯାତ୍ରା ଆୟୋଜନ ଲାଗି ଅନୁମତି ନିମନ୍ତେ କେତେଜଣ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ତେବେ ମହାମାରୀର ଭୟଙ୍କର ସ୍ଥିତିକୁ ଦୃଷ୍ଟିରେ ରଖି ସିଜେଆଇ ରମନା ପୁରୀ ବ୍ୟତୀତ ଅନ୍ୟ ସ୍ଥାନରେ ରଥଯାତ୍ରା ଆୟୋଜନ ଲାଗି ଅନୁମତି ଦେବାକୁ ମନା କରିଦେଇଥିଲେ। ଆସନ୍ତା ବର୍ଷ ପ୍ରଭୁ ଶ୍ରୀଜଗନ୍ନାଥ ଆମକୁ ରଥାଯାତ୍ରା ଲାଗି ଅନୁମତି ଦେବେ ବୋଲି ସେ ସେତେବେଳେ ଆଶାବ୍ୟକ୍ତ କରିଥିଲେ। ୧୬ ମାସର କାର୍ଯ୍ୟକାଳ ମଧ୍ୟରେ ଜଷ୍ଟିସ୍ ରମନା ଓଡ଼ିଶାର ଏକାଧିକ ମାମଲାର ଶୁଣାଣି କରିଛନ୍ତି। ଓଡ଼ିଶା ହାଇକୋର୍ଟରେ ୧୧ ଜଣ ବିଚାରପତିଙ୍କ ନିଯୁକ୍ତି ଲାଗି ତାଙ୍କ ନେତୃତ୍ୱରେ ଗଠିତ ସୁପ୍ରିମକୋର୍ଟ କଲେଜିୟମ ସୁପାରିସ କରିଥିଲେ।
୨୦୨୧ ମେ’ରେ ନରେନ୍ଦ୍ର ମୋଦିଙ୍କ ସରକାର ରାକେଶ ଅସ୍ଥାନାଙ୍କୁ ସିବିଆଇ ନିର୍ଦ୍ଦେଶକ ଭାବେ ନିଯୁକ୍ତି ଦେବାକୁ ଚାହୁଁଥିବାବେଳେ ସିଜେଆଇ ତାହା ହେବାକୁ ନ ଦେଇ ଲୋକଙ୍କ ମଧ୍ୟରେ ଆଶାର ଉଦ୍ରେକ କରାଇଥିଲେ। ସିଜେଆଇ ଭାବେ ୧୬ ମାସର କାର୍ଯ୍ୟକାଳ ମଧ୍ୟରେ ଜଷ୍ଟିସ ରମନା ନାଗରିକତ୍ୱ ସଂଶୋଧନ ଆଇନ, ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ ଉଚ୍ଛେଦ, ଇଲେକ୍ଟୋରାଲ ବଣ୍ଡକୁ ଚ୍ୟାଲେଞ୍ଜ, ହିଜାବ ନିଷେଧ ମାମଲା ଏବଂ ୟୁଏପିଏ ଭଳି ଅନେକ ଗୁରୁତ୍ୱପୂର୍ଣ୍ଣ ମାମଲାର ଶୁଣାଣି କରିବେ ବୋଲି ବିଶ୍ୱାସ କରାଯାଉଥିଲା। ତେବେ ଏଥିରୁ ଗୋଟିଏ ହେଲେ ମାମଲା ତାଙ୍କ ସମୟରେ ଅଦାଲତର ଆଲୋକ ଦେଖିପାରିଲା ନାହିଁ। ଅବସର ନେବାର ଦିନକ ପୂର୍ବରୁ ପେଗାସସ୍ ଗୁପ୍ତଚର ମାମଲାର ଶୁଣାଣି କରିଛନ୍ତି ଜଷ୍ଟିସ ରମନା। ବିଲ୍କିସ ବାନୋ ଗଣବଳାତ୍କାର ଓ ହତ୍ୟା ମାମଲାରେ ୧୧ ଜଣ ଅପରାଧୀଙ୍କୁ ମୁକ୍ତ କରାଯିବାକୁ ଚ୍ୟାଲେଞ୍ଜ କରି ଦାଏର ପିଟିଶନଗୁଡ଼ିକର ଶୁଣାଣି କରି ସିଜେଆଇ ଗୁଜରାଟ ସରକାରଙ୍କୁ ନୋଟିସ ଜାରି କରିଛନ୍ତି।
