ବେଜିଂ, ୧୩।୯ : ମୋବାଇଲ ଫୋନ କିମ୍ବା କମ୍ପ୍ୟୁଟର ଜରିଆରେ ହେଉଥିବା ଠକେଇର ପେଣ୍ଠସ୍ଥଳ ପାଲଟିଛି ଚାଇନା। ମେ ୨୦୨୧ ରୁ ଜୁଲାଇ ୨୦୨୨ ପର୍ଯ୍ୟନ୍ତ ଚାଇନାରେ ପାଞ୍ଚ ଲକ୍ଷ ୯୪ ହଜାର ଟେଲିକମ ଏବଂ ଇଣ୍ଟରନେଟ ଠକେଇ ମାମଲା ରୁଜୁ ହୋଇଥିଲା। ଚାଇନା ଜନ ସୁରକ୍ଷା ମନ୍ତ୍ରଣାଳୟ ଏହି ସୂଚନା ଦେଇଛି। କେବଳ ୨୦୨୧ମସିହାରେ ଚାଇନା କର୍ତ୍ତୃପକ୍ଷ ୧୫ ଲକ୍ଷ ଲୋକଙ୍କୁ ଠକଙ୍କୁ ଟଙ୍କା ସ୍ଥାନାନ୍ତର କରିବାରୁ ରକ୍ଷା କରିଥିଲେ।
ଚାଇନାର ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ସ୍କାମରମାନେ ସାଧାରଣତଃ ଦଳରେ କାମ କରନ୍ତି। ସେମାନେ ଅନଲାଇନ ଚାଟିଂ ମାଧ୍ୟମରେ ଲୋକଙ୍କ ସହ ଯୋଗାଯୋଗ କରନ୍ତି ଏବଂ କ୍ରିପ୍ଟୋକରେନ୍ସି ପରି ଜିନିଷରେ ବିନିଯୋଗ କରିବାକୁ ସେମାନଙ୍କୁ ପ୍ରବର୍ତ୍ତାନ୍ତି। ଏଭଳି ଡକେଇ ଯୋଗୁଁ ଲୋକମାନେ କୋଟି କୋଟି ଟଙ୍କା ହରାଇଛନ୍ତି। ଅନେକ ଏହାଯୋଗୁ ଆତ୍ମହତ୍ୟା କରିଛନ୍ତି।
ବିଶେଷଜ୍ଞମାନେ କହିଛନ୍ତି ଯେ ମୋବାଇଲ ସିମ କାର୍ଡ କାହାକୁ ବିକ୍ରୟ କରାଯିବ ସେନେଇ ସଠିକ ସୁରକ୍ଷା ବ୍ୟବସ୍ଥାର ଅଭାବ ହେଉଛି ଏଭଳି ଠକେଇର ମୁଖ୍ୟ କାରଣ। ଏହି କାରଣରୁ, ବିକ୍ରେତାମାନେ କୌଣସି ପରିଚୟ ପତ୍ର ନ ନେଇ ସିମ କାର୍ଡ ବିକ୍ରି କରିଥାନ୍ତି।
ଏହି ଘଟଣାରେ ହଜାର ହଜାର ଲୋକ ଅସୁବିଧାରେ ପଡ଼ିବା ପରେ ବର୍ତ୍ତମାନ ଚାଇନା ସରକାରଙ୍କ ନିଦ ଭାଙ୍ଗି ଯାଇଛି। ଟେଲିକମ ଏବଂ ଅନଲାଇନ ଠକେଇକୁ ରୋକିବା ପାଇଁ ସରକାର ଚଳିତ ମାସରେ ଏକ ଆଇନ ପ୍ରଣୟନ କରିଛି। ଆସନ୍ତା ଡିସେମ୍ବରରୁ ଏହି ଆଇନ କାର୍ଯ୍ୟକାରୀ ହେବ। ଏହି ଆଇନ ମାଧ୍ୟମରେ, ସ୍କାମରମାନଙ୍କୁ ଖୋଜୁଥିବାବେଳେ ଟେଲିକମ କମ୍ପାନୀ ଏବଂ ବ୍ୟାଙ୍କଗୁଡିକରୁ ସମ୍ପୂର୍ଣ୍ଣ ସୂଚନା ପାଇବାକୁ ଅଧିକାରୀମାନଙ୍କୁ କ୍ଷମତା ଦିଆଯାଇଛି। ଅଧିକାରୀମାନେ ମଧ୍ୟ ସ୍କାମରମାନଙ୍କର ବିଦେଶୀ ଲିଙ୍କ ଯାଞ୍ଚ୍ କରିବାକୁ ସକ୍ଷମ ହେବେ ।
