ବେଜିଂ/କାଠମାଣ୍ଡୂ,୨୫।୨ : ନେପାଳ ସରକାରଙ୍କ ସମ୍ମୁଖରେ ଏକ ନୂତନ ବୈଦେଶିକ ନୀତି ଆହ୍ବାନ ସୃଷ୍ଟି ହୋଇଛି। ଚାଇନାର ନୂତନ ଗ୍ଲୋବାଲ ସିକ୍ୟୁରିଟି ଇନିସିଏଟିଭ (ଜିଏସଆଇ) ର ନେପାଳ ଅଂଶ ହେବ କି ନାହିଁ ତାହା ଶୀଘ୍ର ନିଷ୍ପତ୍ତି ନେବାକୁ ପଡିବ। ଚାଇନା ଏହାର ଜିଏସଆଇ ଡକ୍ୟୁମେଣ୍ଟ ପ୍ରକାଶ କରିଛି। ଏଥିରେ ପରିବର୍ତ୍ତନଶୀଳ ଅନ୍ତର୍ଜାତୀୟ ପରିସ୍ଥିତି ଅନୁଯାୟୀ ସମସ୍ତ ଦେଶ ନିଜକୁ ଗଢ଼ିବା ପାଇଁ ଆହ୍ବାନ ଦିଆଯାଇଛି। ଚାଇନା ଦାବି କରିଛି ଯେ ଅନ୍ତର୍ଜାତୀୟ ବିବାଦର ମୂଳ କାରଣକୁ ସମାଧାନ କରିବା ଏବଂ ବିଶ୍ୱରେ ଅଧିକ ସ୍ଥିରତା ଆଣିବା ପାଇଁ ଜିଏସଆଇ ଲକ୍ଷ୍ୟ ରଖିଛି।
କାଠମାଣ୍ଡୁରେ ଥିବା ଚାଇନା ଦୂତାବାସ ଏଠାରେ ଗଣମାଧ୍ୟମ ବ୍ୟକ୍ତିଙ୍କ ମଧ୍ୟରେ ଜିଏସଆଇ ଡକ୍ୟୁମେଣ୍ଟର କପି ବଣ୍ଟନ କରିଥିଲା। ନେପାଳୀ ଗଣମାଧ୍ୟମ ଅନୁଯାୟୀ, ଜିଏସଟିର ଆନୁଷ୍ଠାନିକ ଘୋଷଣା ପୂର୍ବରୁ ଚାଇନା ନେପାଳ ସରକାରଙ୍କ ନିକଟରେ ଏହାର ଅଂଶ ହେବାକୁ ଆମନ୍ତ୍ରଣ କରିଥିଲା। କିନ୍ତୁ ନେପାଳ ସରକାର କହିଛନ୍ତି ଯେ ଏପର୍ଯ୍ୟନ୍ତ ଏ ବିଷୟରେ ଅଧିକ ସୂଚନା ଆବଶ୍ୟକ। ଆମ ପାଇଁ ଆମର ସୁରକ୍ଷା ପ୍ରସଙ୍ଗ ଅଧିକ ଗୁରୁତ୍ୱପୂର୍ଣ୍ଣ।
ଖବରକାଗଜ କାଠମାଣ୍ଡୁ ପୋଷ୍ଟ କହିଛି ଯେ ନେପାଳର ନୀତି କୌଣସି ସୁରକ୍ଷା କିମ୍ବା ସାମରିକ ମିଳିତ ମଞ୍ଚରେ ଯୋଗଦେବା ନୁହେଁ। ଗତ ବର୍ଷ ଯେତେବେଳେ ନେପାଳ ଆମେରିକୀୟ ମିଲେନିୟମ ଚ୍ୟାଲେଞ୍ଜ କର୍ପୋରେଶନ ତରଫରୁ ୫୦୦ ମିଲିୟନ ଡଲାର୍ ସହାୟତା ନେଇଥିଲା, ସେତେବେଳେ ନେପାଳ ସଂସଦ ସର୍ବସମ୍ମତି କ୍ରମେ ଏକ ସଂକଳ୍ପ ପାରିତ କରି ଦେଶର ଆଭିମୁଖ୍ୟ ସ୍ପଷ୍ଟ କରିଥିଲେ। ଏଭଳି ପରିସ୍ଥିତିରେ ନେପାଳ ସରକାରଙ୍କ ପାଇଁ ଜିଏସଆଇର ଅଂଶ ହେବା କଷ୍ଟକର।
ଚାଇନାରେ ନେପାଳର ରାଷ୍ଟ୍ରଦୂତ ଥିବା ବିଷ୍ଣୁ ପୁକର ଶ୍ରେଷ୍ଠ କାଠମାଣ୍ଡୁ ପୋଷ୍ଟକୁ କହିଛନ୍ତି ଚାଇନା ଏହାର ଡକ୍ୟୁମେଣ୍ଟ ପ୍ରକାଶ କରିଛି। କିନ୍ତୁ ଆମେ ଏ ବିଷୟରେ ଆମର ମତାମତ ଦେଇନାହୁଁ। ଏହି ପ୍ରସଙ୍ଗରେ ବିସ୍ତୃତ ମତାମତ ପରାମର୍ଶର ଆବଶ୍ୟକତା ରହିବ।
