ଚିକିଟି,୨୬ା୮(ପ୍ରକାଶ ଚନ୍ଦ୍ର ସାହୁ): ଗଞ୍ଜାମ ଜିଲା ଚିକିଟି ବ୍ଲକ ଅଧୀନ ମାଉନ୍ଦପୁର ଗ୍ରାମରେ ଘଟିଥିବା ବିଷାକ୍ତ ମଦମୃତ୍ୟୁ ଘଟଣାରେ ଗିରଫ ସଂଖ୍ୟା ୧୦ରେ ପହଞ୍ଚିଛି। ଏହି ଘଟଣାରେ ଫେରାର ଥିବା ଅନ୍ୟ ଜଣେ ଅଭିଯୁକ୍ତଙ୍କୁ ସୋମବାର ଗିରଫ କରାଯାଇଛି। ସେ ହେଲେ ମାଉନ୍ଦପୁର ଗ୍ରାମର ପୂର୍ଣ୍ଣ ସାହୁ।
ଘଟଣା ପରଠାରୁ ପୂର୍ଣ୍ଣ ଫେରାର ଥିଲେ। ଫେରାର ପରଠାରୁ କେ. ନୂଆଗାଁ ପୋଲିସ ତାଙ୍କୁ ଖୋଜିବା ଜାରି ରଖିଥିଲା। ଗିରଫ ପରେ କେ. ନୂଆଗାଁ ଥାନା ଅଧିକାରୀ କିଶୋର କୁମାର ସାମଲ ତାଙ୍କୁ କୋର୍ଟ ଚାଲାଣ କରିଛନ୍ତି। ଗତ ସୋମବାର ମାଉନ୍ଦପୁର ଗ୍ରାମରେ ବିଷାକ୍ତ ମଦ ପିଇ ୨୩ ଜଣ ଅସୁସ୍ଥ ହୋଇ ପଡିଥିଲେ। କେ. ନୂଆଗାଁ ପୋଲିସ ମାଉନ୍ଦପୁରରେ ଚଢ଼ାଉ କରି ଚୋରା ମଦ କାରବାର କରୁଥିବା ସନ୍ଦେହରେ ୬ ଜଣକୁ ଗିରଫ କରିଥିଲା।
ଚିକିଟି ଅବକାରୀ ବିଭାଗ ପକ୍ଷରୁ ଢେପଗାଁରେ ୫୫ ଲିଟର ଦେଶୀ ମଦ ଜବତ କରି ଜଣେ ମହିଳାଙ୍କୁ ଗିରଫ କରାଯାଇଥିଲା। ଏହି ଘଟଣାରେ ପ୍ରଥମେ ୭ଜଣଙ୍କୁ ଗିରଫ କରାଯାଇଥିଲା। ପରେ ୩ଜଣ ଗିରଫ ହୋଇଥିଲେ। ଫଳରେ ଗିରଫ ସଂଖ୍ୟା ୧୦ରେ ପହଞ୍ଚିଛି। ଏ ସମ୍ପର୍କରେ କେ ନୂଆଗାଁ ଥାନା ଅଧିକାରୀ କିଶୋର କୁମାର ସାମଲଙ୍କୁ ପଚାରିବାରୁ ଏହି ମାମଲାରେ ବର୍ତ୍ତମାନ ସୁଦ୍ଧା ୧୦ଜଣ ଗିରଫ ହୋଇଥିବା ପ୍ରକାଶ କରିବା ସହ ଏଭଳି ଚଢ଼ାଉ ଆଗାମୀ ଦିନରେ ମଧ୍ୟ ଜାରି ରହିବ ବୋଲି ସୂଚନା ଦେଇଛନ୍ତି।
