ଓ୍ବାଶିଂଟନ,୫।୩ : ଆମେରିକା ରାଷ୍ଟ୍ରପତି ନିର୍ବାଚନ ପାଇଁ ପ୍ରତିଦ୍ୱନ୍ଦ୍ୱିତା କରୁଥିବା ମୂଳ ଭାରତୀୟ ନିକ୍କି ହାଲି କହିଛନ୍ତି ଯେ ଚାଇନା ହେଉଛି ଆମେରିକାର ସବୁଠାରୁ ଶକ୍ତିଶାଳୀ ଶତ୍ରୁ। ଚାଇନା ଭାବୁଛି ଯେ ଆମେରିକୀୟ ଯୁଗ ଅତିବାହିତ ହୋଇଛି, କିନ୍ତୁ ଏହା ଭୁଲ। ଏହା କେବଳ ଆମର ବର୍ତ୍ତମାନର ନେତାଙ୍କ କାରଣରୁ ହୋଇଥିବା ସେ ଅଭିଯୋଗ କରିଛନ୍ତି।
ସେ ରିପବ୍ଲିକାନ ପାର୍ଟିର ବାର୍ଷିକ କାର୍ଯ୍ୟକୁ ସମ୍ବୋଧିତ କରି ସେ ଏଭଳି କହିଛନ୍ତି। ସେ ପୁଣି ଥରେ ଆମେରିକାର ବୈଦେଶିକ ନୀତି ଉପରେ ପ୍ରଶ୍ନ ଉଠାଇଛନ୍ତି ଏବଂ ଶତ୍ରୁ ଦେଶମାନଙ୍କୁ ସାହାଯ୍ୟ କରିବା ପାଇଁ ଦିଆଯାଇଥିବା ପରିମାଣ ଉପରେ ପ୍ରତିବନ୍ଧକ ଲଗାଇବାକୁ ପଡ଼ିବ ବୋଲି କହିଛନ୍ତି। ସମ୍ପ୍ରତି ଚାଇନାର ସିସିଟିଭି ବେଲୁନ ଘଟଣାକୁ ମନେ ପକାଇ ସେ କହିଛନ୍ତି ଯେ ମୋ ଜୀବନ କାଳ ମଧ୍ୟରେ ଏହା କେବେ ହୋଇ ନ ଥିଲା ଯେ ତୁମେ ଆକାଶକୁ ଦେଖ ଏବଂ ଚାଇନାର ଗୁପ୍ତଚର ବେଲୁନ ତୁମ ଉପରେ ନଜର ରଖିଛି। ଏହା ଅତ୍ୟନ୍ତ ଲଜ୍ଜାଜନକ ପରିସ୍ଥିତି ଥିଲା।
ଆମକୁ ଚାଇନାକୁ ଏନେଇ ଉତ୍ତରଦାୟୀ କରିବାକୁ ପଡିବ। ଉହାନ ସହର କରୋନା ଭୂତାଣୁର କେନ୍ଦ୍ର ଥିଲା ଏବଂ ସେଠାରୁ ଏହା ସମଗ୍ର ବିଶ୍ୱରେ ବ୍ୟାପିଗଲା। ରାଷ୍ଟ୍ରପତି ଜୋ ବାଇଡେନ ଚାଇନା ବିରୋଧରେ କିଛି ପଦକ୍ଷେପ ଗ୍ରହଣ କରୁ ନାହାନ୍ତିି। ଚାଇନାର କମ୍ପାନୀଗୁଡିକ ୩୮୦,୦୦୦ ଏକରରୁ ଅଧିକ ଆମେରିକୀୟ ଜମିର ମାଲିକ ଅଟନ୍ତି। ଏଥିମଧ୍ୟରୁ କିଛି ଆମର ସାମରିକ ବେସ ନିକଟରେ ଅବସ୍ଥିତ। ଆମେ ଏସବୁ ପରେ ମଧ୍ୟ କ’ଣ କରୁଛୁ? ଆମେ ଆମ ଦେଶରେ କୌଣସି ଶତ୍ରୁକୁ ଜମି କିଣିବାକୁ ଅନୁମତି ଦେବା ଉଚିତ ନୁହେଁ ।
