ଝିଅ ପାଇଁ ଅଡ଼ୁଆରେ ପଡ଼ିଛନ୍ତି ମିଜୋରାମ ମୁଖ୍ୟମନ୍ତ୍ରୀ ଜୋରାମଥାଙ୍ଗା। ଜଣେ ଡାକ୍ତରଙ୍କୁ ଝିଅ ମିଲାରି ଛାଙ୍ଗ୍ଟେ ମାଡ଼ ମାରିବା ଭିଡିଓ ବହୁଳ ପ୍ରସାରିତ ହେବା ପରେ ଜୋରାମଥାଙ୍ଗା ସର୍ବସାଧାରଣରେ ଏଥିପାଇଁ କ୍ଷମା ମାଗିଛନ୍ତି। ଘଟଣାଟି ବୁଧବାର ଦିନର। ମିଲାରି ଆଇଜଲ୍ ସ୍ଥିତ ଚର୍ମ ବିଭାଗ ଡାକ୍ତରଙ୍କ ନିକଟକୁ ଯାଇଥିଲେ। ତାଙ୍କ ପାଖରେ ଆପଏଣ୍ଟମେଣ୍ଟ ନ ଥିବାରୁ ଡାକ୍ତର ଜଣକ ମିଲାରିଙ୍କୁ ଦେଖିବାକୁ ମନାକରିଥିଲେ। ଏଥିରେ ଉତ୍ତ୍ୟକ୍ତ ହୋଇ ଡାକ୍ତରଙ୍କୁ ସେ ମାଡ଼ ମାରିଥିଲେ।
କେତେଜଣ ଲୋକ ମିଲାରିଙ୍କୁ ଅଟକାଇବାକୁ ଚେଷ୍ଟା କରୁଥିବା ମଧ୍ୟ ଭିଡିଓରେ ଦେଖିବାକୁ ମିଳିଛି। ଏହା ଭାଇରାଲ ହେବା ପରେ ସୋସିଆଲ ମିଡିଆରେ ମୁଖ୍ୟମନ୍ତ୍ରୀ ଓ ତାଙ୍କ ପରିବାରକୁ କଡ଼ା ସମାଲୋଚନା କରାଯାଇଥିଲା। ଭାରତୀୟ ମେଡିକାଲ ଆସୋସିଏଶନର ମିଜୋରାମ ୟୁନିଟ୍ ପକ୍ଷରୁ ଶନିବାର ଏହାର ପ୍ରତିବାଦରେ ବିକ୍ଷୋଭ କରାଯାଇଥିଲା। ପରେ ଜୋରାମଥାଙ୍ଗା ତାଙ୍କ ଇନ୍ଷ୍ଟାଗ୍ରାମ ଆକାଉଣ୍ଟରେ ଏକ ହାତଲେଖା ନୋଟ୍ ପୋଷ୍ଟ କରି ଝିଅର ଏପରି ବ୍ୟବହାର ପାଇଁ କ୍ଷମା ମାଗିଛନ୍ତି।