ୱେବସାଇଟ ନିକ୍କିଆ ଏସିଆ ଡଟ୍ କମ୍ (NikkeaAsia.com) ର ଏକ ରିପୋର୍ଟ ଅନୁଯାୟୀ ୧୯୯୦ ଦଶକରେ ତାଇୱାନରେ ଟେଲିକମ ସ୍କାମ ଆରମ୍ଭ ହୋଇଥିଲା। ତାଙ୍କ ଅଧୀନରେ ସ୍କାମରମାନେ ଅନଲାଇନ କାର୍ଡ ସ୍କ୍ରାଚ କରିବା ପାଇଁ ଏକ ଜାଲିଆତି ଯୋଜନା ଚଳାଉଥିଲେ। ବିଜେତାମାନଙ୍କୁ କୁହାଯାଇଥିଲା ଯେ ପୁରସ୍କାର ରାଶି ପାଇବା ପୂର୍ବରୁ ସେମାନଙ୍କୁ ଟିକସ ଦେବାକୁ ପଡିବ। ଏହିପରି ଭାବରେ ହଜାର ହଜାର ଲୋକଙ୍କୁ ପ୍ରତାରଣା କରାଯାଇଥିଲା । କିନ୍ତୁ ତାଇୱାନର ଅଧିକାରୀମାନେ ଦାବି କରିଛନ୍ତି ଯେ ସେମାନେ ଶୀଘ୍ର ଏହି ଠକେଇ ଉପରେ ନିୟନ୍ତ୍ରଣ ପାଇଛନ୍ତି। ଚାଇନା କର୍ତ୍ତୃପକ୍ଷ ଏଭଳି ସମସ୍ୟାର ସମ୍ମୁଖୀନ ହେଉଛନ୍ତି।
ଚାଇନାର ରାଷ୍ଟ୍ରାୟତ୍ତ ନ୍ୟୁଜ ଏଜେନ୍ସି ଜିଂହୁଆ ଅନୁଯାୟୀ, ୨୦୦୬ ରୁ ୨୦୧୬ମଧ୍ୟରେ ଟେଲିକମ ସ୍କାମରେ ବାର୍ଷିକ ୨୦ରୁ ୩୦ ପ୍ରତିଶତ ବୃଦ୍ଧି ଘଟିଛି। ଚାଇନାର ବିଶେଷଜ୍ଞମାନେ ଅଭିଯୋଗ କରିଛନ୍ତି ଯେ ଆଜି ମଧ୍ୟ ଅଧିକାଂଶ ସ୍କାମର ଗ୍ୟାଙ୍ଗ ତାଇୱାନରେ ଅଛନ୍ତି। ଚାଇନାରେ ହୋଇଥିବା କ୍ଷତିର ୫୦ ପ୍ରତିଶତ ପର୍ଯ୍ୟନ୍ତ ତାଇୱାନ ସ୍କାମରମାନେ ଦାୟୀ। ତାଇୱାନ କର୍ତ୍ତୃପକ୍ଷ ସ୍କାମରମାନଙ୍କ ଉପରେ କୋମଳ ମନୋଭାବ ପୋଷଣ କରୁଛନ୍ତି। ଫଳରେ ଏଭଳି କାର୍ଯ୍ୟ ବଢ଼ିବାରେ ଲାଗିଛି। ମାଲେସିଆ ଏହିପରି ୨୦ ଜଣ ସନ୍ଦିଗ୍ଧଙ୍କୁ ତାଇୱାନକୁ ଫେରାଇ ଆଣିଥିଲେ, କିନ୍ତୁ ସେମାନଙ୍କୁ ସେଠାରେ ଛାଡି ଦିଆଯାଇଥିଲା।
କୋଭିଡ-୧୯ ମହାମାରୀ ଆରମ୍ଭ ହେବା ପରେ ଟେଲିକମ ସ୍କାମ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇଛି ବୋଲି ଅଧିକାରୀମାନେ କହିଛନ୍ତି। ତାଙ୍କ କହିବାନୁସାରେ, ଏହାର କାରଣ ହେଉଛି ଲୋକଙ୍କ ଆର୍ଥିକ ଅବସ୍ଥା ଖରାପ ହେବା। ଅପରପକ୍ଷରେ, ମହାମାରୀ ସମୟରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବା କଷ୍ଟକର ହୋଇପଡିଥିଲା। କିନ୍ତୁ ବର୍ତ୍ତମାନ ଚାଇନା ଅଧିକାରୀମାନେ ସେମାନଙ୍କ କାର୍ଯ୍ୟକୁ ଜୋରଦାର କରିବା ପାଇଁ ରଣନୀତି ପ୍ରସ୍ତୁତ କରୁଛନ୍ତି। ୨୦୨୦ ରେ, ଏହି ଜାଲିଆତିରେ ସମ୍ପୃକ୍ତ ଥିବାରୁ ଦେଶରେ ତିନି ଲକ୍ଷ ୬୧ ହଜାର ଲୋକଙ୍କୁ ଗିରଫ କରାଯାଇଥିଲା।
