ନୂଆଦିଲ୍ଲୀ,୨।୧୨: ଦିଲ୍ଲୀରେ ପ୍ରଦୂଷଣର ମାତ୍ରା ବଢୁଥିବା ମଧ୍ୟରେ ସ୍କୁଲ ଖୋଲିବା ନେଇ ସୁପ୍ରିମକୋର୍ଟ ପୁଣି ସରକାରଙ୍କୁ ତାଗିଦ୍ କରିଛନ୍ତି। ଶୁଣାଣି ସମୟରେ ସୁପ୍ରିମକୋର୍ଟ ଦିଲ୍ଲୀ ସରକାରଙ୍କୁ ପ୍ରଶ୍ନ କରିଛନ୍ତି ଯେ ଆପଣ ଆମକୁ କହିଛନ୍ତି ଯେ ସ୍କୁଲ ବନ୍ଦ ଅଛି କିନ୍ତୁ ଛୋଟ ପିଲାମାନେ ସ୍କୁଲ ଯାଉଛନ୍ତି। ଘରେ ରହି ବଡ ଲୋକ ଓ୍ବାର୍କ ଫ୍ରମ୍ ହୋମ୍ କରୁଛନ୍ତି। ଏହା କ’ଣ ଚାଲିଛି? କୋର୍ଟ କହିଛନ୍ତି ଯେ ଏଭଳି ପରିସ୍ଥିତିରେ ଆମକୁ ଦିଲ୍ଲୀ ସରକାରଙ୍କ ତଦାରଖ ପାଇଁ କାହାକୁ ନିଯୁକ୍ତ କରିବାକୁ ପଡିବ ?
ଏନେଇ ସୁପ୍ରିମକୋର୍ଟ ଦିଲ୍ଲୀ ସରକାରଙ୍କୁ ନିନ୍ଦା କରି କହିଛନ୍ତି ଯେ ଆଶ୍ୱାସନା ଏବଂ ଲୋକପ୍ରିୟତାର ସ୍ଲୋଗାନ ବ୍ୟତୀତ ସରକାର କୌଣସି କାର୍ଯ୍ୟ କରୁ ନାହାନ୍ତି। ଯଦି ଆଦେଶ ଆବଶ୍ୟକ ଶୀର୍ଷକୋର୍ଟ ନିର୍ଦ୍ଦେଶ ଜାରି କରିବାକୁ ପ୍ରସ୍ତୁତ ବୋଲି ପ୍ରଧାନ ବିଚାରପତି ଏନ୍.ଭି.ରମନାଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି। ପ୍ରଦୂଷଣ ପ୍ରସଙ୍ଗରେ ଆପଣଙ୍କ ସରକାର ଚଳାଇବା ପାଇଁ ଆମେ କାହାକୁ ନିଯୁକ୍ତ କରିବୁ ବୋଲି ଖଣ୍ଡପୀଠ ପ୍ରଶ୍ନ କରିଛନ୍ତି।
ପ୍ରଦୂଷଣକୁ ଦୃଷ୍ଟିରେ ରଖି ସୁପ୍ରିମକୋର୍ଟ ଦିଲ୍ଲୀ ସରକାରଙ୍କୁ ପଚାରିଛନ୍ତି ଯେ ଆପଣ କହିଥିଲେ ଯେ ଦିଲ୍ଲୀରେ ୧୦୦୦ ସିଏନଜି ବସ ଚଳାଚଳ କରିବ। ଏହି ଯୋଜନା କ’ଣ ହେଲା? ପ୍ରଧାନ ବିଚାରପତି କହିଛନ୍ତି କିଛି କାମ ହେଉ ନ ଥିବା ଆମକୁ ମନେ ହେଉଛି। କାରଣ ପ୍ରଦୂଷଣ କ୍ରମାଗତ ଭାବେ ବୃଦ୍ଧି ପାଉଛି। କେବଳ ସମୟ ହିଁ ନଷ୍ଟ ହେଉଛି। ପ୍ରଧାନ ବିଚାରପତି ପ୍ରଶ୍ନ କରିଛନ୍ତି ଯେ ବର୍ତ୍ତମାନ ନଡ଼ା ମୂଳ ପୋଡା ଯାଉନାହିଁ କିନ୍ତୁ ପ୍ରଦୂଷଣର ସ୍ତର କାହିଁକି ବଢୁଛି? ପ୍ରଧାନ ବିଚାରପତି ସରକାରଙ୍କୁ କହିିଛନ୍ତି, ସାଧାରଣ ଲୋକଙ୍କ ତରଫରୁ ମୁଁ ପ୍ରଶ୍ନ ପଚାରୁଛି ଯେ ଏହି ମାମଲା ଆରମ୍ଭ ହେବା ଦିନଠାରୁ ସରକାରଙ୍କ ପକ୍ଷରୁ କେଉଁ କେଉଁ ନିଆଯାଇଥିବା ପଦକ୍ଷେପ ଗ୍ରହଣ କରାଯାଇଛି। ଏସବୁ ପଦକ୍ଷେପ ଦ୍ୱାରା କିଭଳି ସୁଫଳ ମଳିଛି। ପ୍ରଦୂଷଣ କାହିଁକି ହ୍ରାସ ହେଉନାହିଁ?
ପ୍ରଦୂଷଣ ଉପରେ ଚାଲିଥିବା ଶୁଣାଣି ସମୟରେ ପ୍ରଧାନ ବିଚାରପତି ପ୍ରଶ୍ନ କରିଛି ଯେ ବ୍ୟାନର ଧରି ରାସ୍ତାରେ ଠିଆ ହୋଇଥିବା ପିଲାମାନେ କିପରି ପ୍ରଦୂଷଣ ଦ୍ୱାରା ପ୍ରଭାବିତ ହେଉଛନ୍ତି ସେ ବିଷୟରେ ଦିଲ୍ଲୀ ସରକାରଙ୍କୁ ସୂଚନା ଦିଆଯାଇଛି କି? ଦିଲ୍ଲୀ ସରକାରଙ୍କ ପକ୍ଷରୁ ଖଣ୍ଡପୀଠଙ୍କ ସମ୍ମୁଖରେ ଉପସ୍ଥିତ ଥିବା ଆଇନଜୀବୀ ଏହାର ଉତ୍ତରରେ କହିଥିଲେ ଯେ ସେମାନେ ସିଭିଲ୍ ଡିଫେନ୍ସ୍ ସଦସ୍ୟ। ସେମାନଙ୍କୁ ମଧ୍ୟ ସ୍ବାସ୍ଥ୍ୟ ସୁରକ୍ଷା ସମ୍ପର୍କରେ ଧ୍ୟାନ ଦେବାକୁ ପଡ଼ିବ ବୋଲି କୋର୍ଟ କହିଛନ୍ତି। ଦିଲ୍ଲୀ ସରକାର ଏବଂ କେନ୍ଦ୍ର ସରକାରଙ୍କ ଟାସ୍କଫୋର୍ସ ଭିନ୍ନ ଭିନ୍ନ କି ବୋଲି ପ୍ରଧାନ ବିଚାରପତି ପ୍ରଶ୍ନ କରିଛନ୍ତି?
