କୋକସରା,୧୮ା୧୧ (ଦୁଷ୍ମନ୍ତ କୁମାର ପାଟ୍ଟଯୋଷୀ):କଳାହାଣ୍ଡି ଜିଲା କୋକସରା ବ୍ଲକରେ ଶିଶୁ ବିକାଶ ଯୋଜନା ବାଟବଣା ହୋଇଛି। ଲଡୁଗାଁ ପଞ୍ଚାୟତ ପୀତବାସପୁରଠାରେ ଥିବା ଅଙ୍ଗନୱାଡ଼ି କେନ୍ଦ୍ରରେ ଗୃହ ନ ଥିବାରୁ ଅଙ୍ଗନୱାଡ଼ି କର୍ମୀଙ୍କ ଘରେ ପାଠପଢା ଚାଲିଆସୁଛି। ୪ବର୍ଷ ହେବ କେନ୍ଦ୍ରଟି ଭଙ୍ଗାଦଦରା ହୋଇ ପଡ଼ିରହିଛି। କାନ୍ଥରେ ଫାଟ ଦେଖାଯିବା ପରେ ନିଷିଦ୍ଧାଞ୍ଚଳ ଘୋଷଣା କରାଯାଇ ସହାୟିକାଙ୍କ ଘରେ ପ୍ରାକ୍ ବିଦ୍ୟାଳୟର ୨୦ ଛାତ୍ରୀଛାତ୍ରଙ୍କୁ ଶିକ୍ଷାଦାନ କରାଯାଉଥିବା ବେଳେ ଘର ବାହାରେ ପିଲାମାନଙ୍କୁ ନେଇ ଶିକ୍ଷାଦାନ କରାଯାଉଛି। କେନ୍ଦ୍ରକୁ ମରାମତି କରାଯିବା ପାଇଁ ବିଭାଗୀୟ ଅଧିକାରୀଙ୍କୁ ଅଭିଯୋଗ କଲେ ମଧ୍ୟ କିଛି ସୁଫଳ ମଳିନାହିଁ। ସେହିପରି ଲଡୁଗାଁ ପଞ୍ଚାୟତ ଆଇଁଲୀ ଦିସାରୀପଡ଼ାରେ ଶିଶୁମାନଙ୍କୁ ଶିକ୍ଷାଦାନ ଓ ଗର୍ଭବତୀଙ୍କୁ ଯତ୍ନ ନେବା ପାଇଁ ଥିବା ଅଙ୍ଗନୱାଡ଼ି କେନ୍ଦ୍ର ଖୋଲାଯାଇଛି। ହେଲେ ଦୁଇବର୍ଷ ବିତିଯାଇଥିଲେ ହେଁ କେନ୍ଦ୍ର ପାଇଁ ଗୃହ ନିର୍ମାଣ କରାଯାଇ ନ ଥିବାରୁ ଛାତ୍ରୀଛାତ୍ରଙ୍କୁ ଅଙ୍ଗନୱାଡ଼ି କର୍ମୀଙ୍କ ଘରେ ପାଠପଢା ସହ ଖାଦ୍ୟ ରାନ୍ଧି ଦିଆଯାଉଛି। ସୂଚନା ଅନୁସାରେ କୋକସରା ବ୍ଲକରେ ୧୬୮ ଅଙ୍ଗନୱାଡ଼ି କେନ୍ଦ୍ର ରହିଛି। ସେମଧ୍ୟରୁ ୪୪ଟି କେନ୍ଦ୍ରକୁ ସକ୍ଷମ ମାନ୍ୟତା ଦିଆଯାଇ ସମର୍ଥ କରାଯାଇଥିବା ବେଳେ ୪୧ ଅଙ୍ଗନୱାଡ଼ି କେନ୍ଦ୍ରର କେଉଁଠି ଅଙ୍ଗନୱାଡ଼ି କର୍ମୀଙ୍କ ବାରଣ୍ଡାରେ ତ ଆଉ କେଉଁଠି ଖୋଲା ଆକାଶ ତଳେ ପାଠପଢା ଚାଲିଛି। ଏ ନେଇ କୋକସରା ସମନ୍ବିତ ଶିଶୁ ବିକାଶ ପ୍ରକଳ୍ପ ଅଧିକାରିଣୀ ସରୋଜା ଦେଈଙ୍କ ପ୍ରତିକ୍ରିୟା ନେବାରୁ ବ୍ଲକରେ ଅନେକ ଅଙ୍ଗନୱାଡ଼ି କେନ୍ଦ୍ରର କୋଠା ନାହିଁ, ଏ ନେଇ ଜିଲାକୁ ଅବଗତ କରାଯାଇଛି ବୋଲି କହିଛନ୍ତି।
