ନୂଆଦିଲ୍ଲୀ, ୩।୯: ଭାରତକୁ ସମୁଦ୍ର ସୀମାରେ ଘେରିବା ପାଇଁ ଚାଇନା ଷଡ଼ଯନ୍ତ୍ର କରିଛି। ଚାଇନା ପୃଥିବୀର ସମସ୍ତ ଦେଶକୁ ପଛରେ ପକାଇ ସର୍ବ ବୃହତ ନୌସେନା ପ୍ରସ୍ତୁତ କରିଛି। ଏନେଇ ପେଣ୍ଟାଗନ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଉଲ୍ଲେଖ କରାଯାଇଛି। ଚାଇନା ପାଖରେ ୩୫୦ ଯୁଦ୍ଧପୋତ ଏବଂ ବୁଡ଼ା ଜାହାଜ ରହିଛି। ସେଥିମଧ୍ୟରେ ୧୩୦ଟି ସର୍ଫେସ୍ କାମ୍ବେଟେଣ୍ଟସ୍ ରହିଛି। ଅପରପକ୍ଷରେ ଆମେରିକା ପାଖରେ ୨୯୩ ଯୁଦ୍ଧପୋତ ରହିଛି। ଆମେରିକା ପାଖରେ ୧୧ଟି ଏୟାରକ୍ରାଫ୍ଟ କ୍ୟାରିଅର ଅଛି। ସେଥିରେ ୮୦ରୁ ୯୦ ଫାଇଟର ଜେଟ୍ ଯାଇପାରିବ। ଏପରିସ୍ଥଳେ ଭାରତୀୟ ନୌସେନା ପାଖରେ ଗୋଟିଏ ଏୟାର କ୍ରାଫ୍ଟ କ୍ୟାରିଅର, ଏକ ଉଭୟଚର ଟ୍ରାନ୍ସପୋର୍ଟ ଡକ୍, ୮ ଲ୍ୟାଣ୍ଡିଂ ଶିପ୍ ଟ୍ୟାଙ୍କରର୍ସ, ୧୧ ଡେଷ୍ଟ୍ରୋୟର, ୧୩ ଫ୍ରିଗେଟ୍ସ, ୨୩ କର୍ବେଟ୍ସ୍, ୧୦ ବଡ଼ ଅଫଶୋର୍ ପେଟ୍ରୋଲ ଭେସେଲ୍, ୪ ଫ୍ଲିଟ୍ ଟ୍ୟାଙ୍କରର୍ସ, ୧୫ ଇଲେକ୍ଟ୍ରିକ୍ ଡିଜେଲ ଅପରେଟେଡ୍ ବୁଡ଼ା ଜାହାଜ ଏବଂ ୨ ପରମାଣୁ ବୁଡ଼ା ଜାହାଜ ରହିଛି। ପେଣ୍ଟାଗନ ରିପୋର୍ଟରେ ଦର୍ଶାଯାଇଛି ଯେ, ଭାରତର ସାମୁଦ୍ରିକ ସୀମା ଚାରିପଟେ ଥିବା ଦେଶଗୁଡ଼ିକରେ ଚାଇନା ସୈନ୍ୟ ଶିବିର ସ୍ଥାପନର ଉଦ୍ୟମ କରୁଛି। ପାକିସ୍ତାନ, ଶ୍ରୀଲଙ୍କା, ମ୍ୟାନମାର୍, ଥାଇଲାଣ୍ଡ, ସିଙ୍ଗାପୁର, ଇଣ୍ଡୋନେସିଆ, ୟୁଏଇ, କେନିଆ, ସିସିଲି, ତାଞ୍ଜାନିଆ, ଆଙ୍ଗୋଲା ଏବଂ ତାଜାଖସ୍ତାନରେ ଏଭଳି ପ୍ରୋଜେକ୍ଟ ଉପରେ ଚାଇନାର କାମ ଜାରି ରହିଛି। ଆସନ୍ତା ୧୦ ବର୍ଷ ମଧ୍ୟରେ ଚାଇନା ନିଜର ପରମାଣୁ ଶକ୍ତିକୁ ୨ ଗୁଣା କରିବାର ଯୋଜନା କରିଥିବା ରିପୋର୍ଟରେ ପ୍ରକାଶ ପାଇଛି।
