ଜୋହାନ୍ସବର୍ଗ/ନୂଆଦିଲ୍ଲୀ,୪।୧୨: ଦକ୍ଷିଣ ଆଫ୍ରିକାରେ ପ୍ରଥମେ ଚିହ୍ନଟ ହୋଇଥିବା କରୋନାର ନୂତନ ଭାରିଆଣ୍ଟ୍ ଇତିମଧ୍ୟରେ ବହୁ ଦେଶରେ ପହଞ୍ଚିଛି। ଏନେଇ ସମ୍ପୃକ୍ତ ଦେଶରେ ଆତଙ୍କ ସୃଷ୍ଟି ହୋଇଛି। ଓମିକ୍ରନ୍ ବ୍ୟାପିବା ସହିତ ଲୋକଙ୍କ ମଧ୍ୟରେ ଭୟର ବାତାବରଣ ଦେଖିବାକୁ ମିଳୁଛି। ଓମିକ୍ରନ୍ ଦ୍ୱାରା ଯୁବବର୍ଗ ଏବଂ ବୟସ୍କ ଲୋକଙ୍କ ସହିତ ୫ ବର୍ଷରୁ କମ ବୟସ୍କ ପିଲା ଓ ଗର୍ଭବତୀ ମହିଳା ଅଧିକ ଆକ୍ରାନ୍ତ ହେବାର ଆଶଙ୍କା ଥିବା ବିଶେଷଜ୍ଞ ମତପୋଷଣ କରିଛନ୍ତି। ଏଥର ଏକ ଭିନ୍ନ ଧାରା ଦୃଶ୍ୟମାନ ହେଉଥିବା ବୈଜ୍ଞାନିକ କହିଛନ୍ତି। ପିଲାମାନଙ୍କ ମଧ୍ୟରେ ଓମିକ୍ରନ ଭାରିଆଣ୍ଟ: ପିଲାମାନଙ୍କ ମଧ୍ୟରେ ଓମିକ୍ରନ ପ୍ରକାରଗୁଡିକ ବିଷୟରେ ଏକ ଭୟାନକ ବିଷୟ ସାମ୍ନାକୁ ଆସିଛି। ଦକ୍ଷିଣ ଆଫ୍ରିକାର ଡାକ୍ତରମାନେ କହିଛନ୍ତି ଯେ ଏଥର ସଂକ୍ରମଣ ୫ ବର୍ଷରୁ କମ ବୟସ୍କ ପିଲାମାନଙ୍କଠାରେ ଶୀଘ୍ର ବ୍ୟାପୁଛି।
ଦକ୍ଷିଣ ଆଫ୍ରିକାର ନ୍ୟାସନାଲ ଇନଷ୍ଟିଚ୍ୟୁଟ ଅଫ କମ୍ୟୁନିକେବଲ ରୋଗ (ଏନ୍ଆଇସିଡି)ର ଡାକ୍ତର ୱାସିଲା ଜାସାଟ୍ କହିଛନ୍ତି ଯେ, ପିଲାମାନେ କୌଣସି ଭୂତାଣୁ ଦ୍ୱାରା ସଂକ୍ରମିତ ହେବାର ଆଶଙ୍କା ସାଧାରଣତଃ କମ ରହିଥାଏ। କରୋନା ମହାମାରୀର ପୂର୍ବ ଲହରରେ ମଧ୍ୟ ସମାନ ଘଟଣା ଦେଖିବାକୁ ମିଳିଥିଲା। କିନ୍ତୁ ତୃତୀୟ ଲହରରେ ୫ ବର୍ଷରୁ କମ ପିଲା ଏବଂ ୧୫ ରୁ ୧୯ ବର୍ଷ ବୟସ୍କ ଆକ୍ରାନ୍ତ ହେବା ସହିତ ହସ୍ପିଟାଲରେ ଭର୍ତ୍ତି ହେବାରେ ସଂଖ୍ୟାରେ ବୃଦ୍ଧି ଘଟିଥିଲା।
ବର୍ତ୍ତମାନ ଚତୁର୍ଥ ଲହରରେ ସମସ୍ତ ବୟସ ବର୍ଗରେ ଅଧିକ ସଂକ୍ରମଣର ଧାରା ଦେଖିବାକୁ ମିଳୁଛି। ବିଶେଷ କରି ସାନ ପିଲାମାନଙ୍କଠାରେ ଏହା ଅଧିକ ହେବାର ଆଶଙ୍କା ରହିଛି।
ଛୋଟ ପିଲାମାନଙ୍କ ମଧ୍ୟରେ ସଂକ୍ରମଣ କାହିଁକି ଶୀଘ୍ର ବ୍ୟାପିଛି ସେନେଇ ଗବେଷଣା କରାଯିବ ବୋଲି ସେ କହିଛନ୍ତି। ହସ୍ପିଟାଲରେ ପିଲାମାନଙ୍କ ପାଇଁ ବେଡ୍ ଏବଂ ସ୍ବାସ୍ଥ୍ୟକର୍ମୀଙ୍କ ସଂଖ୍ୟା ବୃଦ୍ଧି ଉପରେ ସରକାର ଧ୍ୟାନ ଦେବା ଆବଶ୍ୟକ ବୋଲି ସେ କହିଛନ୍ତି। ଦକ୍ଷିଣ ଆଫ୍ରିକାର ୮୦ ପ୍ରତିଶତରୁ ଅଧିକ ନୂତନ ମାମଲା ଗୌତେଙ୍ଗ ପ୍ରଦେଶରେ ରେକର୍ଡ କରାଯାଇଛି।
ସ୍ଥାନୀୟ ସ୍ବାସ୍ଥ୍ୟ ବିଭାଗ ସହ ଜଡିତ ଥିବା ଡାକ୍ତର ସାକିସି ମାଲୁଲେକେ ଉଦ୍ବେଗ ପ୍ରକାଶ କରି କହିଛନ୍ତି ଯେ ଏଥର ଗର୍ଭବତୀ ମହିଳାଙ୍କ ମଧ୍ୟରେ ସଂକ୍ରମଣ ଶୀଘ୍ର ବ୍ୟାପୁଛି। ଭାରତ ସମେତ ପୃଥିବୀର ପ୍ରାୟ ୩୦ ଟି ଦେଶରେ ଏବେ ଓମିକ୍ରନ୍ ଭାରିଆଣ୍ଟ୍ ପହଞ୍ଚିଛି। ମିଳିିଥିବା ସୂଚନା ଅନୁଯାୟୀ ୪୦ ବର୍ଷରୁ କମ ବୟସର ଲୋକମାନେ ଏହି ପ୍ରକାରରୁ ସଂକ୍ରମଣର ଆଶଙ୍କା ଅଧିକ ରହିଛି। ଏହା ସହିତ ଯେଉଁମାନେ ଟିକା ନେଇ ନାହାନ୍ତି ସେମାନଙ୍କ ପାଇଁ ମଧ୍ୟ ଅଧିକ ବିପଦ ରହିଛି।
