ନନ୍ଦପୁର,୩ା୭ (ଶଙ୍କର ପୂଜାରୀ): ୦ରୁ ୬ ବର୍ଷ ଯାଏ ପିଲାଙ୍କୁ ଅଙ୍ଗନୱାଡ଼ି କେନ୍ଦ୍ରଗୁଡିକରେ ପୁଷ୍ଟିକର ଖାଦ୍ୟ, ଶୈକ୍ଷିକ ବାତାବରଣରେ ପ୍ରାକ୍ଶିକ୍ଷା ପ୍ରଦାନ ନେଇ ସରକାର ବ୍ୟବସ୍ଥା କରିଛନ୍ତି। ଏହାକୁ ମହିଳା ଓ ଶିଶୁ ବିକାଶ ବିଭାଗ ପରିଚାଳନା କରୁଛି। ମାତ୍ର ନନ୍ଦପୁର ବ୍ଲକରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ବ୍ଲକର ଗୋଲୁର ପଞ୍ଚାୟତର ଗଙ୍ଗାଗୁଡା ଗ୍ରାମରେ କୋମଳମତି ୨୪ ଜଣ ଶିଶୁ ପ୍ରାକ୍ଶିକ୍ଷା ଅଙ୍ଗନୱାଡ଼ି କେନ୍ଦ୍ରର ସହାୟକଙ୍କ ଦ୍ୱାରା ଗାଁ ଦାଣ୍ଡରେ ନେଉଥିବା ଦେଖିବାକୁ ମିଳିଛି। ଗ୍ରାମରେ ଅଙ୍ଗନୱାଡ଼ି କେନ୍ଦ୍ରର ଗୃହ ନାହିଁ। ଗୃହନିର୍ମାଣ ୬ ବର୍ଷ ହେବ ଚାଲିଛି। ଫଳରେ ପିଲାମାନେ ପ୍ରାକ୍ ଶିକ୍ଷା ଗ୍ରହଣ କରିବାକୁ ହନ୍ତସନ୍ତ ହେଉଛନ୍ତି। ଏଥିସହ ଅଙ୍ଗନଓ୍ବାଡି କେନ୍ଦ୍ରର ଅନ୍ୟାନ୍ୟ କାର୍ଯ୍ୟ ମଧ୍ୟ ପ୍ରଭାବିତ ହେଉଛି। ଅଙ୍ଗନୱାଡି କେନ୍ଦ୍ରରେ ନିଯୁକ୍ତ ଅଙ୍ଗନୱାଡ଼ି କର୍ମୀ କେନ୍ଦ୍ରକୁ ଆସୁନାହାନ୍ତି। ଯାହା କିଛି ଖାଦ୍ୟ ବ୍ୟବସ୍ଥା ଓ ପିଲାଙ୍କ ପାଠ ପଢା ସହାୟକ ତୁଲାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏନେଇ ବାରମ୍ବାର ବ୍ଲକ ଓ ସିଡିପିଓଙ୍କ କାର୍ଯ୍ୟାଳୟରେ ଜଣାଇଥିଲେ ମଧ୍ୟ କିଛି ସୁଫଳ ମିଳିନି ବୋଲି ଗ୍ରାମବାସୀ କହିଛନ୍ତି। ଏସମ୍ପର୍କରେ ସିଡିପିଓ ମିନତିବାଳା ପଟ୍ଟନାୟକଙ୍କୁ ପଚାରିବାରୁ ସେ କହିଲେ, କେବଳ ଗଙ୍ଗାଗୁଡା ଗ୍ରାମ ଅଙ୍ଗନଓ୍ବାଡି କେନ୍ଦ୍ରର ଗୃହ ନୁହେଁ ବ୍ଲକରେ ଏଭଳି ୧୬/୧୭ଟି କେନ୍ଦ୍ର ଅର୍ଦ୍ଧ ନିର୍ମିତ ଅବସ୍ଥାରେ ପଡିରହିଛି। ବ୍ଲକ ସଦର ମହକୁମାର ଶିଶୁ ବିକାଶ କାର୍ଯ୍ୟାଳୟ ପାର୍ଶ୍ୱରେ ଥିବା ଅଙ୍ଗନୱାଡ଼ି କେନ୍ଦ୍ର ସମେତ କୁମ୍ଭାର ସାହି ଅଙ୍ଗନୱାଡ଼ି କେନ୍ଦ୍ର ଅବସ୍ଥା ମଧ୍ୟ ସମାନ ସେ ଥିବା କହିଛନ୍ତି। ତେବେ ଅଙ୍ଗନୱାଡି କର୍ମୀ କେନ୍ଦ୍ରକୁ ଆସୁ ନ ଥିବା ଅଭିଯୋଗର ଯାଞ୍ଚ କରାଯିବ ବୋଲି ସେ କହିଥିଲେ।
