ପାରାଦୀପ,୧୨।୨(ଶରତ ରାଉତ):ଖଣିଜ ସମ୍ପଦ ଚୋରା କାରବାର ଦିନକୁ ଦିନ ବଢ଼ିଚାଲିଛି। ଏହାର ଏକ ବଡ଼ ଉଦାହରଣ ମଙ୍ଗଳବାର ପାରାଦୀପରେ ଦେଖିବାକୁ ମିଳିଛି। ସୁକିନ୍ଦା କାଳିଆପାଣି ଖଣିରୁ କ୍ରୋମାଇଟ ବୋଝେଇ କରି ଆସିଥିବା ୪ଟି ଟ୍ରକରୁ ପଣ୍ୟ ଗାଏବ ହୋଇଯାଇଛି। ସେଥିରେ ମାଟି ରହିଛି। ଏହାକୁ ପୋଲିସ ଧରିବା ପରେ ଟ୍ରକଚାଳକମାନେ ଗାଡ଼ି ଛାଡି ଫେରାର ହୋଇଯାଇଛନ୍ତି। ସାରେ ପୋଲିସ ଗାଡ଼ିଗୁଡିକୁ ଅଠରବାଙ୍କୀ ଟର୍ମିନାଲ ଛକରୁ ଆଣି ପାରାଦୀପ ଆଦର୍ଶଥାନା ଆଗରେ ରଖି ତଦନ୍ତ ଆରମ୍ଭ କରିଛି। ରିପୋର୍ଟ ଲେଖା ହେବା ସୁଦ୍ଧା କୌଣସି ମାମଲା ରୁଜୁ ହୋଇ ନ ଥିଲା। ପାରାଦୀପ ଆଦର୍ଶ ଥାନାଧିକାରୀ କାବୁଲି ବାରିକଙ୍କ ସୂଚନା ଅନୁଯାୟୀ, ଏକ ବିଶେଷ ସୂତ୍ରରୁ ଖବରପାଇ ପୋଲିସ ପକ୍ଷରୁ ଉକ୍ତଗାଡ଼ିକୁ ଯାଞ୍ଚ କରାଯାଇଥିଲା। ଯାଞ୍ଚ ବେଳେ ଜଣାପଡ଼ିଥିଲା ଯେ, ୪ଟି ୬ ଚକିଆ ଟ୍ରକରେ ମାଟି ବୋଝେଇ ହୋଇଛି। ଏହି ମାଟି ଉପରେ କ୍ରୋମାଇଟ ଛିଞ୍ଚାଯାଇଛି। ଏହା ଜାଣିବା ପରେ ଯୋଡ଼ା ମାଇନ୍ସ ଡିପାର୍ଟମେଣ୍ଟକୁ ଖବର ଦେଇଛୁ। ସେମାନେ ଆସି ଯାଞ୍ଚ କରି ରିପୋର୍ଟ ଦେବାପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ବାରିକ କହିଛନ୍ତି।
ଉକ୍ତ କ୍ରୋମାଇଟ ଚାଲାଣ ପଛରେ ଏକ କମ୍ପାନୀ ଓ ଢେଙ୍କାନାଳ ଅଞ୍ଚଳର କେତେଜଣ ପ୍ରଭାବଶାଳୀ ଲୋକ ଥିବା ଚର୍ଚ୍ଚା ହେଉଛି। ସମ୍ପୃକ୍ତ କମ୍ପାନୀ ଜରିଆରେ ଏହା ସୁକିନ୍ଦା କାଳିଆପାଣି ଖଣିରୁ ଉତ୍ତୋଳନ ହୋଇ ଟ୍ରକ ଯୋଗେ ପାରାଦୀପ ବନ୍ଦର ଆସୁଥିଲା। ବନ୍ଦର ମଧ୍ୟରେ ଥିବା ଘରୋଇ କମ୍ପାନୀ ଏହି କ୍ରୋମାଇଟକୁ ବିଦେଶକୁ ରପ୍ତାନି କରିଥାନ୍ତା। କାଳିଆପାଣି ଖଣିରୁ ଟ୍ରକ୍ଗୁଡ଼ିକ ବାହାରିବା ପରେ ଚଣ୍ଡିଖୋଲ ଦେଇ ପାରାଦୀପ ଆସିଥାନ୍ତା। କିନ୍ତୁ ଚଣ୍ଡିଖୋଲଠାରୁ ଜାରକା ଆଡେ ଯାଇଥିଲା। ଏକ ହୋଟେଲ ପାଖରେ ୧୦ରୁ ଅଧିକ କ୍ରୋମାଇଟ ଟ୍ରକ୍ ଅଟକି ଥିଲା। ସେଠାରୁ ଯାଇ ଓଜନକଣ୍ଟା ପାଖରେ କ୍ରୋମାଇଟ ଖଲାସ କରାଯାଇଥିଲା। ପ୍ରାୟ ସବୁ ଟ୍ରକ୍ରେ ୧୧ ଟନ୍ ଲେଖାଏ କ୍ରୋମାଇଟ ରହିଥିଲା। ଖଲାସ ପରେ ଟ୍ରକ୍ରେ ପ୍ରାୟ ୯ରୁ ୧୦ ଟନ ମାଟି ବୋଝେଇ କରାଯାଇଥିଲା। ଉପରିଭାଗରେ ୧ରୁ ୨ ଟନ କ୍ରୋମାଇଟ ବୋଝେଇ କରାଯାଇଥିଲା। ପାରାଦୀପ ପୋଲିସ ଏ ସମ୍ପର୍କରେ ସୂଚନା ପାଇବା ପରେ ଅଠରବାଙ୍କୀ ଟର୍ମିନାଲ ଛକରେ ଚଢ଼ାଉ କରିଥିଲା।
