ବରଗଡ଼ ଅଫିସ୍,୧୭।୧: ଚିଟଫଣ୍ଡ୍ ସଂସ୍ଥାରେ କ୍ଷତିଗ୍ରସ୍ତ ଜମାକାରୀମାନେ ଏପର୍ଯ୍ୟନ୍ତ ସେମାନଙ୍କ ଜମାଟଙ୍କା ଫେରି ପାଇନାହାନ୍ତି। ଏହାକୁ ନେଇ ସମ୍ପୃକ୍ତ ଜମାକାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସୋମବାର ଚିଟଫଣ୍ଡ୍ କ୍ଷତିଗ୍ରସ୍ତ ମିଳିତ ମଞ୍ଚ ବରଗଡ଼ ଜିଲା ଜିଲାପାଳ ଅଫିସ ଆଗରେ ଧାରଣା ଦିଆଯାଇଥିଲା। ଏପର୍ଯ୍ୟନ୍ତ ସେମାନେ ଜମାଟଙ୍କା ଫେରି ପାଇ ନ ଥିବା ଯୋଗୁ ଆଗାମୀ ପଞ୍ଚାୟତ ଭୋଟ୍କୁ ବର୍ଜନ କରିବେ ବୋଲି ଧାରଣାକାରୀମାନେ କହିଛନ୍ତି। ଏପରିକି ଯେ ପର୍ଯ୍ୟନ୍ତ ସେମାନଙ୍କୁ ଜମାଟଙ୍କା ଫେରସ୍ତ ମିଳିବ ନାହିଁ ସେତେଦିନ ପର୍ଯ୍ୟନ୍ତ ସେମାନେ ନିର୍ବାଚନ ବର୍ଜନ କରି ଆସୁଥିବେ ବୋଲି ଜମାକାରୀମାନେ ଚେତାବନୀ ଦେଇଛନ୍ତି।
ଚିଟଫଣ୍ଡ୍ ସଂସ୍ଥାଭାବେ ଚିହ୍ନଟ ବିଭିନ୍ନ ଅର୍ଥ ଲଗାଣକାରୀ ସଂସ୍ଥାରେ ବହୁଲୋକେ ଅର୍ଥ ଜମା କରି ଆସିଥିଲେ। ପରେ ସମ୍ପୃକ୍ତ ସଂସ୍ଥାଗୁଡ଼ିକ ଲୋକଙ୍କୁ ବିଭିନ୍ନ ପ୍ରଲୋଭନ ଦେଖାଇ ଠକିଥିବା ପଦାକୁ ଆସିଥିଲା। ଏହାପରେ ସମ୍ପୃକ୍ତ ସଂସ୍ଥାଗୁଡ଼ିକ ବିରୋଧରେ ରାଜ୍ୟ ସରକାର କାର୍ଯାନୁଷ୍ଠାନ ନେଇଥିଲେ। ଏହା ସହିତ ଜମାକାରୀ କ୍ଷତିଗ୍ରସ୍ତ ଲୋକଙ୍କୁ ଚିହ୍ନଟ କରାଯିବା ପାଇଁ ଗତ ୨୦୧୩ରେ କମିଶନ ଗଠନ କରାଯାଇଥିଲା। ସେହିପରି ବିଭିନ୍ନ ଅର୍ଥ ଲଗାଣକାରୀ ସଂସ୍ଥାର ସମ୍ପତ୍ତି ଜବତ ହୋଇଥିଲା। ମାତ୍ର ଏପର୍ଯ୍ୟନ୍ତ ଜମାକାରୀଙ୍କୁ ଟଙ୍କା ଫେରସ୍ତ ମିଳି ନ ଥିବା ଅଭିଯୋଗ ହୋଇଛି। ଏହାର ପ୍ରତିବାଦରେ ଚିଟଫଣ୍ଡ୍ କ୍ଷତିଗ୍ରସ୍ତ ମିଳିତ ମଞ୍ଚକୁ ଓହ୍ଲାଇଥିବା ମଞ୍ଚର କର୍ମକର୍ତ୍ତାମାନେ କହିଛନ୍ତି। ଆନ୍ଦାଳନରେ ମଞ୍ଚ ନେତା ରମେଶ ମହାପାତ୍ର, ଜିଲା ସଂଯୋଜକ ସୁଶାନ୍ତ ମହାପାତ୍ର, ସୁଦାମ ବେହେରା, ଶତୃଘ୍ନ ମହାକୁର, ଲୋକନାଥ ଜାଲ, ସୁନିଲ ବାଗ, ଜଗନ୍ନାଥ ଷଡ଼ଙ୍ଗୀ ପ୍ରମୁଖ ଏଥିରେ ଅଂଶଗ୍ରହଣ କରିଥିଲେ।
