ଜମ୍ମୁ,୭ ।୧୦: ପାକିସ୍ତାନ ଭାରତର ସୀମା ଜମ୍ମୁ ନିକଟରେ ଡ୍ରୋନ୍ ମାଧ୍ୟମରେ ଆତଙ୍କବାଦକୁ ପ୍ରୋତ୍ସାହନ ଦେଉଛି । ଏବେ ଗୁଇନ୍ଦା ସଂସ୍ଥା ନିକଟରେ ଏମିତି ଖବର ପହଞ୍ଚିଛି ଯେ ପାକିସ୍ତାନ ଚାଇନାଠାରୁ ଅଧିକ ପେଲୋଡ ଡ୍ରୋନ ଆଣୁଛି । ଏହି ଡ୍ରୋନ ମାଧ୍ୟମରେ ପାକିସ୍ତାନ ବଡ ଧରଣର ଆକ୍ରମଣ ଯୋଜନା କରୁଥିବା ଅନୁମାନ କରାଯାଉଛି । କେବଳ ସେତିକି ନୁହେଁ ଗୋଟିଏ କନସାଇନମେଣ୍ଟରେ ବହୁ ମାତ୍ରାରେ ଗୁଳିଗୋଳା, ଅସ୍ତ୍ରଶସ୍ତ୍ର ଓ ଡ୍ରଗ୍ସ ପଠାଇବାର ଯୋଜନା ରଖିଥାଇ ପାରେ ପାକିସ୍ତାନ । ଏଥିପାଇଁ ଚାଇନା ସେନା ପାକିସ୍ତାନୀ ସେନା ଓ ଆତଙ୍କବାଦୀଙ୍କୁ ପ୍ରଶିକ୍ଷଣ ଦେଉଥିବା କୁହାଯାଉଛି । ମିଳିଥିବା ବିଶେଷ ସୂତ୍ରର ସୂଚନା ଅନୁଯାୟୀ, ପାକିସ୍ତାନ ଏବେ ୫-୭ କିଲୋ ପେଲୋଡ ହେବାଭଳି ଡ୍ରୋନ୍ ବ୍ୟବହାର କରୁଛି । ଏହା ୧୪-୧୫ କିଲୋମିଟର ଦୂର ପର୍ଯ୍ୟନ୍ତ ଉଡିବା ସହ ଏହାର ଉଡିବାର କ୍ଷମତା ରହିଛି ୬ରୁ ୮ ଘଣ୍ଟା । ହେଲେ ଏବେ ପାକିସ୍ତାନ ଚାଇନାଠାରୁ ୧୫-୨୦ କିଲୋ ପେଲୋଡ , ୨୦ଘଣ୍ଟା ପର୍ଯ୍ୟନ୍ତ ଉଡିପାରୁଥିବା ଓ ୨୦-୨୫ କିଲୋମିଟର ପର୍ଯ୍ୟନ୍ତ ଉଡିବାର କ୍ଷମତା ରଖୁଥିବା ଡ୍ରୋନ ଆଣୁଛି । ଆହୁରି ମଧ୍ୟ ସୂଚନା ରହିଛି କି ପାକିସ୍ତାନର ବାହାଲପୁର ଅଞ୍ଚଳରେ ଚାଇନା ପାକିସ୍ତାନକୁ ଆମେରିକାରେ ବ୍ୟବହାର କରାଯାଉଥିବା ୬ଟି ଡ୍ରୋନ୍ ଦେଇଛି । ଯାହାର ପେଲୋଡ କ୍ଷମତା ୩୫୦ କିଲୋ ପର୍ଯ୍ୟନ୍ତ ରହିଛି । ଏହା ୩ ଘଣ୍ଟା ପର୍ଯ୍ୟନ୍ତ ଉଡିପାରିବ । ଏସବୁ ତଥ୍ୟର କୌଣସି ଅଫିସିଆଲ ସ୍ପଷ୍ଟତା ପ୍ରକାଶ କରାଯାଇ ନାହିଁ ।
