ଇସଲାମାବାଦା,୬।୧୧ : ପାକିସ୍ତାନରେ ଚାଲିଥିବା ସିପିଇସି ପ୍ରକଳ୍ପ ନେଇ ଏକ ଗୁରୁତ୍ୱପୂର୍ଣ୍ଣ ସୂଚନା ସାମ୍ନାକୁ ଆସିଛି। କୁହାଯାଉଛି ଯେ ଏହି ପ୍ରକଳ୍ପରେ କାର୍ଯ୍ୟ କରୁଥିବା ସମସ୍ତ ଚାଇନା ଶ୍ରମିକ ଏବଂ କର୍ମଚାରୀଙ୍କୁ ବୁଲେଟ ପ୍ରୁଫ କାର୍ ଯୋଗାଇ ଦେବାକୁ ପାକିସ୍ତାନ ସରକାର ନିଷ୍ପତ୍ତି ନେଇଛନ୍ତି। ଏହି ସମସ୍ତ ଶ୍ରମିକମାନେ ବର୍ତ୍ତମାନ ବାହ୍ୟ କାର୍ଯ୍ୟକଳାପ ପାଇଁ ବୁଲେଟ ପ୍ରୁଫ ଯାନ ବ୍ୟବହାର କରିପାରିବେ।
ସିପିଇସି ପ୍ରକଳ୍ପରେ କାର୍ଯ୍ୟ କରୁଥିବା ଚାଇନାର ଶ୍ରମିକମାନେ ଆତଙ୍କବାଦୀ ଆକ୍ରମଣର ସମ୍ମୁଖୀନ ହୋଇଥିଲେ। ଏହି କାରଣରୁ ଚାଇନା ସରକାର ଚିନ୍ତା ପ୍ରକଟ କରି ପାକିସ୍ତାନ ସରକାରଙ୍କୁ ସେମାନଙ୍କ ସୁରକ୍ଷା ପାଇଁ କହିଥିଲେ। ଚାଇନାର ଅନୁରୋଧ ପରେ ପାକିସ୍ତାନ ସରକାର ସମସ୍ତ ଚାଇନା କର୍ମଚାରୀଙ୍କୁ ବୁଲେଟ ପ୍ରୁଫ କାର୍ ଦେବାକୁ ନିଷ୍ପତ୍ତି ନେଇଛନ୍ତି।
ସୂଚନାଯୋଗ୍ୟ, ଚଳିତ ବର୍ଷ ଜୁଲାଇ ୧୩ ରେ ପାକିସ୍ତାନର ଖାଇବର ପସ୍ତୁନଖ୍ବା ପ୍ରଦେଶରେ ଏକ ବଡ଼ ଧରଣର ବୋମା ବିସ୍ଫୋରଣ ଘଟି ୧୩ ଜଣ ଚାଇନା କର୍ମଚାରୀଙ୍କ ମୃତ୍ୟୁ ଘଟିଥିଲା। ଏହି ସମସ୍ତ ଶ୍ରମିକ ୪୩୨୦ ମେଗାୱାଟ ଦାସୁ ଜଳ ବିଦ୍ୟୁତ ପ୍ରକଳ୍ପରେ କାମ କରିବାକୁ ଯାଉଥିଲେ। କିନ୍ତୁ ପରେ ଆତଙ୍କବାଦୀମାନେ ସେମାନଙ୍କ ବସକୁ ଟାର୍ଗେଟ କରି ବିସ୍ଫୋରଣ କରିଥିଲେ। ଏହି ଆକ୍ରମଣ ପରେ ଜଳ ବିଦ୍ୟୁତ ପ୍ରକଳ୍ପ କାର୍ଯ୍ୟ ବନ୍ଦ ହୋଇଯାଇଥିଲା। ତେବେ, ୨୬ ଅକ୍ଟୋବରରେ, କାର୍ଯ୍ୟ ପୁଣି ଥରେ ଆରମ୍ଭ ହୋଇଥିଲା।
