ଆବୁଧାବି, ୨୧ା୧୨- ଆସନ୍ତା ଜାନୁୟାରୀ ୨୮ରୁ ଫେବୃୟାରୀ ୬ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଯାଉଛି ଆବୁଧାବୀ ଟି୧୦ ଲିଗ୍ର ୪ର୍ଥ ସଂସ୍କରଣ। ଏଥିରେ ଓ୍ବେଷ୍ଟଇଣ୍ଡିଜର କ୍ରିସ୍ ଗେଲ୍, ଅଲରାଉଣ୍ଡର ଡ୍ବେନ୍ ବ୍ରାଭୋ ଓ ପାକିସ୍ତାନର ପୂର୍ବତନ ଅଧିନାୟକ ଶାହିଦ ଆଫ୍ରିଦୀ ଅଂଶଗ୍ରହଣ କରିବେ। ଏମାନଙ୍କ ବ୍ୟତୀତ ଅନେକ ଅନ୍ତର୍ଜାତୀୟ ତାରକା ଖେଳାଳି ଭାଗ ନେବେ ବୋଲି ଲିଗ୍ ପକ୍ଷରୁ ସୋମବାର ସ୍ପଷ୍ଟ କରାଯାଇଛି।
ପୂରା ଲିଗ୍ ଜାୟେଦ କ୍ରିକେଟ ଷ୍ଟାଡିୟମରେ ଖେଳାଯିବ। ଟି୨୦ ଫର୍ମାଟରେ ହଜାରେରୁ ଅଧିକ ଛକା ମାରିଥିବା ଗେ୍ଲ ଟିମ୍ ଆବୁଧାବିର ଆଇକନ୍ ପାଇଁ ପ୍ରତିନିଧିତ୍ୱ କରିବେ। ସେହିଭଳି କଲନ୍ଦର୍ସ ପାଇଁ ଆଫ୍ରିଦୀ, ଦିଲ୍ଲୀ ବୁଲ୍ସ ପକ୍ଷରୁ ବ୍ରାଭୋ, ରସେଲ ନର୍ଦର୍ନ ଓ୍ବାରିୟର୍ସ ଏବଂ ସୁନୀଲ ନାରିନ୍ ଡେକାନ ଗ୍ଳାଡିଏଟର୍ସ ପାଇଁ ଆଇକନ ଖେଳାଳି ଭାବେ ବିବେଚିତ ହୋଇଛନ୍ତି। ଉଭୟ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଓ ଏମିରେଟ୍ସ କ୍ରିକେଟ ବୋର୍ଡର ସାହାଯ୍ୟ ଓ ସମର୍ଥନ ପାଇବାରେ ଆବୁଧାବି ଟି୧୦ ଲିଗ୍ ହେଉଛି ବିଶ୍ୱର ପ୍ରଥମ ୧୦ ଓଭର ବିଶିଷ୍ଟ ଟୁର୍ନାମେଣ୍ଟ।
